شاندار ثقافتی روایات کا حامل علاقہ تھل خصوصی تحریر: راجہ نورالہی عاطف
شاندار ثقافتی روایات کا حامل علاقہ تھل
خصوصی تحریر: راجہ نورالہی عاطف
پاکستان کے وسیع و عریض خطے میں اگر کسی علاقے کو خلوص، محبت، وفاداری اور ثقافتی رنگوں کی سرزمین کہا جائے تو وہ علاقہ تھل ہے۔ تھل کی ریتلی دھرتی، اپنی مخصوص خوشبو، میٹھے لہجے، محبت بھرے لوگ اور صدیوں پرانی ثقافتی روایات کے باعث ایک انفرادیت رکھتی ہے۔ یہاں کی ثقافت محض رسم و رواج کا نام نہیں بلکہ یہ لوگوں کے طرزِ زندگی، ان کے رہن سہن، میل جول، بول چال اور روایتی اقدار کا حسین امتزاج ہے۔
نورپورتھل سمیت دیگر تھل کے باسی اپنی سادہ مزاجی، مہمان نوازی اور غیرت و حمیت کے باعث جانے جاتے ہیں۔ ان کے گھروں کے دروازے ہر مہمان کے لیے ہمیشہ کھلے رہتے ہیں۔ یہاں کا کلچر خلوصِ نیت، عاجزی اور باہمی احترام پر مبنی ہے۔ شادی بیاہ، میلوں ٹھیلوں ، میلاد اور دیگر مذہبی اجتماعات میں جو اجتماعیت نظر آتی ہے، وہ اس خطے کے مضبوط سماجی رشتوں کی عکاسی کرتی ہے۔
وسیع و عریض علاقہ تھل کی ثقافت میں سب سے نمایاں پہلو اس کی لوک موسیقی اور شاعری ہے۔ سرائیکی وسیب کے اس خطے کے لوک گیت، “جھومر” اور “دھمال” صرف فن نہیں بلکہ احساسات اور جذبات کی ترجمانی ہیں۔ خواجہ فرید، شفیع کھکھی، غلام محمد بلہڑ اور دیگر شعراء حاجی احمد فگار سٹھار(نورپورتھل)، مغموم ، پردیسی(رنگپوربگھور) ملک محمد رفیق واگھراہ ، ملک ظل واگھراہ (شاہوالا جنوبی )
اور ان جیسے دیگر متعدد شعراء نے تھل کی دھرتی کو اپنی شاعری کے ذریعے ہمیشہ امر کر دیا۔ ان کے کلام میں محبتِ انسانیت، صبر، قناعت اور فطرت سے گہرا رشتہ جھلکتا ہے۔
لباس اور دستکاری کے لحاظ سے بھی تھل اپنی مثال آپ ہے۔ خواتین کے ہاتھوں کی کشیدہ کاری، روایتی چادریں، “گھرارا” اور “چنری” آج بھی اس خطے کی ثقافتی پہچان ہیں۔ مردوں کا روایتی لباس، “ململ کی قمیض” اور “پگ” ان کی سادگی اور خودداری کی علامت ہے۔ راقم الحروف (راجہ نورالہی عاطف ) نے علاقہ تھل کے مختلف روایتی میلوں میں “اونٹ دوڑ”، “کچی گھوڑی”، اونٹ ناچ ،گھوڑا ناچ “جھومر” اور ان جیسے دیگر رسم و رواج میں عوامی دلچسپی کا مشاہدہ کیا ہے ۔یہ بھی دیکھنے میں آیا ہے کہ نورپورتھل سمیت تھل کے دیگر علاقوں میں یہ میلے صرف تفریح نہیں بلکہ میل جول، محبت اور بھائی چارے کے استحکام کا ذریعہ بنتے ہیں۔
تھل کی ثقافت کا ایک اور خوبصورت پہلو اس کے اخلاقی اور سماجی اصول ہیں۔ یہاں بزرگوں کا احترام، خواتین کی عزت، رشتہ داریوں کی پاسداری اور وعدے کی پابندی زندگی کے بنیادی اصول ہیں۔ یہی روایات اس خطے کو باقی دنیا سے ممتاز کرتی ہیں۔
تھل کے لوگ اگرچہ مادی وسائل میں محدود ہیں، مگر ان کے دل محبت سے مالا مال ہیں۔ یہاں کے نوجوان تعلیم، ادب، شاعری اور خدمتِ خلق میں بڑھ چڑھ کر حصہ لے رہے ہیں۔ جدید دنیا کے تقاضوں کے باوجود وہ اپنی ثقافت سے جڑے ہوئے ہیں، جو اس خطے کی اصل خوبصورتی ہے۔
آخر میں یہی کہا جا سکتا ہے کہ تھل صرف ایک خطہ نہیں، بلکہ ایک مکمل ثقافتی داستان ہے — جو محبت، روایت، محنت، خلوص اور غیرت کے رنگوں سے مزین ہے۔ اگر اس دھرتی کی روایات کو محفوظ رکھا جائے تو یہ آنے والی نسلوں کے لیے ایک قیمتی ورثہ ثابت ہو سکتی ہیں۔