*وضو ٹوٹنے کے چھپے ہوئے عوامل اور طہارت کے شرعی احکامات* جمعرات 12 نومبر 2026ء تحقیق و تحریر: انجینیئر نذیر ملک سرگودھا

*وضو ٹوٹنے کے چھپے ہوئے عوامل اور طہارت کے شرعی احکامات*

جمعرات 12 نومبر 2026ء
تحقیق و تحریر:
انجینیئر نذیر ملک سرگودھا

اسلام دینِ طہارت ہے اور طہارت عبادت کی قبولیت کی بنیادی شرط ہے۔ نماز اور دیگر عبادات کے لیے وضو کا درست حالت میں ہونا لازم ہے۔ عام طور پر لوگ وضو توڑنے والے ظاہری اور معروف اسباب مثلاً پیشاب، پائخانہ، ہوا کا خارج، یا قے اور خون وغیرہ کے جاری ہونے سے تو بخوبی واقف ہیں، لیکن کچھ ایسے امور اور احادیثِ نبویہ ہیں جن کی طرف عام طور پر لوگوں کا دھیان نہیں جاتا اور غفلت میں وضو کی حالت متاثر ہو جاتی ہے۔ اس تحریر میں خاص طور پر ان اہم احادیث، سونے کے تفصیلی احکام، تسبیح و تلاوت، شک کی بنیاد پر وضو کے حکم، مصحف کو ہاتھ لگانے کے شرعی ضابطے، اور تفاسیر کے مسائل کو اجاگر کیا جا رہا ہے۔

وضو کی فرضیت اور نماز کا حکم:
نماز کی صحت کے لیے طہارت اولین شرط ہے اور بغیر طہارت کے نماز ادا نہیں ہوتی۔

اس حوالے سے صحیح بخاری اور صحیح مسلم میں حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ اللہ تعالی کسی ایسے شخص کی نماز قبول نہیں کرتا جو بے وضو ہو یہاں تک کہ وہ وضو کر لے۔

لا يقبل الله صلاة أحدكم إذا أحدث حتى يتوضأ (صحیح البخاري، کتاب الوضوء، حدیث نمبر: 135؛ صحیح مسلم، کتاب الطهارة، حدیث نمبر: 225)

سنن ابی داود اور سنن ترمذی میں حضرت عبد اللہ بن عمر رضی اللہ عنہما سے مروی ہے کہ نبی کریم صلی اللہ علیہ وسلم نے فرمایا کہ طہارت کے بغیر نماز قبول نہیں کی جاتی اور نہ ہی حرام مال سے دیے گئے صدقے کا ثواب ملتا ہے۔

لا تقبل صلاة بغير طهور ولا صدقة من غلول (سنن ابی داود، کتاب الطهارة، حدیث نمبر: 59؛ جامع ترمذی، کتاب الطهارة، حدیث نمبر 1

شک کی بنیاد پر وضو کا نہ ٹوٹنا:
عبادت اور طہارت کے معاملات میں وسوسوں اور شک سے بچنا ضروری ہے۔ بسا اوقات انسان کو نماز یا طہارت کے دوران شک ہو جاتا ہے کہ آیا اس کا وضو ٹوٹ گیا ہے یا نہیں، تو شریعت کا اصول یہ ہے کہ محض شک کی بنیاد پر وضو نہیں ٹوٹتا جب تک کہ یقین نہ ہو جائے۔ اس کی صریح دلیل صحیح مسلم میں حضرت عباد بن تمید رضی اللہ عنہ سے روایت ہے کہ انہوں نے اپنے چچا سے پوچھا کہ اس شخص کے بارے میں کیا حکم ہے جسے نماز میں یہ خیال گزرتا ہے کہ اس کا وضو ٹوٹ گیا ہے؟ تو رسول اللہ صلی اللہ علیہ وسلم نے فرمایا کہ وہ اس وقت تک نماز نہ چھوڑے جب تک کہ وہ آواز نہ سن لے یا بو نہ سونگھ لے (یعنی ہوا خارج ہونے کا یقین نہ ہو جائے)۔
لا ينصرف حتى يسمع صوتا أو يجد ريحا (صحیح مسلم، کتاب الحيض، باب الدليل على أن النم نوم لا ينقض الوضوء، حدیث نمبر: 361)
اس حدیث مبارکہ سے یہ اصول واضح ہوتا ہے کہ محض وہم یا شک سے وضو زائل نہیں ہوتا۔

