سکھر بیورو چیف سید نصیر حسین زیدی دعا ان لاین نیوز .تاریخ: 30 جنوری 2026 سکھر: غزہ پر امریکی و سامراجی سازشوں اور
سکھر بیورو چیف سید نصیر حسین زیدی دعا ان لاین نیوز
.تاریخ: 30 جنوری 2026
سکھر: غزہ پر امریکی و سامراجی سازشوں اور پاکستان کی مبینہ شمولیت کے خلاف مجلس وحدت مسلمین کا بھرپور احتجاج
سکھر (نیوز ڈیسک): مجلس وحدت مسلمین ضلع سکھر کے زیر اہتمام، غزہ کے حوالے سے جاری امریکی “بورڈ آف پیس” اور سامراجی منصوبوں کے خلاف احتجاجی ریلی نکالی گئی۔ مظاہرے کا مقصد فلسطینیوں سے یکجہتی اور رہبرِ مسلمینِ جہاں آیت اللہ العظمیٰ سید علی خامنہ ای (حفظہ اللہ) کے ساتھ تجدیدِ عہد کرنا تھا۔
نمازِ جمعہ کے فوراً بعد جامع حیدری مسجد پرانہ سکھر سے ایک احتجاجی ریلی نکالی گئی جو اپنے مقررہ راستوں سے ہوتی ہوئی “جیل چورنگی” پر اختتام پذیر ہوئی۔ ریلی میں مظاہرین نے بڑی تعداد میں شرکت کی، جن کے ہاتھوں میں بینرز تھے جن پر امریکہ، اسرائیل اور سامراجی قوتوں کے خلاف نعرے درج تھے۔
ضلعی صدر محسن سجاد اتراء ایڈووکیٹ، جرنل سیکریٹری احسان علی شر ایڈووکیٹ، صوبائی صدر وحدت ایمپلائز ونگ کاشف شاھ نقوی، ڈویژنل صدر وحدت یوتھ ونگ زوہیب کلور ودیگر نے خطاب کرتے ہوئے درج ذیل اہم نکات پر زور دیا اور واضح کیا کہ غزہ کے لیے نام نہاد امریکی امن منصوبے فلسطینیوں کی نسل کشی پر پردہ ڈالنے کی ایک ناکام کوشش ہیں۔
ریلی کے شرکاء نے پاکستان کی ان منصوبوں میں کسی بھی قسم کی ممکنہ شمولیت یا خاموشی پر کڑی تنقید کی اور مطالبہ کیا کہ حکومتِ پاکستان واضح طور پر مظلوم فلسطینیوں کے حق میں کھڑی ہو۔
شرکاء نے رہبرِ مسلمینِ جہاں کی بصیرت کو سراہتے ہوئے اس عزم کا اعادہ کیا کہ القدس کی آزادی اور مظلومینِ جہاں کی حمایت میں کوئی کسر نہیں چھوڑی جائے گی۔
ریلی میں لبیک یا اقصیٰ اور لبیک یا غزہ کے فلک شگاف نعرے لگائے گئے، اور عالمی ضمیر کو فلسطین میں جاری انسانی بحران کی جانب متوجہ کیا گیا۔
مجلس وحدت مسلمین ضلع سکھر کے رہنماؤں نے تمام شرکاء کا شکریہ ادا کرتے ہوئے کہا کہ سکھر کے عوام نے آج ثابت کر دیا ہے کہ وہ مظلوم فلسطینیوں کی پکار پر ہمہ وقت تیار ہیں۔ انہوں نے باور کرایا کہ جب تک فلسطین آزاد نہیں ہو جاتا، احتجاج کا یہ سلسلہ جاری رہے گا۔
جاری کردہ:
شعبہ نشر و اشاعت، مجلس وحدت مسلمین ضلع سکھر
