لاہور مین ہول واقعہ: تشدد کے الزام میں گرفتار پولیس افسران کا جسمانی ریمانڈ منظور ہو گیا
لاہور مین ہول واقعہ: تشدد کے الزام میں گرفتار پولیس افسران کا جسمانی ریمانڈ منظور ہو گیا
پولیس افسران نے انتہائی غیر پیشہ وارانہ انداز اپنایا، انکوائری رپورٹ آئی جی پنجاب کو پیش کر دی گئی۔ ذرائع
لاہور کے علاقے بھاٹی گیٹ میں مین ہول میں گر کر ماں بیٹی کے جاں بحق ہونے کے کیس میں اہم پیش رفت سامنے آ گئی ہے۔ عدالت نے مقدمے میں گرفتار پانچ ملزمان کو چار روزہ جسمانی ریمانڈ پر پولیس کے حوالے کرنے کی منظوری دے دی ہے تاکہ واقعے سے متعلق مزید تفتیش مکمل کی جا سکے۔
دوسری جانب، حادثے میں جاں بحق خاتون کے شوہر غلام مرتضیٰ کو مبینہ طور پر غیر قانونی حراست میں رکھنے اور اس پر تشدد کرنے کے معاملے پر پولیس کی اعلیٰ سطحی انٹرنل اکاؤنٹیبلٹی کمیٹی نے انکوائری مکمل کر لی ہے۔
انکوائری رپورٹ میں ایس پی سٹی بلال اور ایس ایچ او بھاٹی زین کو قصوروار قرار دیا گیا ہے۔
رپورٹ کے مطابق دونوں افسران نے اپنے بیانات میں تسلیم کیا کہ غلام مرتضیٰ کو افسران بالا کے حکم پر حراست میں لیا گیا اور اس پر ہلکا پھلکا تشدد بھی کیا گیا۔
افسران کا مؤقف تھا کہ ریسکیو اہلکاروں نے ابتدائی طور پر یہ رائے دی تھی کہ مذکورہ مقام پر خاتون کا ڈوبنا ممکن نہیں، جس کے بعد تشدد کیا گیا۔