روشنی کا بوجھ شہر کی شامیں پہلے بھی دھیمی پڑتی تھیں،
روشنی کا بوجھ
شہر کی شامیں پہلے بھی دھیمی پڑتی تھیں، مگر اب چھتوں پر لگے سولر پینلز نے روشنی کو ایک نیا مفہوم دے دیا ہے۔ کبھی بجلی کے کھمبوں کو دیکھ کر اندازہ ہوتا تھا کہ شہر زندہ ہے یا نیم مردہ، مگر اب گھروں کی چھتیں خود ایک ایک چراغ بن گئی ہیں۔ نئی رپورٹ نے بتا دیا ہے کہ آنے والے مہینوں میں کچھ صنعتی علاقوں میں دن کے وقت سولر بجلی اتنی زیادہ ہو جائے گی کہ گرڈ کی ضرورت ہی کم پڑ جائے گی۔ بات بجلی کی نہیں، سوچ کی ہے۔ ہم نے برسوں اندھیرے کا رونا رویا، اور جب روشنی نے گھر بنانا چاہا تو اس کے بھی دروازے بند کرنے لگے۔
یہ عجیب ملک ہے، یہاں اندھیرا بھی مسئلہ ہے اور روشنی بھی۔ سولر توانائی بڑھ رہی ہے، لوگ اپنی جیب سے اپنے لیے بجلی پیدا کر رہے ہیں، لیکن اس کے ساتھ ایک سوال بھی بڑھ رہا ہے کہ اگر گھروں کی بجلی گھروں میں ہی پیدا ہونے لگے تو حکومت کی آمدن کا کیا ہوگا؟ گرڈ کا کیا بنے گا؟ سرکاری محکمے کہہ رہے ہیں کہ اگر یہ رفتار ایسے ہی بڑھتی رہی تو کئی علاقوں میں گرڈ مالی دباؤ کا شکار ہو جائے گا۔ اور پھر وہی پرانی بحث — عوام بجلی کے بلوں سے چھٹکارا چاہتی ہے، اور محکمے اپنے گھاٹے سے۔ دونوں اپنی اپنی جگہ ٹھیک بھی ہیں اور غلط بھی۔
مگر سچ یہ ہے کہ جب ایک قوم خود اپنے مسائل کا حل تلاش کرنے لگتی ہے تو یہ اس کی پختگی کی علامت ہوتی ہے۔ بجلی کی قیمتیں بڑھیں تو لوگوں نے چھتوں پر پینل لگا لیے، لوڈشیڈنگ بڑھی تو بیٹریاں اور انورٹر چل پڑے۔ یہ ملک ابھی بھی چل رہا ہے تو انہی لوگوں کی وجہ سے جو ہر مشکل میں اپنا راستہ خود بنا لیتے ہیں۔ لیکن مسئلہ تب پیدا ہوتا ہے جب عوام کا حل حکومت کے مسئلے سے ٹکرا جائے۔ آج بجلی کے بلوں میں اضافہ ہو تو ساری توجہ صارف پر رکھی جاتی ہے، مگر جب صارف بجلی خریدنا چھوڑ دے تو اچانک پورا نظام خطرے میں پڑ جاتا ہے۔
یہ سولر پینلز محض دھات اور شیشے کی تختیاں نہیں، یہ اس قوم کی خاموش چیخیں بھی ہیں۔ جس گھر میں سورج نے جگہ لے لی، وہاں حکومت کی روشنی دیر سے پہنچتی تھی۔ اب لوگ کہتے ہیں کہ ہم سورج کے محتاج نہیں، اس کی روشنی تو اللہ نے سب کے لیے رکھی ہے، مگر ہم اس کے محتاج اس لیے بنے ہیں کہ ہمارے اپنے نظام نے ہمیں محتاج بنا دیا تھا۔ سولر بجلی نے سب سے پہلے اس نفسیاتی غلامی کو توڑا، جس میں ہر شخص سمجھتا تھا کہ سرکاری گرڈ کے بغیر زندگی ممکن نہیں۔
اگر آنے والے وقت میں گرڈ دباؤ کا شکار ہوتا ہے تو سوال یہ نہیں ہوگا کہ عوام نے سولر کیوں لگایا۔ سوال یہ ہوگا کہ سرکاری نظام نے اپنے آپ کو کیوں نہیں بدلا؟ دنیا بدل رہی ہے، ٹیکنالوجی اپنا راستہ خود بنا رہی ہے، اور بجلی کا مستقبل واضح ہے — وہ چھتوں، کھڑکیوں، اور کھیتوں سے جنم لے رہا ہے، دفاتر کے فائل رومز سے نہیں۔
اس ملک میں ہمیشہ ایک دلچسپ بات رہی ہے۔ یہاں ہر مسئلہ ہمیں ایک سبق دے جاتا ہے، صرف ہم ہیں جو سیکھنے سے پہلے ہی اگلے مسئلے میں کود پڑتے ہیں۔ سولر پینلز ایک مسئلہ نہیں، ایک موقع ہیں۔ اگر سمجھنے والے سمجھ جائیں تو بجلی کی جنگ ختم ہو سکتی ہے، مگر اگر نہ سمجھے تو روشنی بھی ایک دن جرم بن جائے گی۔
روشنی کا بوجھ بہت ہلکا ہوتا ہے، مگر جن کے دل اندھیرے سے بھرے ہوں وہ اس روشنی سے بھی ڈر جاتے ہیں۔
@@@@@@@@@@@@@@