شرمگاہ کو بلا حائل ہاتھ لگانا:
وضو کے نواقض میں سے ایک اہم مسئلہ شرمگاہ کو چھونا ہے۔ عام طور پر لوگ اس بارے میں لاپرواہ ہوتے ہیں کہ کپڑوں کے اوپر سے یا بلا حائل ہاتھ لگنے سے کیا حکم ہے۔ اس سلسلے میں حضرت بسرہ بنت صفوان رضی اللہ عنہا سے روایت ہے کہ انہوں نے نبی کریم صلی اللہ علیہ وسلم کو فرماتے ہوئے سنا کہ جو شخص اپنی شرمگاہ کو ہاتھ لگائے تو وہ وضو کرے۔
من مس ذكره فليتوضأ (سنن ابی داود، کتاب الطهارة، حدیث نمبر: 181؛ جامع ترمذی، کتاب الطهارة، حدیث نمبر: 82)

مسند احمد اور دیگر کتب میں حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ جو شخص اپنا ہاتھ اپنی شرمگاہ تک پہنچائے اور اس کے درمیان کوئی پردہ یا کپڑا حائل نہ ہو تو اس پر وضو واجب ہو گیا ہے۔

إذا أفضى أحدكم بيده إلى فرجه وليس بينهما ستر ولا حجاب فقد وجب عليه الوضوء (مسند احمد، حدیث نمبر: 7461)
لہٰذا اس بات کا خاص خیال رکھنا چاہیے کہ اگر بلا حائل شرمگاہ کو ہاتھ لگ جائے تو از سر نو وضو کرنا ضروری ہے۔

اونٹ کا گوشت کھانے سے وضو کا ٹوٹنا:
صحیح احادیث میں اس پر بڑی صریح ہدایات موجود ہیں جن پر عام طور پر عوام کی توجہ کم ہوتی ہے۔ صحیح مسلم میں حضرت جابر بن سمرہ رضی اللہ عنہ سے روایت ہے کہ ایک شخص نے نبی کریم صلی اللہ علیہ وسلم سے پوچھا کہ کیا میں بکری کا گوشت کھانے سے وضو کروں؟ آپ نے فرمایا کہ اگر تم چاہو تو وضو کرو اور اگر چاہو تو نہ کرو۔ اس نے پھر پوچھا کہ کیا میں اونٹ کا گوشت کھانے سے وضو کروں؟ تو آپ صلی اللہ علیہ وسلم نے فرمایا کہ ہاں، اونٹ کا گوشت کھانے سے وضو کرو۔

أنتقل من لحوم الغنم؟ قال إن شئت فتوضأ وإن شئت فلا تتوضأ قال أنتقل من لحوم الإبل؟ قال نعم فتوضأ من لحوم الإبل (صحیح مسلم، کتاب الحيض، باب الوضوء من لحوم الإبل، حدیث نمبر: 360)

جامع ترمذی میں حضرت براء بن عازب رضی اللہ عنہ سے روایت ہے کہ رسول اللہ صلی اللہ علیہ وسلم سے اونٹ کے گوشت کے بارے میں پوچھا گیا تو آپ نے فرمایا کہ اس گوشت کھاؤ اور وضو کرو، اور جب آپ سے بکری کے گوشت کے بارے میں پوچھا گیا تو آپ نے فرمایا کہ اس کا گوشت کھاؤ لیکن وضو نہ کرو۔

سئل رسول الله صلى الله عليه وسلم عن لحوم الإبل فقال توضؤوا منها وسئل عن لحوم الغنم فقال لا تتوضؤوا منها (جامع ترمذی، کتاب الطهارة، حدیث نمبر: 81)

