*اسلام میں داڑھی کی شرعی حیثیت اور اس کا حکم*
پیر 27 جولائی 2026
تحقیق و تحریر:
انجینیئر نذیر ملک سرگودھا
اسلامی شریعت میں داڑھی مرد کی دینی اور ایمانی پہچان ہے اور اس کو رکھنا شعارِ اسلام میں شمار ہوتا ہے۔ قرآن و سنت کی روشنی میں امت کے تمام فقہاء اور علماء اس بات پر متفق ہیں کہ داڑھی رکھنا مردوں کے لیے واجب اور ضروری ہے، جبکہ اس کو منڈوانا، صاف کروانا یا اس حد تک تراشنا کہ وہ شرعی مقدار سے کم ہو جائے، شرعاً حرام اور ناجائز ہے۔
قرآن مجید میں اللہ تعالیٰ کا ارشاد ہے کہ اے ایمان والو اسلام میں پورے کے پورے داخل ہو جاؤ۔ دینِ اسلام ایک کامل نظام حیات ہے جس میں رسول اللہ صلی اللہ علیہ وسلم کی کامل اتباع اور اطاعت کا حکم دیا گیا ہے۔ قرآن مجید کا یہ بھی واضح فیصلہ ہے کہ جو کچھ رسول تمہیں دیں اسے لے لو اور جس سے منع فرمائیں اس سے رک جاؤ۔ اس بنا پر کسی بھی مسلمان کے لیے جائز نہیں کہ وہ رسول اللہ صلی اللہ علیہ وسلم کے صریح حکم یا سنت کی مخالفت کرے۔
داڑھی کے بارے میں رسول اللہ صلی اللہ علیہ وسلم کے صریح احادیث میں واضح احکامات موجود ہیں۔ احادیث مبارکہ میں آپ صلی اللہ علیہ وسلم نے فرمایا کہ مشرکوں کی مخالفت کرو، مونچھیں چھوٹی کرو اور داڑھیوں کو معاف کر دو یعنی انہیں بڑھاؤ۔ ایک اور مقام پر داڑھی کو فطرتِ انسانی کا حصہ قرار دیا گیا ہے۔ انبیاء کرام علیہم السلام کی تاریخ پر نظر ڈالی جائے تو معلوم ہوتا ہے کہ داڑھی تمام انبیاء کی مشترکہ سنت رہی ہے، جیسا کہ سورۃ طٰہٰ میں حضرت ہارون علیہ السلام کا ذکر موجود ہے۔
داڑھی کے تراشنے اور منڈوانے کے حوالے سے شرعی حکم بالکل واضح ہے۔ رسول اللہ صلی اللہ علیہ وسلم کی احادیث میں لفظ اعفاء یعنی داڑھی کو اپنے حال پر چھوڑ دینے کا صریح حکم آیا ہے۔ آپ صلی اللہ علیہ وسلم سے صراحۃً داڑھی کاٹنا یا منڈوانا ثابت نہیں۔ اس لیے داڑھی منڈوانا یا اس کو کٹوا کر خلافِ سنت شکل بنانا شریعت کے احکام سے انحراف کے مترادف ہے اور گناہِ کبیرہ میں شمار ہوتا ہے۔
خلاصہ کلام یہ ہے کہ داڑھی صرف ایک روایتی یا ثانوی چیز نہیں بلکہ رسول اللہ صلی اللہ علیہ وسلم کا مؤکد حکم اور واجب شرعی فریضہ ہے۔ ہر مسلمان مرد پر لازم ہے کہ وہ سنتِ رسول کی پیروی کرتے ہوئے داڑھی رکھے اور اس کو منڈوانے یا تراشنے کے عمل سے مکمل پرہیز کرے کیونکہ سنتِ نبوی کی اطاعت ہی کامیابی اور نجات کا واحد ذریعہ ہے۔
وما علینا الا البلاغ المبین
تحقیق و تحریر:
انجینیئر نذیر ملک سرگودھا
Please visit us at www.nazirmalik.com Cell 00923008604333
