آئینہ وقت تحریر: محمد حنیف شاہد ارائیں تنخواہوں کا ترازو اور آئی ایم ایف کی عینک
آئینہ وقت
تحریر: محمد حنیف شاہد ارائیں
تنخواہوں کا ترازو اور آئی ایم ایف کی عینک
آئینہ وقت میں آج ایک ایسا عکس دکھایا جا رہا ہے جس میں انصاف کے ترازو کے پلڑے برابر نہیں، بلکہ ایک طرف غریب کی محنت اور دوسری طرف امیر کی عیاشی کا وزن جھولتا ہوا دکھائی دیتا ہے۔
یہ حقیقت کسی سے ڈھکی چھپی نہیں کہ جون کا بجٹ آتے ہی آئی ایم ایف کی چمکدار عینکیں آنکھوں پر چڑھ جاتی ہیں۔ جیسے ہی حکومت غریب ملازمین کی تنخواہوں میں 30 فیصد اضافے کا عندیہ دیتی ہے، آئی ایم ایف کی سانسیں اکھڑنے لگتی ہیں، معیشت کو ہارٹ اٹیک ہونے کا ڈر لاحق ہو جاتا ہے، اور ہر طرف اشاروں کنایوں میں “ڈیفالٹ” کی گونج سنائی دیتی ہے۔
مگر اسی بجٹ میں جب اعلیٰ سرکاری افسران، بیوروکریسی اور اشرافیہ کی تنخواہوں میں 200 سے 300 فیصد تک اضافہ کیا جاتا ہے، تو عینک کے شیشے جیسے دھندلے ہو جاتے ہیں۔ نہ کوئی سوال، نہ کوئی اعتراض، اور نہ کوئی معاشی تشویش! جیسے سب کچھ بلّی کے منہ میں دودھ کے برابر “معصوم” ہو۔
آئینہ وقت یہ بھی دکھاتا ہے کہ اصل بحران تنخواہوں کا نہیں، نیتوں کا ہے۔ مزدور کی تنخواہ کو سبسڈی سمجھا جاتا ہے اور سرمایہ دار کی مراعات کو معیشت کی “مجبوری” قرار دیا جاتا ہے۔ آئی ایم ایف کا پیمانہ صرف اُسی وقت حرکت میں آتا ہے جب بات نچلے طبقے کے ریلیف کی ہو۔ ورنہ اشرافیہ کے لیے تو ہر معاہدہ “قومی مفاد” بن جاتا ہے۔
کیا عجب نظام ہے!
جہاں نچلے گریڈ کے ملازم کا اضافی پانچ ہزار روپیہ “خطرہ” ہے،
اور اونچے عہدے دار کا پچاس لاکھ کا پیکیج “ضرورت”۔
جہاں سچ بولنے والا صحافی “سازشی” کہلاتا ہے،
اور خاموش رہنے والا “سینئر اینالسٹ”!
آئینہ وقت آج یہ سوال اٹھاتا ہے:
کیا واقعی ملک کا مستقبل چند کروڑ روپے کی تنخواہوں میں چھپا ہے؟
یا یہ سب ایک بڑا تماشہ ہے جس کا اسکرپٹ آئی ایم ایف اور اس کے حواریوں نے لکھ رکھا ہے؟
یہ کالم پڑھنے والوں سے گزارش ہے:
آئینہ وقت کو صرف دیکھیں نہیں،
پہچانیں بھی — کیونکہ اصل بدصورتی ہمارے نظام کی شکل میں چھپی ہے،
اور شاید ہم سب کو اب “آئینہ” دیکھنے کی ضرورت ہے!