میت کو غسل دینے اور جنازہ اٹھانے کے بعد غسل و وضو کا حکم:
میت کے ساتھ تعلق اور تدفین کے مراحل میں شرعی احکام کو ملحوظ رکھنا ضروری ہے۔ اس ضمن میں غسل دینے والے کے لیے غسل اور جنازہ اٹھانے والے کے لیے وضو کی روایت بڑی واضح ہے۔
جامع ترمذی اور سنن ابی داود میں حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا کہ جو شخص میت کو غسل دے وہ غسل کرے اور جو شخص اسے اٹھائے وہ وضو کرے۔

من غسل ميتا فليغتسل ومن حمله فليتوضأ (جامع ترمذی، کتاب الجنائز، حدیث نمبر: 993؛ سنن ابی داود، کتاب الجنائز، حدیث نمبر: 3161)

اس حدیث مبارکہ کی روشنی میں غسل دینے والے کے لیے غسل کرنا مستحب یا تاکیدی حکم ہے، جبکہ جنازہ اٹھانے والے یا کندھا دینے والے کے لیے وضو کا حکم دیا گیا ہے تاکہ طہارت کی حالت برقرار رہے۔

سونے کی حالت اور وضو ٹوٹنے کی تفصیلی تحقیق
سونے کی ہر حالت سے وضو نہیں ٹوٹتا بلکہ اس کی کیفیت کا اعتبار ہے۔ اگر کوئی شخص بیٹھ کر اس طرح سویا ہے کہ اس کے پٹھے مضبوط ہیں اور وہ اپنی نشست پر پوری طرح متوازن ہے، خواہ وہ دیوار یا کسی چیز سے ٹیک لگائے ہوئے ہو لیکن اگر اس کا وہ سہارے ہٹا لیا جائے تو وہ گر نہ پڑے اور اس کے جوڑ ڈھیلے نہ ہوں، تو اس کی اونگ یا ایسی ہلکی نیند سے وضو نہیں ٹوٹتا۔ اس کی دلیل صحیح مسلم میں حضرت انس بن مالک رضی اللہ عنہ کی روایت ہے کہ صحابہ کرام رضوان اللہ علیہم اجمعین اس حالت میں انتظار کرتے ہوئے سو جاتے تھے کہ ان کے سر ہلتے تھے پھر وہ بغیر نئے سرے سے وضو کیے نماز پڑھ لیتے تھے۔

کان أصحاب رسول الله صلى الله عليه وسلم ينامون ثم يصلون ولا يتوضؤون (صحیح مسلم، کتاب الحيض، باب الوضوء من غير حدث، حدیث نمبر: 376)

اس کے برعکس، اگر کوئی شخص لیٹا ہوا ہے، یا پہلو کے بل سویا ہے، یا اس طرح بیٹھ کر یا ٹیک لگا کر گہری نیند میں سو گیا ہے کہ اگر اس کے نیچے سے تکیہ یا سہارا ہٹا لیا جائے تو وہ گر جائے گا یا اس کا ہوش و حواس سے غافل ہو جانا اس حد تک ہو کہ ہوا کے خارج ہونے کا احساس باقی نہ رہے، تو اس کا وضو قطعاً ٹوٹ جاتا ہے۔
سنن ابی داود میں حضرت علی بن ابی طالب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ آنکھیں پیچھے کا بندھن ہیں، لہٰذا جو سو جائے وہ وضو کرے۔

العين وكاء السه فمن نام فليتوضأ (سنن ابی داود، کتاب الطهارة، حدیث نمبر: 203)

محدثین اور فقہاء کی تحقیق کے مطابق اس حدیث میں اس نیند کو مراد لیا گیا ہے جس میں انسان اپنے جسم پر قابو نہ رکھ سکے اور غفلت طاری ہو جائے۔

تسبیح، اذکار، تلاوت، مصحف کو ہاتھ لگانا اور دیگر کتب کے احکام:
عبادت اور تلاوت کے لیے طہارت کے احکام میں درج ذیل تفصیلی ضابطے ملحوظ رکھنا ضروری ہیں:
تسبیح، درود پاک، استغفار اور دیگر تمام اذکار کے لیے وضو کا ہونا ہرگز ضروری نہیں ہے۔ انسان باوضو ہو یا بے وضو، چلتے پھرتے، لیٹتے بیٹھتے زبان سے اللہ کا ذکر اور تسبیح کر سکتا ہے۔

