سکھر بیورو نصیر زیدی رپورٹ کے مطابق سکھر میں ڈسٹرکٹ ایجوکیشن آفیسر (ایلیمینٹری
سکھر بیورو نصیر زیدی رپورٹ کے مطابق سکھر میں ڈسٹرکٹ ایجوکیشن آفیسر (ایلیمینٹری، سیکنڈری اور ہائیر سیکنڈری) حاجی عبدالعزیز کُلهوڑو کی ریٹائرمنٹ کے موقع پر ایک الوداعی تقریب کا انعقاد کیا گیا، جس میں محکمہ تعلیم کے افسران، اساتذہ اور ملازمین نے شرکت کی۔
اس موقع پر ڈائریکٹر اسکول ایجوکیشن (ایلیمینٹری، سیکنڈری و ہائیر سیکنڈری)، ریجن سکھر حافظ شہاب الدین انڍڑ نے خطاب کرتے ہوئے کہا کہ حاجی عبدالعزیز کُلهوڑو کی تعلیم کے فروغ کے لیے دی گئی خدمات ناقابلِ فراموش ہیں۔ وہ ایک محنتی، بہترین اور قابل استاد تھے، جنہوں نے بطور افسر محکمہ تعلیم کا فخر بڑھایا۔ ان کا عملے سے رشتہ مضبوط رہا اور ان کے ساتھ کام کرنے والوں کو ہمیشہ عزت ملی۔
انہوں نے مزید کہا کہ ماضی میں مختلف سرکاری محکموں سمیت تعلیم کے شعبے میں قدآور شخصیات ہوتی تھیں، جو بغیر کسی خوف یا لالچ کے بڑی ذمے داریوں کو نبھاتے تھے۔ عبدالعزیز کُلهوڑو بھی ایک سادہ مزاج، نرم خو اور محبت کرنے والے افسر رہے، جنہوں نے ہمیشہ تعلیم کے فروغ کے لیے سرگرم کردار ادا کیا۔
ان کا کہنا تھا کہ ہم نے پانچ سال قبل عوامی خدمت کے جو بیج بوئے تھے، آج وہ ایک تناور درخت بن چکے ہیں۔ معاشرے کی ترقی، خوشحالی اور لوگوں کی اخلاقی تربیت میں تعلیم کا شعبہ کلیدی حیثیت رکھتا ہے۔
حاجی عبدالعزیز کُلهوڑو نے اس موقع پر کہا کہ بزرگ افسران کی رہنمائی اور ملازمین کے تعاون سے میں نے ہمیشہ خلوصِ دل سے کام کیا۔ میں نے استاد کے پیشے کو عزت دی اور دیانتداری سے مسائل کا حل نکالتا رہا، عوام کو سہولتیں فراہم کرنے کی کوشش کی۔ مجھے یقین ہے کہ آج بھی ایک قابل استاد کو معاشرے میں عزت کی نگاہ سے دیکھا جاتا ہے۔ ہم اُن عظیم اساتذہ کو سلام پیش کرتے ہیں جنہوں نے علم کی شمع روشن رکھنے اور طلبہ کو کامیابی کی راہوں پر گامزن کرنے میں کوئی کسر نہیں چھوڑی۔
تقریب میں سید امیر مختار شاہ موسوی، عبدالقیوم کھوسو، اطہر حسین قریشی، محبوب شیخ اور دیگر مقررین نے بھی خطاب کیا۔ انہوں نے حاجی عبدالعزیز کُلهوڑو کو ایک وفادار، باصلاحیت اور معاملہ فہم افسر قرار دیا، جو ہر پیچیدہ مسئلے میں مشورہ دینے والے پُل کی حیثیت رکھتے تھے۔ ان کا باہمت کردار شعبۂ تعلیم سے وابستہ اساتذہ کے لیے حوصلہ افزائی کا باعث ہے۔
تقریب کے آخر میں حاجی عبدالعزیز کُلهوڑو کو اعزاز سے نوازا گیا اور سندھ کی ثقافتی سوغات سندھی ٹوپی اور اجرک کا تحفہ پیش کیا گیا۔