سکھر سید نصیر زیدی رپورٹ کے مطابق سندھ ہائی کورٹ بینچ سکھر میں اسٹیوٹا ٹیچنگ لائسنس سرٹیفکیٹ کے لیے لیے
سکھر سید نصیر زیدی رپورٹ کے مطابق سندھ ہائی کورٹ بینچ سکھر میں اسٹیوٹا ٹیچنگ لائسنس سرٹیفکیٹ کے لیے لیے گئے ٹیسٹ کے نتائج میں مبینہ ہیرا پھیری کے خلاف دائر درخواستوں پر سماعت کی گئی۔ عدالت نے سماعت ملتوی کرتے ہوئے آئندہ پیشی اگست کے تیسرے ہفتے تک مقرر کر دی ہے۔
تفصیلات کے مطابق، مس طوبیٰ، انیس الرحمان میمن، محمد فاروق سمیجو سمیت 14 افراد کی جانب سے دائر کردہ درخواستوں پر جسٹس ذوالفقار علی سانگی اور جسٹس عبد الحمید ڀرڳڙي پر مشتمل آئینی بینچ نے سماعت کی۔ عدالت نے کیس کی مزید سماعت ملتوی کرتے ہوئے سکر آئی بی اے کے وائس چانسلر، اسٹیوٹا کے ڈائریکٹر اور دیگر فریقین کو نوٹس جاری کرتے ہوئے رپورٹ طلب کر لی ہے۔
ایڈووکیٹ عقلیم حیدر شر نے میڈیا سے بات کرتے ہوئے کہا کہ یہ معاملہ ایک سال پہلے لیے گئے ٹیسٹ کے نتائج کا ہے جنہیں ایک سال بعد چیلنج کیا گیا ہے۔ ان کے مطابق یہ سروس ٹربیونل کا معاملہ ہے، اس لیے آئینی بینچ کی جانب سے آج فریقین کے دلائل نہیں سنے گئے۔
دوسری جانب درخواست گزاروں نے مؤقف اختیار کیا ہے کہ اسٹیوٹا کی جانب سے ٹیچنگ اسٹاف کی اپ گریڈیشن اور پروموشن کے لیے لائسنس سرٹیفکیٹ جاری کرنے کی پالیسی بنائی گئی، جس کے تحت تحریری امتحان میں کامیابی کے لیے 50 فیصد نمبر حاصل کرنا لازمی قرار دیا گیا تھا۔
یہ امتحان 28 جنوری 2024 کو سکھر آئی بی اے ٹیسٹنگ سروس کے تحت لیا گیا، جس میں 445 حاضر سروس اور 195 پری سروس امیدوار شریک ہوئے۔ درخواست گزاروں کے مطابق، SEBA کی جانب سے جاری کیے گئے نتائج میں دیکھا گیا کہ 32 سے 37 نمبر حاصل کرنے والے اکثر حاضر سروس ملازمین کو امتحان میں پاس ظاہر کیا گیا، جب کہ 50 یا اس سے زیادہ نمبر حاصل کرنے والے پری سروس امیدواروں کو فیل قرار دیا گیا، جو واضح طور پر ناانصافی اور بے ضابطگی ہے۔