قرآن مجید کو زبانی پڑھنے کے لیے، یا دیکھ کر پڑھنے کے لیے وضو کا ہونا شرط نہیں ہے، یعنی بغیر وضو کے زبانی یا دیکھ کر قرآن مجید پڑھا جا سکتا ہے اور اسے بغیر غلاف کے اٹھایا بھی جا سکتا ہے۔

جہاں تک قرآن مجید کے خط یا مصحف کو براہِ راست ہاتھ لگانے کا تعلق ہے، تو اس پر قرآن مجید کی صریح آیت
لا يمسه إلا المطهرون (سورۃ الواقعہ، آیت نمبر: 79) کی روشنی میں یہ واضح ہوتا ہے کہ طاہر ہونے سے مراد یہ ہے کہ انسان پر غسل واجب نہ ہو، یعنی جنبی، حائضہ یا نفاس والی عورت کے لیے مصحف کو ہاتھ لگانا ناجائز و حرام ہے، اور جس پر غسل واجب نہ ہو (خواہ وہ بے وضو ہی کیوں نہ ہو) وہ فقہی تحقیق کے مطابق مصحف کو ہاتھ لگا سکتا ہے، البتہ عام بے وضو شخص کے لیے احتیاط اور تعظیم کا تقاضا یہ ہے کہ وہ وضو کر کے ہاتھ لگائے۔

علماء کی تحقیق کے مطابق باوضو ہو کر قرآن مجید کی تلاوت کرنے کا اجر و ثواب بے وضو تلاوت کرنے کی نسبت زیادہ ہوتا ہے کیونکہ باوضو ہونا تعظیمی طہارت اور کامل ادب کا مظہر ہے۔
دیگر مذہبی کتب، اردو تراجم اور تفاسیر کا حکم یہ ہے کہ چونکہ ان میں قرآنی متن کے ساتھ دوسری زبان کا ترجمہ اور تشریح و تفسیر شامل ہوتی ہے اور تالیف کا غلبہ ہوتا ہے، اس لیے بے وضو شخص یا وہ شخص جس پر غسل فرض ہو، ان کتب، تراجم اور تفاسیر کو ہاتھ لگا سکتا ہے، اٹھا سکتا ہے اور پڑھ سکتا ہے اور ان پر خالص مصحف والا سخت حکم لاگو نہیں ہوتا۔

دیگر اہم عوامل جن سے وضو ٹوٹ جاتا ہے:
بدن کے کسی حصے سے خون، پیپ یا زرد پانی کا نکل کر بہہ جانا بشرطیکہ وہ زخم یا جگہ سے نکل کر ایسی جگہ بہہ جائے جہاں پاکی کا حکم لاگو ہوتا ہے۔
منہ بھر کر قے آنا، خواہ وہ کھانے کی ہو یا خون کی یا پیپ کی۔
بے ہوشی، جنون، غشی یا نشے کی حالت طاری ہونا۔
نماز کے اندر قہقہہ لگا کر ہنسنا (یہ صرف نماز میں وضو کو باطل کرتا ہے)۔

خلاصہ کلام:
عبادت کی قبولیت اور طہارت کی روح کو برقرار رکھنے کے لیے ضروری ہے کہ ہم شریعت کے ان باریک احکام کو بھی سیکھیں اور اپنی روزمرہ زندگی میں نافذ کریں جن پر عام طور پر توجہ نہیں دی جاتی۔ شک کی بنیاد پر وضو نہ ٹوٹنا، شرمگاہ کو بلا حائل چھونا، اونٹ کا گوشت کھانا، میت کو غسل دینے یا اٹھانے کے بعد احادیث کے مطابق وضو یا غسل کا اہتمام کرنا، سونے کی درست کیفیت کو سمجھنا، اور مصحف کے آداب کو ملحوظ رکھنا ہماری روحانی طہارت کو مکمل کرتا ہے۔

الدعاء:
اللہ تعالیٰ ہمیں دین کی صحیح سمجھ اور اس پر کھرے اترنے کی توفیق عطا فرمائے۔

آمین یا رب العالمین

وما علینا الا البلاغ المبین

تحقیق و تحریر:
انجینیئر نذیر ملک سرگودھا
سیل فون: 00923008604333
ویب سائٹ: www.nazirmalik.com