پنجاب ایمرجنسی سروس ریسکیو 1122ٹوبہ ٹیک سنگھ سے رپورٹ کر رہے ہیں افضل کھیتران ڈسٹرکٹ بیورو
پنجاب ایمرجنسی سروس
ریسکیو 1122ٹوبہ ٹیک سنگھ سے رپورٹ کر رہے ہیں افضل کھیتران ڈسٹرکٹ بیورو
*ریسکیو 1122 ضلع ٹوبہ ٹیک سنگھ کی سالانہ کارکردگی رپورٹ جاری*
ٹوبہ ٹیک سنگھ — ریسکیو 1122 ضلع ٹوبہ ٹیک سنگھ نے سال 2025 کی سالانہ کارکردگی رپورٹ جاری کر دی ہے، جس کے مطابق ریسکیو 1122نے 01 جنوری 2025 سے 31 دسمبر 2025 کے دوران عوام کو بروقت اور مؤثر ایمرجنسی سہولیات فراہم کیں۔
رپورٹ کے مطابق ریسکیو 1122 کو ضلع بھر میں کل 207,446 کالز موصول ہوئیں، جن میں سے 56,439 حقیقی ایمرجنسی کالز تھیں۔ ان ایمرجنسیز میں سب سے زیادہ تعداد میڈیکل ایمرجنسیز (39,761) کی رہی، جبکہ 9,291 روڈ ٹریفک حادثات، 398 آتشزدگی کے واقعات، 987 جرائم کے واقعات اور دیگر متفرق ایمرجنسیز شامل تھیں۔
سال 2025 کے دوران ریسکیو 1122ٹوبہ ٹیک سنگھ نے 58,950 مریضوں اور متاثرہ افراد کو بروقت ریسکیو کر کے قریبی ہسپتالوں میں منتقل کیا۔ رپورٹ کے مطابق ضلع بھر میں کسی بھی ایمرجنسی میں تاخیر رپورٹ نہیں ہوئی، جو ریسکیو اہلکاروں کی پیشہ ورانہ صلاحیت اور کنٹرول روم کی مؤثر مانیٹرنگ کا ثبوت ہے۔
تحصیل وار کارکردگی کے مطابق ٹوبہ ٹیک سنگھ سٹی میں سب سے زیادہ ایمرجنسی کالز موصول ہوئیں، جبکہ گوجرہ، کمالیہ اور پیرمحل میں بھی ریسکیو 1122 کی ٹیموں نے بھرپور خدمات انجام دیں۔ رپورٹ میں یہ بھی بتایا گیا کہ فیک کالز اور پہلے سے منتقل شدہ کیسز کی تعداد انتہائی کم رہی، جو عوامی تعاون کی عکاس ہے۔
ڈسٹرکٹ ایمرجنسی آفیسر ریسکیو 1122میاں فراز منیر نے اس موقع پر کہا کہ
“ریسکیو 1122 عوام کی جان و مال کے تحفظ کے لیے ہر لمحہ تیار ہے۔ ہماری ٹیموں نے محدود وسائل کے باوجود فرض شناسی اور جذبۂ خدمت کے ساتھ اپنی ذمہ داریاں انجام دیں۔ عوام سے اپیل ہے کہ وہ ایمرجنسی کی صورت میں 1122 پر بروقت اطلاع دیں اور فیک کالز سے گریز کریں۔”
ریسکیو 1122 ضلع ٹوبہ ٹیک سنگھ خدمتِ انسانیت کے مشن کے تحت مستقبل میں بھی عوام کو معیاری، تیز اور محفوظ ایمرجنسی سہولیات فراہم کرتا رہے گا۔
