November 16, 2026

آئینہ وقت تحریر: محمد حنیف شاہد ارائیں برائے اشاعت: دعا آن لائن نیوز قراردادیں، تقریریں اور بند کیمرے

20250504_143404

آئینہ وقت
تحریر: محمد حنیف شاہد ارائیں
برائے اشاعت: دعا آن لائن نیوز

قراردادیں، تقریریں اور بند کیمرے

قومی اسمبلی میں بھارت کے خلاف قرارداد پیش کی گئی۔ ایک جملہ—اور پورے ایوان میں گویا حب الوطنی کی لہر دوڑ گئی۔ مگر اسی لمحے جب اپوزیشن لیڈر عمر ایوب خان تقریر کے لیے اٹھے، پی ٹی وی پارلیمنٹ کی لائیو اسٹریم اچانک بند کر دی گئی۔ وہی سرکاری نشریاتی ادارہ جو قوم کو “جمہوریت کا تسلسل” دکھانے کا دعوے دار ہے، اس نے اپوزیشن کی آواز کو خاموش کر کے کس کو خوش کیا؟ دشمن کو یا اپنے غرور کو؟

یہ پہلا موقع نہیں کہ قومی یکجہتی کا دعویٰ کیا گیا ہو، اور اسی سانس میں اختلاف رائے کو دیوار سے لگا دیا گیا ہو۔ بھارت کی مذمت میں قرارداد بلاشبہ ایک مضبوط پیغام تھا، مگر کیا یہ پیغام تب ہی مؤثر ہوتا جب پوری قوم کو دکھایا جاتا کہ حکومت اور اپوزیشن دونوں ایک صفحے پر کھڑے ہیں؟ کیا عمر ایوب کی تقریر بھارت کے خلاف نہ تھی؟ یا صرف اس لیے نشر نہ ہوئی کہ وہ اپوزیشن میں ہیں؟

قومی یکجہتی کا مطلب صرف ایک جیسی قراردادیں منظور کرنا نہیں، بلکہ اختلافات کے باوجود مل بیٹھ کر دشمن کو جواب دینا ہے۔ بھارت کو منہ توڑ جواب صرف قراردادوں سے نہیں، بلکہ قومی وحدت اور شفاف جمہوریت سے دیا جا سکتا ہے۔ اگر ہم اپنی ہی منتخب اپوزیشن لیڈر کی تقریر چھپاتے ہیں، تو دشمن کو کیا پیغام جاتا ہے؟

قوم جانتی ہے کہ وطن کے مفاد میں ہر آواز قیمتی ہے۔ وقت آ گیا ہے کہ ہم حب الوطنی کو سیاسی وابستگی سے الگ کریں، ورنہ تاریخ نہ قراردادیں یاد رکھے گی، نہ بند کیمرے۔