یوکرین کی تباہی: پاکستان کے لیے ایک عبرت انگیز سبق
یوکرین کی تباہی: پاکستان کے لیے ایک عبرت انگیز سبق
دنیا کی تاریخ ہمیں بارہا یہ سبق دیتی ہے کہ کمزور ریاستیں نہ معاہدوں پر تکیہ کر سکتی ہیں، نہ طاقتوروں کے وعدوں پر۔ جن اقوام نے اپنی بقاء کا دارومدار دوسروں کی ضمانتوں پر رکھا، وہ بالآخر اپنی زمین، عزت اور خودمختاری سے محروم ہو گئیں۔ اس کی تازہ اور بے رحم مثال یوکرین ہے — ایک ایسا ملک جو چند دہائیوں قبل دنیا کی تیسری بڑی ایٹمی طاقت تھا، لیکن آج بے بسی اور بربادی کی علامت بن چکا ہے۔
ایٹمی قوت سے بے سروسامانی تک
1991 میں سوویت یونین کے انہدام کے بعد، یوکرین کو جو فوجی اور ایٹمی اثاثے وراثت میں ملے، وہ حیرت انگیز نوعیت کے تھے:
1700 کے قریب نیوکلیئر وارہیڈز
19 عدد Tu-160 بمبار (دنیا کے تیز ترین اسٹریٹیجک بمبار)
25 عدد Tu-95MS بمبار
60 عدد Tu-22M3 بمبار
بین البراعظمی بیلسٹک میزائلز (ICBMs)
کروز میزائلز، میزائل سائلوز، نیول فلیٹ
ایک ادھورا طیارہ بردار بحری جہاز
یعنی یوکرین سوویت یونین کے بعد روس اور امریکہ کے ساتھ دنیا کی تیسری بڑی ایٹمی قوت بن کر ابھرا تھا۔
تاہم، مغرب نے ’’امن‘‘ اور ’’تعاون‘‘ کے نام پر یوکرینی قیادت کو قائل کر لیا کہ وہ اپنی ایٹمی طاقت ترک کر دے۔ صرف 500 ملین ڈالر کے عوض، یوکرین نے Nunn–Lugar پروگرام کے تحت اپنے بمبار طیارے، میزائل اور جوہری اثاثے تباہ کرنا شروع کر دیے۔
10 عدد Tu-160، 25 Tu-95MS، اور 60 Tu-22M3 تباہ کیے گئے
575 کروز میزائل صرف گیس کے بدلے روس کے حوالے کیے گئے
جدید بمبار طیارے، جنہوں نے صرف چند سو گھنٹے پرواز کی تھی، امریکی ماہرین کی نگرانی میں کاٹ کر ضائع کیے گئے
پھر 1994 کے بوداپیسٹ معاہدے کے تحت یوکرین نے بقیہ ایٹمی ہتھیار بھی روس کے حوالے کر دیے — بدلے میں ’’علاقائی خودمختاری کی ضمانتیں‘‘ حاصل ہوئیں۔ لیکن 2014 میں جب روس نے کریمیا پر قبضہ کیا، اور 2022 میں مکمل جنگ چھیڑ دی، تو ان معاہدوں کی حیثیت کاغذ کے ٹکڑوں سے زیادہ ثابت نہ ہوئی۔ نیٹو اور امریکہ نے صرف پرانے ہتھیار بھیجے، اور ان کے بدلے یوکرین کے قیمتی معدنی ذخائر پر ہاتھ صاف کر لیا۔
پاکستان کو کیا سبق لینا چاہیے؟
پاکستان کا ایٹمی پروگرام محض عسکری طاقت کا مظہر نہیں، بلکہ یہ اس کی خودمختاری، بقاء اور تزویراتی توازن کا واحد مؤثر ضامن ہے۔ بھارت جیسا دشمن، جس کی نظریں ہمیشہ پاکستان کو غیر مستحکم کرنے پر رہی ہیں، کبھی بھی ایک غیر مسلح پاکستان کو برداشت نہیں کرے گا۔
