جمالی بلوچاں (راجہ نورالہی عاطف سے)پی پی 83 سے بلا مقابلہ منتخب ہونے والے ممبر صوبائی اسمبلی سردار ظفر خان بلوچ نے کہا ہے کہ حلقہ کے عوام کی بے لوث محبتوں، اعتماد، عزت اور اپنائیت کا قرض کبھی نہیں اتار سکتا اور وہ ہمیشہ اپنے عوام کے شکر گزار رہیں گے۔ انہوں نے اس عزم کا اظہار اپنے ڈیرہ پر مختلف علاقوں سے آنے والے عوامی وفود سے خصوصی گفتگو کرتے ہوئے کیا۔
سردار ظفر خان بلوچ نے کہا کہ وہ عوامی اعتماد پر پورا اترنے کے لیے اپنی تمام تر صلاحیتیں بروئے کار لائیں گے۔ انہوں نے کہا کہ عوامی امنگوں کی ترجمانی، مسائل کے حل اور علاقہ کی تعمیر و ترقی کے لیے کسی قسم کی کوتاہی نہیں برتی جائے گی۔
انہوں نے کہا کہ ان کے خاندان کی سیاست کا محور ہمیشہ عوامی خدمت رہا ہے۔ ان کے آباؤ اجداد نے عوام کی فلاح و بہبود اور علاقائی ترقی کے لیے گراں قدر خدمات انجام دیں اور وہ سابق رکن قومی اسمبلی سردار شجاع محمد خان بلوچ مرحوم اور سابق رکن صوبائی اسمبلی سردار علی حسین خان بلوچ مرحوم کے عوامی خدمت کے مشن کو مزید آگے بڑھائیں گے۔
نو منتخب رکن صوبائی اسمبلی نے کہا کہ اجتماعی ترقی، بنیادی سہولیات کی فراہمی، نوجوانوں کے لیے بہتر مواقع اور عوامی فلاح و بہبود ان کی اولین ترجیحات میں شامل ہیں۔ انہوں نے کہا کہ ان کے دل اپنے حلقہ کے عوام کے ساتھ دھڑکتے ہیں اور وہ ہر وقت عوام کے دکھ سکھ میں شریک رہیں گے۔
اس موقع پر مختلف علاقوں سے آنے والے وفود نے سردار ظفر خان بلوچ کو بلا مقابلہ ممبر صوبائی اسمبلی منتخب ہونے پر مبارکباد پیش کی اور ان کے لیے نیک خواہشات کا اظہار کرتے ہوئے امید ظاہر کی کہ وہ علاقہ کی ترقی اور عوامی مسائل کے حل میں مؤثر کردار ادا کریں گے۔ سردار ظفر خان بلوچ نے تمام وفود کا شکریہ ادا کرتے ہوئے عوامی خدمت کے جذبے کے ساتھ اپنی ذمہ داریاں نبھانے کے عزم کا اعادہ کیا۔
10
