جب رشتے فقط نام کے رہ جائیں
جب رشتے فقط نام کے رہ جائیں
کبھی ہم ایسے وقت میں جی رہے تھے جب ایک گھر میں صرف لوگ نہیں بستے تھے، رشتے بھی سانس لیتے تھے۔ چچا کے آنے پر بچہ دوڑ کر پانی لاتا، پھوپھی کے لیے خاص کھانے بنتے، نانی کے سائے میں نیند سکون سے آتی، ماموں کی مسکراہٹ عید کی خوشی جیسی ہوتی۔ اب وہ دن خواب ہوئے، اور خواب بھی ایسے جن کی تعبیر شاید اب کسی قبرستان کے سکوت میں دفن ہے۔
رشتہ داروں کے حقوق صرف مذہبی فریضہ نہیں، ایک دل کی آواز، ایک خون کا تقاضا تھے۔ کبھی دلوں کے درمیان فاصلہ نہیں ہوتا تھا، اب گھروں کے فاصلے تو مٹ گئے، مگر دل میلوں دور ہو گئے ہیں۔ وٹس ایپ پر “عید مبارک” لکھ کر ہم سمجھتے ہیں کہ صلہ رحمی کا حق ادا ہو گیا۔ حالانکہ رشتہ دار وہ ہوتے ہیں جن کے دکھ ہمارے سینے میں دھڑکیں، جن کی مسکراہٹ ہماری دعا بن جائے۔
کبھی خاندان کی دعاؤں سے آنگن مہکتے تھے۔ آج انہی رشتہ داروں کی قبروں پر بھی کوئی دعا کو نہیں جاتا۔ رشتہ دار بیمار ہوں تو خبر بعد میں ملتی ہے، اور کچھ رشتے تو خاموشی سے بچھڑ جاتے ہیں — نہ ماتم، نہ ملاقات، نہ معافی۔
دل ٹوٹتا ہے جب خون کے رشتے ضرورت کے محتاج بن جائیں۔ جب کوئی بزرگ کسی بیٹے، بھتیجے یا نواسے کی راہ تکتے تکتے دنیا چھوڑ دے، اور وہ آخری سانس تک یہی کہتا رہے:
“سب مصروف ہیں، کوئی وقت نہیں نکال سکا۔”
کتنے ہی رشتہ دار ایسے ہوتے ہیں جو صرف اس لیے خاموش ہو جاتے ہیں کہ بار بار کی بےرخی نے ان کے دل کو تھکا دیا ہوتا ہے۔ وہ شکوہ بھی نہیں کرتے، گلہ بھی نہیں کرتے، بس آہستہ آہستہ دور ہو جاتے ہیں۔ ان کے فون آنا بند ہو جاتے ہیں، وہ دعوتوں میں نہیں آتے، اور ہم سمجھتے ہیں شاید انہیں فرق نہیں پڑتا۔ حقیقت یہ ہے کہ وہ اندر سے ٹوٹ چکے ہوتے ہیں، لیکن عزتِ نفس کے ہاتھوں مجبور ہو کر خاموش رہتے ہیں۔ ہم وقت پر ایک معذرت، ایک ملاقات، ایک مسکراہٹ سے بہت کچھ سنوار سکتے ہیں، لیکن اکثر تب یاد آتا ہے جب وہ ہمیشہ کے لیے خاموش ہو چکے ہوتے ہیں۔
یہ وقت ہے جاگنے کا، لوٹ آنے کا، رشتوں کو پھر سے جینے کا۔ شاید ہم آج کسی کا دل رکھ دیں تو کل کوئی ہمارا بن جائے۔ کسی بیمار چچا کی عیادت، کسی غریب خالہ کی مالی مدد، کسی یتیم بھتیجے کو گلے لگانا — یہ سب عبادت ہے، انسانیت ہے، رشتہ داری کا اصل حق ہے۔
خون کے رشتوں کو تو نبھانا تھا، ہم نے بھی دُنیا کو آزما لیا
جس نے دکھ میں ہاتھ پکڑا، وہی غیر تھا، وہی اپنا نکلا