سکھر میں ٹریفک نظم و نسق کا معائنہ، شہریوں کی حفاظت کے لیے پولیس کی مشترکہ کوششیں
سکھر میں ٹریفک نظم و نسق کا معائنہ، شہریوں کی حفاظت کے لیے پولیس کی مشترکہ کوششیں
سکھر (بیورو رپورٹ)ایس ایس پی سکھر اظہر خان کی خصوصی ہدایات پر شہر میں ٹریفک کی روانی برقرار رکھنے اور شہریوں کو تحفظ فراہم کرنے کے لیے ضلعی پولیس اور ٹریفک پولیس کی مشترکہ کوششیں جاری ہیں۔اس سلسلے میں گزشتہ روز سکھر کے کوئینز روڈ پر ٹریفک کی روانی کو بہتر بنانے کے لیے ٹریفک سارجنٹ عبدالستار انصاری نے ضلعی پولیس کے سب انسپکٹر (ایس آئی) لالہ ممتاز کے ہمراہ دورہ کیا۔ دورے کے دوران روڈ کے کنارے بے ترتیب طور پر کھڑی گاڑیوں کو ہٹایا گیا تاکہ ٹریفک کی آمدورفت میں رکاوٹ نہ ہو اور راستوں کو کشادہ کیا جا سکے۔دورے کے دوران ایس آئی لالہ ممتاز نے اپنی ٹیم کے ساتھ کوئینز روڈ کے مختلف مقامات پر شہریوں کے لیے حفاظتی انتظامات کا جائزہ لیا اور موقعے پر تعینات پولیس اہلکاروں کو ہدایات دیں کہ وہ شہریوں کی جان و مال کے تحفظ کو یقینی بنانے کے لیے اپنی ذمہ داریاں بھرپور طریقے سے ادا کریں۔شہر میں ٹریفک کی روانی برقرار رکھنے اور شہریوں کے تحفظ کے لیے ضلعی پولیس اور ٹریفک پولیس کی ان مشترکہ کوششوں کو تاجر برادری نے سراہا ہے۔ تاجر رہنماؤں نے ایس ایس پی سکھر سمیت پولیس اہلکاروں کا شکریہ ادا کیا اور امید ظاہر کی کہ اس قسم کی کوششیں مستقبل میں بھی جاری رہیں گی۔یہ اقدام شہریوں کو بہتر سفری سہولیات فراہم کرنے اور حادثات کے امکانات کو کم کرنے کے عزم کا مظہر ہے۔ واضح رہے کہ کوئینز روڈ سکھر کے مصروف ترین شاہراہوں میں سے ایک ہے جہاں ٹریفک کے مسائل کو حل کرنے کے لیے پولیس انتظامیہ مسلسل کوشاں ہے۔