November 17, 2026

اقوامِ متحدہ کی میز اور پاکستان کی کرسی — مستقل نشستوں کا معاملہ آخر ہے کیا؟”

IMG-20250923-WA0272(43)

“اقوامِ متحدہ کی میز اور پاکستان کی کرسی — مستقل نشستوں کا معاملہ آخر ہے کیا؟”

دنیا کی نظریں آج ایک بار پھر اقوامِ متحدہ کی اس میز پر جمی ہوئی ہیں جہاں فیصلوں کی گونج سرحدوں سے بھی آگے سنائی دیتی ہے۔ پاکستان نے ایک بار پھر سلامتی کونسل کی مستقل نشستوں میں اضافے کی تجویز کی واضح اور دوٹوک انداز میں مخالفت کی ہے۔ یہ کوئی پہلا موقع نہیں، لیکن موجودہ حالات میں اس بیان کی گونج پہلے سے کہیں زیادہ دور تک گئی ہے۔ عالمی سیاست میں وہی ملک طاقت ور شمار ہوتا ہے جو یا تو فیصلہ کرنے والی کرسی پر بیٹھا ہو یا پھر اس کرسی کو ہلانے کی صلاحیت رکھتا ہو۔ پاکستان نے اس بار کرسی کو ہلانے کی کوشش نہیں کی بلکہ یہ کہا ہے کہ نئی کرسیوں کی تقسیم منصفانہ نہیں۔

یہ سوال اُٹھتا ہے کہ آخر پاکستان مستقل نشستوں میں اضافے کے خلاف کیوں ہے؟ عام قاری سمجھ نہیں پاتا کہ یہ معاملہ محض کرسی بڑھانے کا نہیں، بلکہ طاقت کے توازن کو تبدیل کرنے کا کھیل ہے۔ مستقل نشست اس ملک کو حاصل ہوتی ہے جو نہ صرف ویٹو پاور رکھتا ہے بلکہ پوری دنیا کے سیاسی نقشے پر اپنا وزن ڈالنے کی صلاحیت بھی۔ اگر یہ نشستیں بڑھا دی گئیں تو دنیا چند بڑے ممالک کے ہاتھوں مزید یرغمال بن سکتی ہے۔ پاکستان کا مؤقف یہی ہے کہ دنیا کو زیادہ جامع نمائندگی کی ضرورت ہے، نہ کہ چند طاقت ور ملکوں کے لیے “وی آئی پی کاریڈور” کھول دینے کی۔

یہ بھی حقیقت ہے کہ پاکستان کے اس مؤقف کے پیچھے خطے کی سیاست بھی شامل ہے۔ بھارت برسوں سے سلامتی کونسل کی مستقل نشست کے لیے لابنگ کر رہا ہے، اور شاید یہ تجویز بڑھتی ہوئی بھارتی مہم کو مزید تقویت دے۔ پاکستان سمجھتا ہے کہ جنوبی ایشیا کا توازن اس طرح مزید بگڑ سکتا ہے۔ پاکستان نے ہمیشہ “مساوات پر مبنی اصلاحات” کی بات کی ہے، اور اس کا کہنا ہے کہ اقوامِ متحدہ میں تبدیلی ہو لیکن ایسی جو عالمی آوازوں کو طاقت دے نہ کہ پہلے سے طاقتور ملکوں کو “پاور اپ” کر دے۔

یہاں ایک تلخ حقیقت کو بھی تسلیم کرنا پڑے گا۔ اقوامِ متحدہ خود بھی ایک تضاد کا مجموعہ بن چکا ہے۔ ایک طرف دنیا بھر میں جمہوریت کی دہائی دی جاتی ہے، دوسری طرف عالمی ایوان میں طاقت کی تقسیم گزشتہ 80 برسوں سے جوں کی توں برقرار ہے۔ نئے ملک وجود میں آئے، براعظم بدلے، فوجی اتحاد ٹوٹے، معاشی نظام بدل گیا، لیکن سلامتی کونسل کی مستقل نشستیں وہیں کی وہیں ہیں۔ ایسے میں اگر کوئی ملک اصلاحات مانگے تو منطقی ہے، لیکن اگر اصلاحات چند بڑے ملکوں کو مزید بااختیار کرنے کا ذریعہ بنیں، تو اعتراض کرنا بھی اُتنا ہی ضروری ہے۔

پاکستان کے اس حالیہ بیان نے واضح کر دیا ہے کہ وہ عالمی سطح پر اپنی سفارتی اہمت کو برقرار رکھنے کے لیے ذمہ دارانہ انداز میں کھیل رہا ہے۔ یہ مؤقف نہ صرف سیاسی شعور کی علامت ہے بلکہ عالمی توازن میں پاکستان کے کردار کی بھی نشاندہی کرتا ہے۔ دنیا ایک نئے دور میں داخل ہو رہی ہے — جہاں ایشیا، افریقہ اور لاطینی امریکہ کی آواز پہلے سے کہیں زیادہ اہم ہو چکی ہے۔ اگر اس تبدیلی میں طاقت کی کرسیوں کا ازسرِنو تعین کیا جانا ہے تو پھر یہ فیصلہ چند ملکوں کی خواہشات پر نہیں، بلکہ عالمی اتفاقِ رائے پر ہونا چاہیے۔

سوال اب بھی وہی ہے: کیا دنیا طاقت کے نئے موسم کی طرف بڑھ رہی ہے یا پرانے درختوں پر ہی نئی شاخیں اُگا رہی ہے؟ پاکستان نے آج جو بات کی ہے، وہ صرف ایک احتجاج نہیں بلکہ ایک “ریڈ فلیگ” بھی ہے — کہ دنیا اگر واقعی منصفانہ نظام چاہتی ہے تو فیصلہ سب کے لیے ہونا چاہیے، کسی کے حق میں نہیں۔

یہ کالم لکھتے ہوئے ایک خیال بار بار ذہن میں آ یا—
طاقت کی کرسی ہمیشہ مضبوط لکڑی کی نہیں ہوتی، کبھی کبھی سچائی بھی اسے تھام لیتی ہے۔