*سنت تحیۃ المسجد، اذان و اقامت کی دعائیں، اور اسلاف کا شیوہ: ایک مکمل رہنمائی* پیر 09 نومبر 2026ء تحقیق و تحریر: انجینیئر نذیر ملک سرگودھا

*سنت تحیۃ المسجد، اذان و اقامت کی دعائیں، اور اسلاف کا شیوہ: ایک مکمل رہنمائی*

پیر 09 نومبر 2026ء
تحقیق و تحریر:
انجینیئر نذیر ملک سرگودھا

مسجد محض چار دیواری کا نام نہیں ہے، بلکہ یہ ربِ کائنات کا گھر اور زمین پر اس کا سب سے محبوب مقام ہے۔ جب کوئی بندہ اللہ کے گھر میں قدم رکھتا ہے، تو اس مبارک جگہ کا بھی بندے پر ایک حق عائد ہوتا ہے۔ اسی حق کو ادا کرنے کے لیے شریعتِ مطہرہ نے ایک انتہائی پیاری اور بابرکت سنت عطا کی ہے جسے “سنتِ تحیۃالمسجد” (مسجد کا تحفہ یا احترام) کہا جاتا ہے۔

سلفِ صالحین کا احتیاطی عمل:
فقہ اور سنت کے اصولوں کے مطابق، تحیۃ المسجد کا تعلق مسجد میں داخل ہونے کے بعد “بیٹھنے” سے ہے۔ اگر کوئی شخص مسجد میں بیٹھ جائے تو وہ سنت فوت ہو جاتی ہے۔ یہی وہ باریکی تھی جسے سلفِ صالحین اور اولیاءِ عظام نے اپنی زندگیوں کا معمول بنایا۔

جیسا کہ برصغیر کی جلیل القدر روحانی شخصیت حضرت خواجہ قمر الدین سیالوی رحمہ اللہ کے بارے میں ان کے مقربین کا مشاہدہ ہے کہ وہ مغرب کی اذان کے وقت جب مسجد میں تشریف لاتے، تو بیٹھنے سے گریز کرتے تھے۔ وہ دیواروں پر درج قرآنی آیات، احادیث یا تعلیمی اشتہارات کو دیکھ کر وقت گزارتے، بیٹھتے نہیں تھے، یہاں تک کہ اذان کا جواب دے کر براہِ راست مصلے پر آ جاتے اور امامت فرماتے تھے۔ عام لوگوں کو یہ عمل بظاہر عجیب لگتا تھا، لیکن حقیقت میں یہ سنتِ تحیۃ المسجد کے تقاضوں کو نبھانے کا ایک کمال اور محتاط طریقہ تھا تاکہ مسجد میں بیٹھ کر وہ سنت قضا نہ ہو جائے۔

خطبے کے دوران تحیۃ المسجد کی سخت تاکید:

اس سنت کی تاکید کا اندازہ اس عظیم واقعے سے لگایا جا سکتا ہے جو صحیح احادیث میں موجود ہے۔ ایک دفعہ رسول کریم صلی اللہ علیہ وسلم جمعہ کا خطبہ ارشاد فرما رہے تھے کہ اتنے میں حضرت سُلیک غطفانی رضی اللہ عنہ مسجد میں تشریف لائے اور بغیر نماز پڑھے بیٹھ گئے۔ حضور نبی کریم صلی اللہ علیہ وسلم نے اپنا خطبہ روک دیا اور استفسار فرمایا: “اے فلاں! کیا تم نے مسجد میں آتے ہی دو رکعت نماز پڑھی ہے؟” انہوں نے عرض کیا: “یا رسول اللہ! نہیں پڑھی۔” تو آپ ﷺ نے ارشاد فرمایا: “اٹھو اور دو رکعت تحیۃ المسجد پڑھو!”

ذرا غور کیجیے! سرکارِ دو عالم ﷺ نے حالتِ خطبہ میں حکم جاری فرمایا کہ خطبہ سننا بعد میں ہے، پہلے مسجد کا حق ادا کرو اور دو رکعت پڑھو۔ اتنی سخت تاکید اور اہتمام کے باوجود، ہمارے ہاں المیہ یہ ہے کہ مساجد میں اس سنت پر کوئی خاص عمل نظر نہیں آتا، اور عام لوگ تو کیا، اکثر علماء بھی اس کی تلقین کرنے سے غفلت برتتے ہیں۔