افسوس کی بات یہ ہے کہ پاکستان میں بھی ایک مخصوص طبقہ کئی دہائیوں سے ایٹمی پروگرام کے خلاف متحرک رہا ہے۔ مرحوم عمر اصغر خان، عاصمہ جہانگیر، اور ڈاکٹر پرویز ہودبائی جیسے نامور چہرے اسے ’’معاشی بوجھ‘‘ اور ’’امن کی راہ میں رکاوٹ‘‘ قرار دیتے آئے ہیں۔ سوشل میڈیا، این جی اوز اور سول سوسائٹی کے لبادے میں بعض قوتیں دراصل عالمی ایجنڈے پر کام کر رہی ہیں، تاکہ پاکستان کو نہتا کر کے بھارت کے سامنے ڈال دیا جائے — بالکل یوکرین کے ماڈل پر۔
دفاع اور معیشت: لازم و ملزوم
یہ تسلیم کرنا بھی ضروری ہے کہ معاشی استحکام کے بغیر دفاعی اثاثے زیادہ دیر محفوظ نہیں رہ سکتے۔ سوویت یونین ایک واضح مثال ہے — دنیا کی سب سے بڑی فوجی طاقت معاشی بدحالی کے ہاتھوں بکھر گئی۔
لہٰذا پاکستان کو نہ صرف اپنی دفاعی طاقت برقرار رکھنی ہے، بلکہ معاشی خود انحصاری اور داخلی استحکام کو بھی یقینی بنانا ہے۔
کیا کرنا ہوگا؟
1. خود انحصاری اور پیداواری معیشت کو ترجیح دی جائے
2. اشرافیہ و بیوروکریسی کے غیر ضروری اخراجات میں 50 فیصد تک کمی کی جائے
3. بجلی، گیس، ایندھن اور اشیائے خور و نوش کی قیمتوں میں فوری ریلیف دیا جائے
4. ریسرچ اینڈ ڈیویلپمنٹ (R&D) کے لیے جی ڈی پی کا 1 فیصد مختص کیا جائے
5. چھوٹی و درمیانی صنعتوں کو ٹیکس و مالیاتی سہولتوں کے ذریعے فروغ دیا جائے
6. ٹیکس نیٹ وسیع کیا جائے اور ٹیکس کی شرح کم کی جائے
ایٹمی پالیسی: ناقابلِ واپسی قومی اثاثہ
پاکستان کی ایٹمی پالیسی کو ریاستی سطح پر ناقابلِ واپسی قومی اثاثہ قرار دیا جانا چاہیے۔ جو لابیاں اسے ’’بوجھ‘‘ کہہ کر کمزور کرنا چاہتی ہیں، انہیں محض فکری اختلاف نہیں بلکہ قومی سلامتی کے خلاف خطرہ سمجھا جائے۔ دفاعی صنعت کو جدید ٹیکنالوجی سے لیس کرنا، اور اسٹریٹیجک پالیسی سازی میں ریاستی خودمختاری برقرار رکھنا اب بقاء کا سوال بن چکا ہے۔
نتیجہ: یوکرین چیخ چیخ کر خبردار کر رہا ہے
یوکرین کا انجام پاکستان کے لیے ایک کھلا پیغام ہے:
“اگر تم نے اپنی طاقت ترک کی، تو تمہیں کوئی بوداپیسٹ معاہدہ نہیں بچا سکے گا۔ بھارت تمہارے سروں پر میزائل برسائے گا — اور تم صرف اقوام متحدہ میں تقریریں کرتے رہ جاؤ گے!”
طاقت ہی امن کی ضامن ہے۔ کمزور ریاستوں کو نہ تحفظ ملتا ہے، نہ عزت۔ اگر پاکستان اپنی معاشی اور دفاعی کمزوری کی طرف بڑھتا رہا، تو انجام یوکرین سے مختلف نہیں ہوگا۔
لہٰذا اب فیصلے کا وقت ہے:
خود انحصاری، معاشی استحکام اور ایٹمی دفاع — یہی پاکستان کی بقاء کا واحد فارمولا ہے۔