November 16, 2026

علیمہ خان کا نام ای سی ایل سے نکالنے کی درخواست، سماعت 7 مئی تک ملتوی

20250504_143404

علیمہ خان کا نام ای سی ایل سے نکالنے کی درخواست، سماعت 7 مئی تک ملتوی

اسلام آباد (رپورٹ: محمد حنیف شاہد ارائیں)
علیمہ خان کا نام ایگزٹ کنٹرول لسٹ (ECL) سے نکالنے کی درخواست پر اسلام آباد ہائی کورٹ میں ہونے والی سماعت فریقین کو عدالتی نوٹس کی کاپی موصول نہ ہونے کی بنیاد پر مؤخر کر دی گئی ہے۔ عدالت نے کیس کی اگلی سماعت کی تاریخ 7 مئی مقرر کر دی ہے۔

درخواست گزار علیمہ خان نے مؤقف اختیار کیا ہے کہ ان کا نام غیر قانونی طور پر ای سی ایل میں شامل کیا گیا، جس سے ان کے بیرونِ ملک سفر کے بنیادی حق کی خلاف ورزی ہو رہی ہے۔ عدالت نے ابتدائی سماعت میں فریقین کو نوٹس جاری کیے تھے، تاہم آج کی سماعت کے دوران معلوم ہوا کہ نوٹس کی کاپیاں تاحال فریقین کو موصول نہیں ہوئیں۔

عدالت نے ہدایت کی کہ نوٹس کی ترسیل یقینی بنائی جائے تاکہ آئندہ سماعت پر فریقین اپنے دلائل پیش کر سکیں۔ کیس کی آئندہ سماعت 7 مئی کو مقرر کی گئی ہے۔

یہ کیس اس وقت سیاسی و قانونی حلقوں میں خصوصی توجہ کا مرکز بنا ہوا ہے، کیونکہ علیمہ خان سابق وزیراعظم عمران خان کی بہن ہیں، اور ان کے بیرونِ ملک اثاثہ جات اور مالیاتی معاملات ماضی میں بھی مختلف مقدمات کا حصہ رہے ہیں۔