ایکسپو فیصل آباد 2026: سی ای او سمیڈا نادیہ جے سیٹھ کا دورہ۔
اس موقع پر انہوں نے ایس ایم ایز کی جدت اور کاروباری صلاحیتوں کو سراہا۔
لاہور(نمائندہ خصوصی)گلوبل ٹائمز میڈیا یورپ کے مطابق سمال اینڈ میڈیم انٹرپرائزز ڈویلپمنٹ اتھارٹی (SMEDA) کی چیف ایگزیکٹو آفیسر مس نادیہ جے سیٹھ نے ایکسپو فیصل آباد 2026 کا دورہ کیا، جہاں انہوں نے مختلف نمائشی اسٹالز کا معائنہ کیا، صنعتکاروں اور کاروباری شخصیات سے ملاقات کی اور پاکستانی ایس ایم ایز کی جانب سے پیش کی جانے والی جدت، معیاری مصنوعات اور کاروباری صلاحیتوں کو سراہا۔دورے کے دوران سی ای او سمیڈا نے نمائش میں شریک مختلف شعبوں کے نمائندوں سے تبادلہ خیال کیا اور چھوٹے و درمیانے درجے کے کاروباری اداروں کی جانب سے جدید مصنوعات، اختراعی آئیڈیاز اور مقامی صنعت کی ترقی کے لیے کی جانے والی کاوشوں میں گہری دلچسپی کا اظہار کیا۔
انہوں نے کہا کہ ایسے تجارتی میلوں اور نمائشوں سے کاروباری روابط کو فروغ ملتا ہے، نئی منڈیوں تک رسائی کے مواقع پیدا ہوتے ہیں اور ملکی ایس ایم ای سیکٹر کی ترقی میں اہم کردار ادا ہوتا ہے۔ان کے دورے نے اس عزم کا اعادہ کیا کہ سمیڈا ملک بھر میں چھوٹے اور درمیانے درجے کے کاروباری اداروں کو مضبوط بنانے، کاروباری ماحول کو فروغ دینے اور جدت پر مبنی معیشت کی تشکیل کے لیے اپنی معاونت جاری رکھے گی۔ایکسپو فیصل آباد 2026 میں صنعت، تجارت، برآمدات، جدت اور کاروباری مواقع کو اجاگر کرنے کے لیے مختلف شعبوں سے تعلق رکھنے والے اداروں اور کمپنیوں نے اپنی مصنوعات اور خدمات کی نمائش کی، جسے کاروباری برادری نے بھرپور پذیرائی دی۔
