November 19, 2026

سعودیہ اور امارات پر ایرانی حملے جاری

IMG-20260322-WA0095

سعودیہ اور امارات پر ایرانی حملے جاری

سعودی عرب اور متحدہ عرب امارات نے اعلان کیا ہے کہ ایرانی میزائل اور ڈرون حملوں کا سلسلہ تاحال جاری ہے، جس کے نتیجے میں شہری اور فوجی جانی نقصان کے ساتھ املاک کو بھی شدید نقصان پہنچا ہے۔
سعودی وزارت دفاع نے آج صبح بتایا کہ سعودی فضائی دفاع نے ایک بیلسٹک میزائل کو کامیابی سے روکا جو سعودی سرزمین کی طرف بھیجا گیا تھا۔ وزارت نے مزید بتایا کہ تین بیلسٹک میزائلز کو ریاض کی جانب داغا گیا، جن میں سے ایک کو روکا گیا جبکہ باقی دو غیر آباد علاقوں میں گر گئے۔
وزارت دفاع کے ترجمان نے بتایا کہ مشرقی علاقے کے آسمان میں 10 ڈرونز کو ناکارہ بنایا گیا، جبکہ پچھلے ہفتے بھی مشرقی علاقے میں 5 ڈرونز تباہ کیے گئے۔ سعودی حکام نے ایران کے سفارتی عملے کے کچھ ارکان کو ملک چھوڑنے کی ہدایت کی ہے اور واضح کیا ہے کہ سعودی عرب اپنی سرزمین، سلامتی اور خودمختاری کے تحفظ کے لیے ہر ممکن اقدام کرے گا۔
متحدہ عرب امارات کی وزارت دفاع نے بھی تصدیق کی ہے کہ اس کے فضائی دفاع نے 3 میزائلز اور 8 ڈرونز کو ناکارہ بنایا۔ وزارت کے اعداد و شمار کے مطابق، ایران کی جانب سے اب تک امارات پر 341 بیلسٹک میزائلز، 15 کروز میزائلز اور 1748 ڈرون حملے کیے جا چکے ہیں۔ ان حملوں کے نتیجے میں 2 فوجی اہلکار ہلاک اور 6 شہری، جن میں پاکستانی، نیپالی، بنگلہ دیشی اور فلسطینی شہری شامل ہیں، جان سے گئے، جبکہ 160 افراد زخمی ہوئے، جن کی حالت معمولی سے لے کر شدید تک ہے۔
ایرانی دعوے کے مطابق یہ حملے امریکہ کے مفادات اور بیسز کو نشانہ بنا رہے ہیں جو خلیجی تعاون کونسل کی ریاستوں، عراق اور اردن میں موجود ہیں، تاہم بعض حملوں نے شہری علاقوں کو بھی نشانہ بنایا ہے، جس کے سبب املاک کو نقصان پہنچا اور جانی نقصان بھی ہوا۔ متاثرہ عرب ممالک نے ان حملوں کی شدید مذمت کی اور فوری روک تھام کا مطالبہ کیا ہے۔
ادھر ایران نے اسرائیل پر بھی میزائل اور ڈرون حملے جاری رکھے ہوئے ہیں، جن کے نتیجے میں کم از کم 16 افراد ہلاک اور سینکڑوں زخمی ہوئے، جبکہ 13 امریکی فوجی بھی مارے گئے ہیں۔