سکھر میں معذور افراد میں وہیل چیئرز اور سفید چھڑیاں تقسیم، بیت المال کی طرف سے مالی امداد بھی فراہم
سکھر میں معذور افراد میں وہیل چیئرز اور سفید چھڑیاں تقسیم، بیت المال کی طرف سے مالی امداد بھی فراہم
سکھر (بیورورپورٹ)نیٹ ورک آف آرگنائزیشنز ورکنگ فار پرسنز وِتھ ڈس ایبیلٹیز پاکستان (این او ڈبلیو پی ڈی پی) کے زیر اہتمام اسپیشل ایجوکیشن اسکول، ڈی ای پی ڈی کمپلیکس سکھر میں معذور افراد میں معاون آلات اور مالی امداد کی تقسیم کی ایک تقریب منعقد ہوئی۔ تقریب کا انعقاد پاکستان بیت المال کے اشتراک سے کیا گیا، جس میں ضلع سکھر کے مستحق معذور افراد کو وہیل چیئرز، سفید چھڑیاں اور نقد رقم فراہم کی گئی۔تقریب کے مہمانِ خصوصی کمشنر سکھر ڈویژن عابد سلیم قریشی تھے، جبکہ ریجنل ڈائریکٹر ڈی ای پی ڈی عبد القدوس میمن اور اسسٹنٹ ڈائریکٹر پاکستان بیت المال سکھر شبیر احمد میمن نے بھی خصوصی شرکت کی۔ تقریب میں ضلع بھر سے آنے والے معذور افراد، ان کے سرپرستوں اور سماجی کارکنوں کی بڑی تعداد موجود تھی۔تقریب کے دوران پاکستان بیت المال کی جانب سے 30 معذور افراد کو فی کس 30 ہزار روپے کی مالی معاونت فراہم کی گئی۔ یہ رقم انہیں زندگی کے بنیادی اخراجات اور طبی سہولیات کی فراہمی میں مدد دینے کے لیے دی گئی۔ اس کے علاوہ، این او ڈبلیو پی ڈی پی نے مستحق افراد میں جدید وہیل چیئرز اور بصارت سے محروم افراد کے لیے سفید چھڑیاں تقسیم کیں، جس سے ان کی روزمرہ زندگی میں آسانی اور خود انحصاری کو فروغ ملے گا۔اس موقع پر مہمانِ خصوصی کمشنر سکھر ڈویژن عابد سلیم قریشی نے خطاب کرتے ہوئے کہا کہ معذور افراد معاشرے کا ایک نہایت اہم اور فعال حصہ ہیں۔ انہوں نے کہا کہ “ان کی فلاح و بہبود، تعلیم، صحت اور سماجی شمولیت کے لیے ہر سطح پر بھرپور تعاون جاری رکھا جائے گا۔ حکومت سندھ اور ضلعی انتظامیہ معذور افراد کے مسائل حل کرنے اور انہیں بااختیار بنانے کے لیے پرعزم ہے۔” انہوں نے این او ڈبلیو پی ڈی پی اور پاکستان بیت المال کی کاوشوں کو سراہتے ہوئے کہا کہ ایسی تقریبات معذور افراد کے چہروں پر مسکراہٹ لانے کا ذریعہ بنتی ہیں۔ریجنل ڈائریکٹر ڈی ای پی ڈی عبد القدوس میمن نے اپنے خطاب میں کہا کہ ڈی ای پی ڈی کمپلیکس میں معذور افراد کی سہولت کے لیے بہتر انتظامات کیے جا رہے ہیں اور مستقبل قریب میں مزید جدید آلات اور تربیتی پروگرام متعارف کرائے جائیں گے۔ اسسٹنٹ ڈائریکٹر پاکستان بیت المال شبیر احمد میمن نے بتایا کہ بیت المال معذور افراد اور مستحق خاندانوں کی مدد کے لیے ہمیشہ پیش پیش ہے، اور مالی امداد کی اس اسکیم کے تحت سکھر میں درجنوں افراد مستفید ہو چکے ہیں۔تقریب کے اختتام پر این او ڈبلیو پی ڈی پی کے عہدیداروں نے شرکا کا شکریہ ادا کرتے ہوئے کہا کہ وہ سکھر میں معذور افراد کی سہولت اور بااختیاری کے فروغ کے لیے اپنی مسلسل کاوشیں جاری رکھیں گے۔ انہوں نے بتایا کہ مستقبل میں بھی اس قسم کی تقسیم کی تقریبات اور آگاہی سیمینارز کا انعقاد کیا جائے گا تاکہ معذور افراد کو معاشرے کا فعال شہری بنایا جا سکے۔تقریب کے شرکا نے حکام اور فلاحی اداروں کا شکریہ ادا کرتے ہوئے مزید ایسے اقدامات کرنے کا مطالبہ کیا، تاکہ سکھر ڈویژن کے دور دراز علاقوں میں رہنے والے معذور افراد بھی ان سہولیات سے مستفید ہو سکیں۔