حرمین شریفین کا معمول اور سنتِ مؤکدہ:
اس سنت کی عظمت کا اندازہ اس بات سے لگایا جا سکتا ہے کہ یہ رسول اللہ صلی اللہ علیہ وسلم کے دور میں اور آج تک حرمین شریفین (مکہ مکرمہ اور مدینہ منورہ) کے عربوں کے ہاں اس قدر مقبول اور معمول ہے کہ مغرب کی فرض نماز سے پہلے بھی (جب عام نفل مکروہ ہوتے ہیں) حرمین میں آنے والے لوگ دو رکعت تحیۃ المسجد کا اہتمام لازمی کرتے ہیں۔

ام المؤمنین حضرت عائشہ صدیقہ رضی اللہ عنہا فرماتی ہیں کہ میں نے رسول اللہ صلی اللہ علیہ وسلم کو پوری زندگی کبھی نہیں دیکھا کہ آپ نے مغرب سے پہلے کی یہ سنتیں (یا تحیۃ المسجد کا اہتمام) کبھی چھوڑی ہوں۔ افسوس کہ ہمارے ہاں پاکستان میں اس سنت کو عام طور پر بالکل چھوڑ دیا گیا ہے، حالانکہ یہ مسجد کا بنیادی حق ہے۔

اذان اور اقامت کے درمیان دعا کی قبولیت کی گھڑی:

جب کوئی شخص مسجد میں آ کر سنتِ تحیۃ المسجد ادا کر لیتا ہے، تو اس کے بعد اذان اور اقامت کے درمیان کا جو وقفہ ہوتا ہے، وہ عام وقت نہیں بلکہ قبولیتِ دعا کا سب سے بڑا سنہری موقع ہے۔
پیارے پیغمبر حضرت محمد مصطفیٰ صلی اللہ علیہ وسلم نے انتہائی یقین کے ساتھ نوید سنائی ہے کہ:
“الدُّعَاءُ لَا يُرَدُّ بَيْنَ الْأَذَانِ وَالْإِقَامَةِ” (اذان اور اقامت کے درمیان کی جانے والی دعا رد نہیں کی جاتی)۔
[رواہ ترمذی و ابو داؤد]

قرآن مجید میں بھی اللہ تعالی کا ارشاد ہے:
“وَقَالَ رَبُّكُمُ ادْعُونِي أَسْتَجِبْ لَكُمْ” (اور تمہارے رب نے فرمایا ہے کہ مجھ سے دعا کرو، میں تمہاری دعا قبول کروں گا۔)

ہمارا المیہ اور غفلت:
اس قیمتی ترین گھڑی میں ہمارے اکثر احباب کا عالم یہ ہوتا ہے کہ ان کی نظریں بار بار گھڑی پر لگی ہوتی ہیں کہ جماعت میں کتنے منٹ رہ گئے ہیں، امام صاحب کب آئیں گے، یا کون آیا۔ یہ سب فضول کی الجھنیں ہیں! وقت پر نماز کا پڑھنا ہی اصل کامیابی ہے، اور وقت گزرنے کے بعد نماز تو ادا ہو جائے گی لیکن وہ خشوع، خضوع اور اس کا حسن باقی نہیں رہتا۔

سب سے بڑا لالچ اور ضمانت:
انسان دنیا میں کسی نفع یا لالچ کے بغیر کوئی کام نہیں کرتا۔ تو کیا اس سے بڑا کوئی لالچ ہو سکتا ہے کہ آپ کو دونوں جہان کی ہر مراد پانے کی گارنٹی خود محمد رسول اللہ صلی اللہ علیہ وسلم دے رہے ہوں؟
یہ کوئی معمولی وعدہ نہیں ہے؛ آسمان کے دروازے اس وقت کھلے ہوتے ہیں، اور آقا ﷺ کی زبانِ مبارک کی ضمانت پر مانگی گئی ہر دعا شرفِ قبولیت حاصل کرتی ہے۔

آئیے! آج ہی سے پختہ عزم کریں کہ مسجد میں داخل ہو کر بیٹھنے سے پہلے سنتِ تحیۃ المسجد ادا کرنے کی سنت کو زندہ کریں گے—چاہے وہ عام دن ہوں یا جمعہ کا خطبہ یا مغرب سے پہلے کا وقت—اور اذان و اقامت کے درمیانی قیمتی وقفے کو گھڑیاں دیکھنے کے بجائے اپنے رب کے حضور ہاتھ پھیلا کر دونوں جہان کی کامیابی مانگنے میں صرف کریں گے۔ یہی وہ راستہ ہے جو انسان کو دنیا و آخرت کی فلاح سے سرفراز کرتا ہے۔

آمین یا رب العالمین

وما علینا الا البلاغ المبین

تحقیق و تحریر:
انجینیئر نذیر ملک سرگودھا
Please visit us at www.nazirmalik.com Cell 0092300860 4333