ملک محمد حیات اعوان — مثبت صحافت کا باوقار استعارہ خصوصی تحریر: راجہ نورالٰہی عاطف

ملک محمد حیات اعوان — مثبت صحافت کا باوقار استعارہ

خصوصی تحریر: راجہ نورالٰہی عاطف

صحافت محض خبروں کی ترسیل کا نام نہیں بلکہ یہ ایک عظیم امانت، قومی ذمہ داری اور عوامی خدمت کا مقدس فریضہ ہے۔ اس شعبے میں وہی لوگ حقیقی کامیابی حاصل کرتے ہیں جو سچائی، دیانت، جرأتِ اظہار اور عوامی مفاد کو ہر ذاتی مفاد پر ترجیح دیتے ہیں۔ ضلع خوشاب کی صحافت میں اگر ایسی شخصیات کا ذکر کیا جائے تو ملک محمد حیات اعوان کا نام نہایت عزت، وقار اور احترام سے لیا جاتا ہے۔
ملک محمد حیات اعوان ضلع خوشاب کے گاؤں ڈھوکڑی کی معزز اعوان فیملی کے قابلِ فخر سپوت ہیں۔ بطور چیئرمین ڈسٹرکٹ پریس کلب جوہرآباد انہوں نے صحافت کو مثبت، تعمیری اور ذمہ دارانہ خطوط پر استوار کرنے کے لیے قابلِ قدر خدمات انجام دی ہیں۔ ان کی قیادت میں ڈسٹرکٹ پریس کلب جوہرآباد نہ صرف مزید فعال ہوا بلکہ صحافیوں کے وقار، اتحاد اور پیشہ ورانہ ترقی کے لیے بھی مؤثر اقدامات کیے گئے، جو ان کی مخلصانہ کاوشوں کا واضح ثبوت ہیں۔
ملک محمد حیات اعوان ایک نہایت باوقار، خوش اخلاق، خوش گفتار، بردبار، ملنسار، خوش لباس اور معاملہ فہم شخصیت کے مالک ہیں۔ ان کی گفتگو میں شائستگی، رویے میں انکساری اور کردار میں خلوص نمایاں نظر آتا ہے۔ یہی خوبیاں انہیں صحافتی برادری کے ساتھ ساتھ عوامی اور سماجی حلقوں میں بھی بے حد مقبول بناتی ہیں۔ وہ ہمیشہ دیانت، حق گوئی، جرأتِ اظہار اور ذمہ دارانہ صحافت کو اپنا شعار بنائے ہوئے ہیں، جس کے باعث انہیں ہر طبقۂ فکر میں عزت و احترام کی نگاہ سے دیکھا جاتا ہے۔
دوست نوازی اور تعلق نبھانے میں بھی ملک محمد حیات اعوان اپنی مثال آپ ہیں۔ وہ اپنے دوستوں کے لیے ہر مشکل گھڑی میں ڈھال بن کر کھڑے ہوتے ہیں۔ بے لوث عوامی خدمت ان کی شخصیت کا نمایاں وصف ہے۔ وہ نہ صرف مسائل کی نشاندہی کرتے ہیں بلکہ ان کے حل کے لیے متعلقہ اداروں تک عوام کی آواز بھی مؤثر انداز میں پہنچاتے ہیں۔
ضلع خوشاب کے سینئر صحافیوں میں ان کا شمار ایک معتبر اور بااعتماد نام کے طور پر ہوتا ہے۔ نامور صحافی اور ڈسٹرکٹ پریس کلب جوہرآباد کے صدر الطاف چغتائی مرحوم کے وہ معتمدِ خاص رہے۔ یہ تعلق صرف پیشہ ورانہ نہیں بلکہ اخلاص، اعتماد اور وفاداری کی ایک خوبصورت مثال تھا۔ آج بھی مرحوم الطاف چغتائی کے اہلِ خانہ خصوصاً ان کے صاحبزادے ملک محمد حیات اعوان کی اسی محبت، عزت اور خلوص کے ساتھ قدر کرتے ہیں، جو ان کے اعلیٰ کردار کی روشن دلیل ہے۔
ملک محمد حیات اعوان مختلف قومی اور علاقائی ٹی وی چینلز اور اخبارات کے ذریعے طویل عرصے سے صحافتی خدمات انجام دے رہے ہیں۔ انہوں نے ہمیشہ قومی امنگوں کی ترجمانی، عوامی مسائل کی نشاندہی اور معاشرتی اصلاح کو اپنی صحافت کا محور بنایا۔ ان کے قائم کردہ فاسٹ نیوز نیٹ ورک نے بروقت، مستند اور غیرجانبدار خبروں کی فراہمی میں ایک نمایاں مقام حاصل کیا ہے۔ اس پلیٹ فارم کے ذریعے وہ عوام اور حکومتی اداروں کے درمیان ایک مؤثر رابطے کا کردار ادا کر رہے ہیں، جس سے بے شمار عوامی مسائل اجاگر ہوئے اور ان کے حل کی راہ ہموار ہوئی۔
حقائق پر مبنی صحافت، متوازن اندازِ فکر، شائستہ طرزِ تحریر اور عوامی خدمت کا جذبہ ملک محمد حیات اعوان کی شناخت بن چکا ہے۔ انہوں نے ثابت کیا ہے کہ صحافت اگر دیانت، احساسِ ذمہ داری اور خدمتِ خلق کے جذبے کے ساتھ کی جائے تو یہ معاشرے میں مثبت تبدیلی کا مؤثر ذریعہ بن سکتی ہے۔
اللہ تعالیٰ سے دعا ہے کہ وہ ملک محمد حیات اعوان کو صحت، تندرستی، عزت، کامیابی اور درازیٔ عمر عطا فرمائے، انہیں ہمیشہ اپنی حفظ و امان میں رکھے اور انہیں اسی جذبۂ اخلاص کے ساتھ ضلع خوشاب کے عوام، صحافتی برادری اور ملک و قوم کی خدمت کی مزید توفیق عطا فرمائے۔
بلاشبہ ملک محمد حیات اعوان ان شخصیات میں شامل ہیں جن پر ضلع خوشاب کی صحافت بجا طور پر فخر کر سکتی ہے۔