آئینہ وقت بادشاہی کا تاج یا دلوں کی سلطنت؟ تحریر: محمد حنیف شاہد ارائیں
آئینہ وقت
بادشاہی کا تاج یا دلوں کی سلطنت؟
تحریر: محمد حنیف شاہد ارائیں
بادشاہ وہ نہیں جس کے سر پہ تاج ہو
بادشاہ وہ ہے جس کا دلوں پر راج ہو
انسانی تاریخ کے اوراق اٹھا کر دیکھ لیجیے، آپ کو ہر دور میں دو قسم کے بادشاہ ملیں گے: ایک وہ جو تخت پر بیٹھے، زرق برق لباس پہنے، فوجوں کے جلو میں گزرے، لیکن عوام کے دلوں سے کوسوں دور رہے۔ دوسرے وہ جو سادہ لباس میں، عوام کے ساتھ کندھے سے کندھا ملا کر چلے، اور دلوں میں بس گئے — ہمیشہ کے لیے۔
اصل بادشاہی وہی ہے جو محبت، اخلاص، انصاف، اور کردار سے قائم ہو۔ وہ قیادت جو لوگوں کے دل جیت لے، جو فیصلے عدالتوں سے پہلے ضمیروں میں قبول ہو جائیں، اور جو ظاہری شان و شوکت کے بغیر بھی احترام کی علامت بن جائے۔ ایسے بادشاہ تاج کے محتاج نہیں ہوتے، کیونکہ ان کے سروں پر عوام کا اعتماد، دعائیں، اور محبتوں کا تاج ہوتا ہے۔
خلیفہ دوم حضرت عمرؓ کی حکمرانی کو ہی دیکھ لیجیے۔ ایک رات گشت کرتے ہوئے ایک عورت کے گھر کی دہلیز پر بیٹھے سن رہے ہیں کہ وہ اپنے بچوں کو بھوکے سلانے کی کوشش کر رہی ہے۔ خلیفہ اپنی پشت پر آٹے کی بوری لاد کر لاتے ہیں اور کہتے ہیں: “عمر ہی روزِ قیامت ان بچوں کے بھوکے ہونے کا جواب دے گا۔”
یہ ہوتی ہے دلوں کی بادشاہی!
قائداعظم محمد علی جناح نے کبھی کسی سلطنت کا تاج نہیں پہنا، لیکن ایک نئی ریاست کی بنیاد رکھ دی — صرف اپنے کردار، عزم اور عوام کے اعتماد سے۔
آج اگر ہم پاکستان جیسے ملک میں بار بار قیادت کے بحران سے دوچار ہو رہے ہیں، تو اس کی وجہ یہ ہے کہ ہم نے تخت کے طلبگاروں کو چُنا، دلوں پر راج کرنے والوں کو نہیں۔ ہم نے نعرے سن کر ووٹ دیے، کردار دیکھ کر نہیں۔ ہم نے تماشے پسند کیے، تقویٰ نہیں۔
ہمیں اب پھر اس شعور کی ضرورت ہے جو فرق کرے تخت نشین اور دل نشین میں۔ ہمیں وہ لیڈر چاہیے جو سادگی سے، خلوص سے، کردار سے، اور سب سے بڑھ کر — عوام کی خیر خواہی سے — ہمارے دلوں میں جگہ بنائے۔
دل پر راج کسی ووٹ، کسی اسمبلی یا کسی ادارے کی منظوری سے نہیں ملتا۔ یہ وہ بادشاہی ہے جو صرف دلوں کے راستے ملتی ہے — اور یہی اصل بادشاہی ہے۔