November 18, 2026

روحانی مراکز: ہماری تہذیب، شناخت اور سماجی ہم آہنگی کا سرمایہ خصوصی تحریر: راجہ نورالٰہی عاطف

IMG-20260710-WA0186

روحانی مراکز: ہماری تہذیب، شناخت اور سماجی ہم آہنگی کا سرمایہ

خصوصی تحریر: راجہ نورالٰہی عاطف

پاکستان کی سرزمین اولیائے کرام، صوفیائے عظام اور بزرگانِ دین کی تعلیمات سے منور رہی ہے۔ یہی وہ روحانی مراکز ہیں جنہوں نے صدیوں سے محبت، اخوت، رواداری اور انسان دوستی کا پیغام عام کیا۔ خانقاہیں اور آستانے نہ صرف مذہبی وابستگی کا مرکز ہیں بلکہ معاشرتی اتحاد، اخلاقی تربیت اور سماجی خدمت کی روشن مثال بھی ہیں۔
گزشتہ روز سابق رکنِ صوبائی اسمبلی بیرسٹر ملک معظم شیر کلو کی آستانہ عالیہ مٹھہ ٹوانہ شریف آمد اسی روحانی روایت کا خوبصورت اظہار تھی۔ انہوں نے سجادہ نشین صاحبزادہ قاضی شیخ احمد سے خصوصی ملاقات کی، انہیں حجِ بیت اللہ کی سعادت حاصل کرکے وطن واپسی پر دلی مبارکباد پیش کی اور ان کے لیے نیک تمناؤں کا اظہار کیا۔ اس موقع پر انہوں نے صاحبزادہ قاضی شیخ احمد اور ان کے آبا و اجداد کی دینی، روحانی اور سماجی خدمات کو خراجِ تحسین پیش کرتے ہوئے کہا کہ ایسے روحانی مراکز ہی کسی بھی علاقے کی اصل شناخت ہوتے ہیں، جہاں سے محبت، امن اور بھائی چارے کا پیغام عام ہوتا ہے۔
یہ حقیقت ہے کہ ہماری خانقاہوں نے ہمیشہ معاشرے میں برداشت، اتحاد اور خدمتِ خلق کے جذبے کو فروغ دیا ہے۔ ان مراکز نے ہر دور میں لوگوں کو فرقہ واریت، نفرت اور تعصب سے دور رہنے اور انسانیت کی خدمت کرنے کی تلقین کی۔ یہی وجہ ہے کہ آج بھی لوگ روحانی سکون، رہنمائی اور دعاؤں کے لیے ان آستانوں کا رخ کرتے ہیں۔
صاحبزادہ قاضی شیخ احمد نے بھی معزز مہمانوں کا خیرمقدم کرتے ہوئے علاقے کی ترقی، امن، خوشحالی اور ملکی استحکام کے لیے خصوصی دعا کی۔ یہ دعا دراصل اس سوچ کی عکاس ہے کہ حقیقی ترقی صرف سڑکوں، عمارتوں اور منصوبوں سے نہیں بلکہ اخلاقی اقدار، اتحاد اور باہمی احترام سے ممکن ہوتی ہے۔
اس موقع پر ایڈووکیٹ ملک فاروق اقبال کلو اور مہر شفقت اقبال آرائیں کی موجودگی بھی اس امر کی علامت تھی کہ معاشرے کے مختلف طبقات روحانی مراکز سے وابستہ رہتے ہوئے سماجی ہم آہنگی کو فروغ دینے میں اپنا کردار ادا کر رہے ہیں۔
آج کے دور میں، جب معاشرہ مختلف چیلنجز سے دوچار ہے، ضرورت اس امر کی ہے کہ ہم اپنے روحانی ورثے سے جڑے رہیں، بزرگوں کی تعلیمات کو اپنائیں اور محبت، برداشت، اخوت اور خدمتِ خلق کو اپنی زندگی کا شعار بنائیں۔ یہی وہ اقدار ہیں جو ایک مضبوط، پرامن اور خوشحال معاشرے کی بنیاد رکھتی ہیں۔
آستانہ عالیہ مٹھہ ٹوانہ شریف جیسے روحانی مراکز ہماری مذہبی، ثقافتی اور سماجی شناخت کا قیمتی سرمایہ ہیں۔ ان کا احترام، ان کی روایات کا تسلسل اور ان سے وابستہ مثبت اقدار کا فروغ نہ صرف ہماری قومی ذمہ داری ہے بلکہ آنے والی نسلوں کے لیے بھی ایک روشن مثال ہے۔ ایسے مراکز ہمیشہ معاشرے میں امن، محبت اور اتحاد کے چراغ روشن کرتے رہیں گے، اور یہی ان کی سب سے بڑی خدمت اور پہچان ہے۔