ٹھٹھی کالک بھن جوڑا کلاں میں سالانہ سپورٹس میلہ کا انعقاد خصوصی تحریر: راجہ نورالٰہی عاطف
ٹھٹھی کالک بھن جوڑا کلاں میں سالانہ سپورٹس میلہ کا انعقاد
خصوصی تحریر: راجہ نورالٰہی عاطف
ضلع خوشاب کے علاقے ٹھٹھی کالک بھن، جوڑا کلاں میں سالانہ سپورٹس میلے کا انعقاد کیا گیا، جس میں روایتی کھیل لمبی کھیڈ پڑ کوڈی کا شاندار اور سنسنی خیز مقابلہ خصوصی توجہ کا مرکز بنا۔ کھیل کے میدان میں نوجوان کھلاڑیوں نے اپنی بھرپور صلاحیتوں کا مظاہرہ کرتے ہوئے شائقین سے خوب داد و تحسین حاصل کی، جبکہ میلے میں ضلع خوشاب اور ضلع سرگودھا سے آنے والے کھیلوں کے شائقین کی بڑی تعداد نے شرکت کرکے اس روایتی ایونٹ کی رونق کو دوبالا کر دیا۔
سپورٹس میلے میں سیاسی و سماجی شخصیات ملک محمد عمران جوڑا اور ملک محمد رمضان جوڑا نے خصوصی شرکت کی۔ ایونٹ انتظامیہ کی جانب سے معزز مہمانوں کا پرتپاک استقبال کیا گیا۔ مہمانوں کی آمد سے کھلاڑیوں اور شائقین میں بھی جوش و خروش پیدا ہوا اور کھیل کا ماحول مزید پُرجوش ہوگیا۔
اس روایتی سپورٹس میلے کا اہتمام معروف شخصیات زوار ملک ظفر حیات جوڑا اور ملک محمد عباس شیر جوڑا نے کیا۔ انتظامی امور کی ذمہ داری ملک غلام عباس دلیال نے بخوبی نبھائی، جبکہ مقابلوں میں شفاف اور منصفانہ فیصلوں کے لیے ملک اظہر عباس جوڑا اور ملک فلک شیر جوڑا نے اہم کردار ادا کیا۔
لمبی کھیڈ پڑ کوڈی کے مقابلے میں شریک کھلاڑیوں نے بھرپور کھیل، مہارت، پھرتی اور بہترین ٹیم ورک کا مظاہرہ کیا۔ ہر مرحلے پر شائقین نے کھلاڑیوں کی حوصلہ افزائی کی اور بہترین کھیل پیش کرنے والوں کو بھرپور داد دی۔ اس موقع پر کھیل کا میدان تالیوں، نعروں اور شائقین کے جوش و خروش سے گونجتا رہا۔
مقابلے میں ملک محمد ارسلان شانی جوڑا اور ملک وجاہت علی جوڑا نے شاندار کارکردگی کا مظاہرہ کرتے ہوئے لمبی کھیڈ میں پہلی پوزیشن حاصل کی۔ کامیاب کھلاڑیوں اور دیگر پوزیشن ہولڈرز میں انتظامیہ کی جانب سے انعامات بھی تقسیم کیے گئے۔
یہ سپورٹس میلہ محض ایک کھیلوں کا مقابلہ نہیں بلکہ علاقے کی روایتی ثقافت، دیہی کھیلوں اور باہمی میل جول کو فروغ دینے کی ایک خوبصورت کوشش بھی تھا۔ ایسے روایتی کھیل نوجوان نسل کو صحت مند سرگرمیوں کی طرف راغب کرنے کے ساتھ ساتھ مقامی ثقافت اور کھیلوں کی قدیم روایات کو زندہ رکھنے میں بھی اہم کردار ادا کرتے ہیں۔ ٹھٹھی کالک بھن جوڑا کلاں میں منعقد ہونے والے اس سپورٹس میلے نے ثابت کیا کہ دیہی علاقوں میں آج بھی روایتی کھیلوں کے ساتھ عوام کی گہری وابستگی موجود ہے اور مناسب سرپرستی ملنے پر یہ کھیل مزید مقبولیت حاصل کرسکتے ہیں۔
