آئینہ وقت تحریر: محمد حنیف شاہد ارائیں پیکا ایکٹ اور اظہارِ رائے: 23 ایف آئی آرز ایک دن میں، سوالات کئی
آئینہ وقت
تحریر: محمد حنیف شاہد ارائیں
پیکا ایکٹ اور اظہارِ رائے: 23 ایف آئی آرز ایک دن میں، سوالات کئی
پاکستان میں اظہارِ رائے کی آزادی کا مسئلہ ایک عرصے سے زیرِ بحث ہے، مگر حالیہ دنوں میں لاہور پولیس کی جانب سے پریوینشن آف الیکٹرانک کرائمز ایکٹ (PECA) کے تحت ایک ہی دن میں 23 مقدمات درج کیے جانے کی خبر نے آزادیٔ اظہار کے منظرنامے پر ایک نیا سوالیہ نشان ثبت کر دیا ہے۔
ذرائع کے مطابق یہ مقدمات مبینہ طور پر اعلیٰ فوجی عہدیداروں اور وزیراعلیٰ پنجاب مریم نواز کے خلاف “نفرت انگیز مواد” پھیلانے کے الزام میں درج کیے گئے۔ لیکن حیران کن امر یہ ہے کہ ان میں سے 12 ایف آئی آرز کی تحریر حرف بہ حرف ایک جیسی ہے۔ کیا یہ صرف اتفاق ہے یا کسی منظم طرزِ عمل کی عکاسی؟
ایف آئی آر کی یکسانیت سے یہ تاثر ابھرتا ہے کہ قانون کا استعمال اندھا دھند، بغیر مکمل چھان بین کے کیا گیا۔ انصاف کی بنیادی شرط غیرجانبداری اور انفرادیت پر مبنی تحقیق ہے، نہ کہ ایک ہی سانچے میں ڈھلے ہوئے مقدمات۔
پیکا ایکٹ کا مقصد سائبر کرائمز کی روک تھام ہے، مگر پچھلے چند سالوں میں اس قانون کا استعمال اکثر سیاسی کارکنوں، صحافیوں اور اختلافِ رائے رکھنے والوں کے خلاف ہوتے دیکھا گیا ہے۔ اب سوال یہ ہے کہ آیا موجودہ مقدمات بھی اسی روش کا تسلسل ہیں؟
اگر واقعی نفرت انگیز مواد پھیلایا گیا ہے تو قانون اپنا راستہ لے، لیکن اگر اس قانون کو محض طاقتوروں کے خلاف تنقید کو دبانے کے لیے استعمال کیا جا رہا ہے تو یہ رویہ آئین کے آرٹیکل 19 کی کھلی خلاف ورزی ہے، جو شہریوں کو اظہارِ رائے کی آزادی دیتا ہے۔