November 16, 2026

سندھ کے 40 فیصد ڈرائیور کمزور بینائی کے ساتھ گاڑی چلا رہے ہیں، انکشاف

20250709_195004

سندھ کے 40 فیصد ڈرائیور کمزور بینائی کے ساتھ گاڑی چلا رہے ہیں، انکشاف 1
حیدرآباد سے ایک اہم اور فکرانگیز خبر سامنے آئی ہے، جہاں سندھ حکومت نے سرکاری سطح پر ٹرک ڈرائیوروں کی بینائی کے معائنے کا سلسلہ شروع کر رکھا ہے۔

اس طبی اقدام کا مقصد سڑکوں پر حادثات کی شرح کم کرنا اور ٹریفک کا نظام محفوظ بنانا ہے۔ رپورٹ کے مطابق، اب تک ہزاروں ڈرائیوروں کی آنکھوں کا تفصیلی معائنہ کیا جا چکا ہے، اور نتائج نہایت تشویشناک ہیں۔

اے آر وائی نیوز کے نمائندے اشوک شرما کی رپورٹ کے مطابق سندھ میں تقریباً 40 فیصد ٹرک ڈرائیور نظر کی کمزوری کا شکار پائے گئے ہیں، جو سڑک پر گاڑی چلانے کے لیے واضح طور پر ایک بڑا خطرہ ہے۔ ان ڈرائیوروں کی اکثریت کو اپنی بینائی کے مسائل کا علم ہی نہیں ہوتا، یا وہ انہیں نظر انداز کرتے رہتے ہیں۔

محکمہ ٹرانسپورٹ، موٹر وے پولیس اور سندھ انسٹی ٹیوٹ آف اوپتھامولوجی کے باہمی تعاون سے نیشنل ہائی وے پر ایک خصوصی مرکز قائم کیا گیا ہے جہاں گاڑیوں کو روک کر ڈرائیورز کی آنکھوں کا معائنہ کیا جاتا ہے۔ رنگوں کی پہچان، بصری تیزی اور دیگر بینائی کے ٹیسٹ کیے جاتے ہیں، اور جس کی حالت زیادہ خراب ہو، اُسے فوری طور پر اسپتال ریفر کر دیا جاتا ہے۔

گزشتہ چھ ماہ میں 5 ہزار سے زائد ڈرائیورز کا معائنہ کیا گیا، جن میں سے 20 فیصد میں موتیا، کالا پانی اور دیگر سنگین بیماریوں کی تشخیص ہوئی، جب کہ 40 فیصد ڈرائیور ایسے نکلے جو گاڑی چلانے کے لیے بصری طور پر نااہل تھے۔

یہ اقدامات نہ صرف ڈرائیورز کی صحت کے لیے اہم ہیں بلکہ سڑک پر چلنے والے دیگر افراد کی حفاظت کو یقینی بنانے کے لیے بھی نہایت ضروری ہیں۔ سندھ حکومت کا یہ قدم یقیناً ایک مثالی اقدام ہے، جسے ملک بھر میں وسعت دینے کی اشد ضرورت ہے۔