ٺٽو (رپورٽ) دعا نیوز عبدالعزیز شیخ
سنڌ جي گورنر سيد محمد نهال هاشمي سجاول ضلعي جي جھوڪ شريف ۾ مرحوم لعل بخش جتوئي جي رهائشگاهه تي پهچي سندس وارثن سان تعزيت ڪئي، ڏک جو اظهار ڪيو ۽ فاتحه خواني ڪئي. ان موقعي تي وفاقي مملڪتي وزير کيل ڏاس ڪوھستاني پڻ ساڻس گڏ موجود هو.گورنر سنڌ چيو ته مرحوم لعل بخش جتوئي جي وفات قومي ۽ سماجي سطح تي وڏو نقصان آهي. هن چيو ته مرحوم پنهنجي سڄي زندگي عوامي خدمت لاءِ وقف ڪئي ۽ سندس سماجي خدمتن کي هميشه عزت ۽ احترام سان ياد رکيو ويندو. هن مرحوم جي مغفرت، بلند درجن ۽ وارثن لاءِ صبر جميل جي دعا پڻ ڪئي.بعد ۾ ميڊيا سان ڳالهائيندي گورنر سنڌ چيو ته سنڌ ۾ جاري مختلف شاهراهن جي تعمير ۽ بحالي لاءِ وفاقي حڪومت فنڊ فراهم ڪيا آهن، ۽ وفاق صوبي جي ترقي، عوامي ڀلائي ۽ بنيادي ڍانچي جي بهتري لاءِ پنهنجو سهڪار جاري رکندو.هڪ سوال جي جواب ۾ هن چيو ته زراعت، صحت ۽ تعليم آئيني طور صوبائي حڪومت جي دائري اختيار ۾ اچن ٿا، وفاق صوبن جي آئيني اختيارن جو احترام ڪري ٿو ۽ انهن جي معاملن ۾ مداخلت نٿو ڪري.ٻئي سوال جي جواب ۾ گورنر سنڌ چيو ته، “سنڌ هو، سنڌ آهي ۽ سنڌ هميشه قائم ۽ دائم رهندو.” هن وڌيڪ چيو ته اختيارن جي هيٺين سطح تائين منتقلي سان عوامي مسئلن جي حل، بهتر حڪمراني ۽ ترقياتي عمل ۾ وڌيڪ بهتري ايندي.پاڻي جي کوٽ بابت سوال تي گورنر سنڌ چيو ته سجاول ۾ پاڻي جي بحران جي حل لاءِ هو فوري طور لاڳاپيل اختيارين سان رابطو ڪندو، ۽ اميد آهي ته جلد پاڻي جي فراهمي جي صورتحال ۾ نمايان بهتري ايندي.
19
