سکھر(بیورورپورٹ سید نصیر حسین زیدی دعا ان لاین نیوز)وفاقی محتسب کے معائنے کے باعث روہڑی ریلوے اسٹیشن کی اپ گریڈیشن کا عمل شروع کر دیا گیا ہے۔تفصیلات کے مطابق وفاقی محتسب کی جانب سے روہڑی جنکشن ریلوے اسٹیشن کے معائنے کے دوران مسافروں کو فراہم کی جانے والی سہولیات میں مختلف خامیوں کی نشاندہی کی گئی.صورتحال کا نوٹس لیتے ہوئے پاکستان ریلوے کے اعلیٰ حکام کو ہدایت کی گئی کہ عوام کو بہتر اور معیاری سہولیات فراہم کرنے کے لیے فوری اقدامات کیے جائیں۔وفاقی محتسب کی سفارشات کے بعد وفاقی وزیر برائے ریلوے محمد حنیف عباسی نے اعلیٰ حکام کے ہمراہ روہڑی ریلوے اسٹیشن کا دورہ کیا اور زمینی صورتحال کا جائزہ لیا۔ دورے کے دوران انہوں نے اسٹیشن کی مکمل اپ گریڈیشن اور مرمت کے احکامات جاری کیے.ہدایات میں انتظار گاہوں کی بہتری، صفائی کے نظام کو مؤثر بنانے، مسافروں کو بنیادی سہولیات کی فراہمی اور مجموعی انفراسٹرکچر کو بہتر بنانے پر زور دیا گیا تاکہ مسافروں کو زیادہ سے زیادہ سہولت اور آرام فراہم کیا جا سکے۔وفاقی وزیر نے کہا کہ پاکستان ریلوے اپنے بنیادی ڈھانچے کو جدید بنانے اور سروس کے معیار کو بہتر بنانے کے لیے پرعزم ہے، جو حکومت کے اس وژن کے مطابق ہے کہ ریلوے کے نظام کو ایک مؤثر اور مسافر دوست ادارہ بنایا جائے۔یہ پیش رفت عوامی شکایات کے ازالے اور سرکاری اداروں کو شہریوں کی ضروریات کے مطابق جوابدہ بنانے میں وفاقی محتسب کے فعال کردار کو اجاگر کرتی ہے، جبکہ اس بروقت مداخلت سے علاقے کے اہم ریلوے جنکشن پر سہولیات میں بہتری کے لیے عملی اقدامات کیے گئے ہیں، جس سے روزانہ سفر کرنے والے مسافروں کو نمایاں ریلیف ملنے کی توقع ہے۔
17
