نوابشاہ(رپورٹ۔انور عادل خانزادہ)تمغۂ امتیاز حاصل کرنے پر عابد لاشاری کے اعزاز میں نوابشاہ میں شاندار استقبالیہ نیشنل ڈس ایبلٹی اینڈ ڈوالپمنٹ فورم (این ڈی ایف) پاکستان کے صدر عابد لاشاری کے اعزاز میں نوابشاہ میں ایک شاندار اور پُروقار استقبالیہ تقریب منعقد کی گئی۔ عابد لاشاری کو سماجی خدمات، معذور افراد کے حقوق، بحالی، شمولیت، انسانی ہمدردی اور کمیونٹی ڈوالپمنٹ کے شعبوں میں نمایاں خدمات کے اعتراف میں پاکستان کے اعلیٰ سول اعزاز “تمغۂ امتیاز” سے نوازا گیا ہے۔
تمغۂ امتیاز حاصل کرنے کے بعد اپنے آبائی شہر نوابشاہ آمد پر سینکڑوں معذور اور غیر معذور افراد، سماجی کارکنان، سول سوسائٹی نمائندگان، نوجوانوں، کمیونٹی رہنماؤں اور شہریوں نے عابد لاشاری کا پُرتپاک استقبال کیا اور ان کی خدمات کو زبردست خراجِ تحسین پیش کیا۔
شرکاء نے پھول نچھاور کیے، خوشی کا اظہار کیا اور معذور افراد کی فلاح و بہبود، بحالی، شمولیت اور سندھ سمیت پاکستان بھر میں انسانی خدمات کے اعتراف پر فخر کا اظہار کیا۔
اس موقع پر خطاب کرتے ہوئے عابد لاشاری، تمغۂ امتیاز، نے نوابشاہ کے عوام کی محبت، اعتماد اور حمایت پر شکریہ ادا کیا۔ انہوں نے کہا کہ یہ اعزاز صرف ان کی ذات کے لیے نہیں بلکہ پاکستان بھر کے معذور افراد کی جدوجہد، وقار اور حقوق کا اعتراف ہے۔
انہوں نے اس عزم کا اعادہ کیا کہ وہ بحالی، رسائی، جامع تعلیم، انسانی خدمات اور بالخصوص معذور بچوں اور محروم طبقات کے بااختیار بنانے کے لیے اپنی جدوجہد جاری رکھیں گے۔
تقریب سے خطاب کرتے ہوئے مختلف سماجی و کمیونٹی رہنماؤں نے عابد لاشاری کی قیادت اور خدمات کو سراہا اور کہا کہ این ڈی ایف پاکستان اور پاکستان ڈاؤن سنڈروم ایسوسی ایشن (PDSA) کے ذریعے ان کی خدمات نوابشاہ اور سندھ کے لیے باعثِ فخر ہیں۔
55
