کاشی چوہان -کراچی مائی کولاچی کا کراچی
کاشی چوہان -کراچی
مائی کولاچی کا کراچی
وہ ایک عورت تھی۔ حوصلے کی علامت، بقا کی نشانی۔ سمندر کے کنارے اپنے خاندان کے ساتھ بسنے والی وہ ماہی گیرن، جس نے کبھی نہیں سوچا تھا کہ اس کی چھوٹی سی بستی ایک دن پاکستان کی معاشی شہ رگ بن جائے گی۔ وہ مائی کولاچی تھی — وہ جس کے نام پر یہ شہر کبھی کولاچی کہلایا، آج کراچی ہے۔ مگر کیا یہ وہی کراچی ہے جس کا خواب مائی کولاچی نے دیکھا تھا؟
مائی کولاچی سمندر سے رزق نکالتی تھی، سمندر سے محبت کرتی تھی۔ مگر آج، اسی سمندر پر اربوں روپے کے منصوبے بنے، قبضے ہوئے، اور ساحل عوام سے چھین لیے گئے۔ مائی کولاچی کا کراچی اب کسی سردار، کسی جاگیردار یا کسی بلڈر کے رحم و کرم پر ہے۔
کبھی یہ شہر امن کی علامت تھا، آج خاردار تاروں، پولیس موبائلوں اور سیوریج کی بدبو سے پہچانا جاتا ہے۔
کبھی یہ شہر روشنیوں کا گہوارہ تھا، آج لوڈشیڈنگ کی تاریکی میں ڈوبا ہوا ہے۔
کبھی یہاں سے کاروبار کی خوشبو اٹھتی تھی، آج گندگی، سیاسی تعفن اور تعصب کی بو پھیلی ہوئی ہے۔
کاش مائی کولاچی زندہ ہوتی، اور دیکھتی کہ جس سرزمین پر اس نے بنیاد رکھی تھی، آج وہی زمین بے رحم ٹھیکیداروں کے ہتھے چڑھ چکی ہے۔ زمین بیچی جا رہی ہے، پانی چوری کیا جا رہا ہے، اور شہری حقوق سرعام نیلام ہو رہے ہیں۔
آج کراچی میں ایک طرف بلندو بالا ٹاورز ہیں، دوسری طرف کچرا کنڈیوں میں کھیلتے ننگ دھڑنگ بچے۔
ایک طرف ڈیفنس کی چمکتی سڑکیں ہیں، دوسری طرف لیاری، اورنگی، کورنگی کے کھنڈر بنے علاقے۔
ایک طرف مہنگی کیفے، دوسری طرف پانی کی بوند بوند کو ترستے غریب لوگ۔
مگر ہم سب خاموش ہیں۔ مائی کولاچی کے وارث، یعنی ہم کراچی والے، صرف شکایت کرتے ہیں۔ احتجاج کرتے ہیں تو فیس بُک پر، محبت جتاتے ہیں تو ٹوئٹر پر، لیکن جب بات میدان میں اترنے کی آتی ہے تو صرف تماشائی بن جاتے ہیں۔
مائی کولاچی کا کراچی بے بسی کی تصویر بن چکا ہے۔ مگر ابھی امید باقی ہے۔
اگر ہم سب مائی کولاچی کی طرح حوصلہ کریں،
اگر ہم اپنے شہر کو اپنائیں،
اگر ہم کرپشن، قبضہ اور نااہلی کے خلاف متحد ہوں،
تو یہ کراچی، ایک بار پھر وہی بن سکتا ہے — ایک ماں کی آغوش، ایک مزدور کی امید، ایک طالب علم کا خواب۔
کراچی صرف ایک شہر نہیں، یہ ایک تہذیب ہے، ایک طرزِ زندگی ہے۔ اور مائی کولاچی کا خواب آج بھی زندہ ہے، مگر اسے جگانے کی ضرورت ہے۔
اگر آج بھی ہم نے خود کو نہ بدلا، تو کل مائی کولاچی کا کراچی صرف تاریخ کی کتابوں میں رہ جائے گا، اور ہم صرف ایک گمشدہ شہر کے باشندے کہلائیں گے۔
یاد رکھیے:
کراچی ہمارا ہے، اور اسے بچانا بھی ہمارا فرض ہے۔
مائی کولاچی نے بنیاد رکھی، اب ہمیں اس کی بقا کی جنگ لڑنی ہے۔