پرانے لوگ، خزانے لوگ! ایک نسل جو وقت کے ساتھ رخصت ہو رہی ہے، مگر اپنے پیچھے زندگی کے انمول سبق چھوڑ رہی ہے از قلم: فیصل جنجوعہ
پرانے لوگ، خزانے لوگ!
ایک نسل جو وقت کے ساتھ رخصت ہو رہی ہے، مگر اپنے پیچھے زندگی کے انمول سبق چھوڑ رہی ہے
از قلم: فیصل جنجوعہ
پرانے لوگ واقعی خزانے ہوتے ہیں۔ ان کے پاس دولت کے انبار نہیں ہوتے، مگر تجربات کی دولت، رشتوں کی قدر، خلوص کی خوشبو، صبر کی طاقت اور زندگی کو سمجھنے کا وہ شعور ہوتا ہے جو آج کی جدید دنیا میں تیزی سے نایاب ہوتا جا رہا ہے۔ وہ لوگ جنہوں نے سادگی میں زندگی گزاری، محدود وسائل میں گھر بسائے، مشکل حالات میں رشتے نبھائے اور اپنی خواہشات قربان کرکے بچوں کا مستقبل سنوارا۔ ان کے لیے رشتے مفادات کا نام نہیں تھے، دوستی وقت گزاری نہیں تھی اور بزرگ گھر پر بوجھ نہیں بلکہ خاندان کی عزت اور رہنمائی کا مرکز ہوتے تھے۔ آج ہمارے پاس سہولتیں زیادہ ہیں، مگر سکون کم؛ رابطے زیادہ ہیں، مگر تعلقات کم؛ معلومات زیادہ ہیں، مگر حکمت و دانائی کی کمی ہے۔کبھی بزرگوں کی محفلیں گھروں کی رونق ہوا کرتی تھیں۔ دادا دادی اور نانا نانی کی کہانیاں بچوں کی تربیت کا ذریعہ بنتی تھیں۔ ان کی نصیحتوں میں زندگی کے تجربات چھپے ہوتے تھے اور ان کی خاموشی میں بھی ایک پیغام ہوتا تھا۔ آج ہم موبائل کی اسکرین پر گھنٹوں گزار دیتے ہیں، مگر اپنے بزرگوں کے پاس چند لمحے بیٹھنے کی فرصت نہیں نکالتے۔ مگر افسوس! ہم نے ترقی کے نام پر بہت کچھ حاصل کیا، لیکن کہیں نہ کہیں اپنی تہذیب، برداشت، خاندانی وابستگی اور بزرگوں کے احترام کو پیچھے چھوڑ دیا۔ بزرگ صرف عمر رسیدہ افراد نہیں ہوتے، وہ ہمارے ماضی کی زندہ تاریخ، ہماری روایات کے امین اور ہمارے مستقبل کے لیے تجربات کا سرمایہ ہوتے ہیں۔ ان کی ہر بات سے اتفاق ضروری نہیں، مگر ان کی عزت، خدمت اور احساس ہماری اخلاقی ذمہ داری ہے. یہ بھی حقیقت ہے کہ ہر پرانی بات درست اور ہر نئی سوچ غلط نہیں ہوتی۔ ہمیں بزرگوں کے تجربات سے سیکھتے ہوئے نئی نسل کی مثبت سوچ کو بھی جگہ دینی چاہیے۔ اصل دانش یہی ہے کہ تجربے اور جدت کے درمیان ایسا تعلق قائم کیا جائے جس سے خاندان اور معاشرہ مضبوط ہو۔ والدین اور بزرگوں کی قدر اس وقت کیجیے جب وہ آپ کے درمیان موجود ہیں۔ ان کے ساتھ بیٹھیں، ان کی بات سنیں، ان کی تنہائی کو محسوس کریں اور ان کی ضروریات کا خیال رکھیں۔ کیونکہ وقت گزرنے کے بعد تصویریں تو باقی رہ جاتی ہیں، مگر وہ آوازیں، دعائیں اور شفقت بھرا لمس واپس نہیں آتا۔ بزرگوں کی قدر کرنا صرف ہماری تہذیب نہیں، ہماری آنے والی نسلوں کی تربیت بھی ہے۔ آئیے! اپنے گھروں کو دوبارہ محبت، احترام اور خلوص کی آماج گاہ بنائیں۔ اپنے بچوں کو صرف کامیاب ہونا نہیں، رشتے نبھانا بھی سکھائیں۔ انہیں بتائیں کہ اصل امارت دولت سے نہیں، کردار سے پہچانی جاتی ہے۔کیونکہ حقیقت یہی ہے کہ پرانے لوگ واقعی خزانے ہوتے ہیں؛ ان کی قدر کرنے والے خوش نصیب اور انہیں کھونے کے بعد پچھتانے والے اکثر محروم رہ جاتے ہیں۔