November 17, 2026

صوبائی محتسب سندھ کے زیر اہتمام خواتین کو ہراسانی سے تحفظ پر آگاہی پروگرام

IMG-20260112-WA0254

صوبائی محتسب سندھ کے زیر اہتمام خواتین کو ہراسانی سے تحفظ پر آگاہی پروگرام

سکھر(بیورورپورٹ)صوبائی محتسب سندھ کے ریجنل آفس سکھر کی جانب سے خواتین کو نوکری کی جگہ پر ہراسانی سے تحفظ کے حوالے سے گورنمنٹ گرلز ہائر سیکنڈری اسکول، اولڈ سکھر میں ایک اہم آگاہی پروگرام منعقد کیا گیا، جس میں اساتذہ اور طالبات نے بڑی تعداد میں شرکت کی۔پروگرام کی قیادت صوبائی محتسب سکھر کے کنسلٹنٹ محمد اقبال آرائیں نے کی، جنہوں نے شرکاء کو خواتین کو نوکری کی جگہ پر ہراسانی سے تحفظ کے ایکٹ 2010ء کے حوالے سے تفصیلی بریفنگ دی۔ اپنے خطاب میں محمد اقبال آرائیں نے کہا کہ ہراسانی کوئی معمولی مسئلہ نہیں بلکہ یہ انسانی وقار کی سنگین پامالی ہے اور خواتین کی پیشہ ورانہ و ذاتی ترقی کی راہ میں ایک بڑی رکاوٹ ہے۔انہوں نے کہا کہ صوبائی محتسب کا واضح عزم ہے کہ سندھ کی ہر کام کی جگہ کو احترام اور تحفظ کا گڑھ بنایا جائے اور ہراسانی کے خلاف زیرو ٹالرنس پالیسی پر عملی طور پر عملدرآمد یقینی بنایا جائے۔ ان کا کہنا تھا کہ ہر عورت کا بنیادی حق ہے کہ اسے ایک محفوظ، باعزت اور خوف و امتیاز سے پاک ماحول فراہم کیا جائے۔محمد اقبال آرائیں نے اس بات پر زور دیا کہ خاموش رہنا مسئلے کا حل نہیں، جبکہ موصول ہونے والی شکایات پر فوری اور فیصلہ کن کارروائی عمل میں لائی جائے گی۔ انہوں نے کہا کہ ایکٹ 2010ء محض کاغذی قانون نہیں بلکہ یہ ایک ڈھال بھی ہے اور تلوار بھی، جو ایک طرف کمزور طبقے کے تحفظ کا ذریعہ ہے تو دوسری جانب مجرم عناصر کے لیے سخت سزا کا سبب بنتا ہے۔آگاہی پروگرام کے دوران ہراسانی کی مختلف اقسام، جن میں جسمانی، زبانی اور نفسیاتی ہراسانی شامل ہیں، پر بھی تفصیل سے روشنی ڈالی گئی۔اس موقع پر تعلقہ ایجوکیشن آفیسر (ٹی ای او) رخسانہ لاشاری اور اسکول کی پرنسپل زکیہ خانم لاڑک نے آگاہی مہم کو سراہتے ہوئے کہا کہ ایسے پروگرام اداروں میں ملازمین کے وقار، تحفظ اور برابری کو یقینی بنانے میں اہم کردار ادا کرتے ہیں۔ انہوں نے بالخصوص خواتین کے لیے محفوظ ماحول کی فراہمی پر زور دیا اور کامیاب انعقاد پر صوبائی محتسب کی ٹیم کو خراجِ تحسین پیش کیا۔
آخر میں بتایا گیا کہ صوبائی محتسب سندھ کا ریجنل آفس سکھر کام کی جگہوں سے ہراسانی کے مکمل خاتمے کے مشن پر ثابت قدم ہے، تاکہ ایک ایسا محفوظ اور مساوی ماحول قائم کیا جا سکے جہاں ہر عورت عزتِ نفس اور اعتماد کے ساتھ اپنے فرائض انجام دے سکے۔