ایڈووکیٹ ملک حمید اللہ جسرا — ایک ہردلعزیز سماجی شخصیت خصوصی تحریر: راجہ نورالہی عاطف
ایڈووکیٹ ملک حمید اللہ جسرا — ایک ہردلعزیز سماجی شخصیت
خصوصی تحریر: راجہ نورالہی عاطف
دنیا میں کچھ لوگ اپنے خلوص، انسان دوستی اور عوامی خدمت کے جذبے سے دوسروں کے دلوں میں وہ مقام حاصل کر لیتے ہیں جو کسی عہدے یا دولت سے حاصل نہیں کیا جا سکتا۔ ایڈووکیٹ ملک حمید اللہ جسرا بھی انہی نیک سیرت اور دردِ دل رکھنے والی شخصیات میں سے ہیں جنہوں نے اپنی زندگی کو عوامی فلاح و بہبود اور معاشرتی اصلاح کے لیے وقف کر رکھا ہے۔ ملک حمید اللہ جسرا کا تعلق پیلووینس سے ہے ۔ وہ یہاں کی جسرا فیملی کے قابل فخر سپوت ہیں۔ موصوف انتہائ ہردلعزیز ، پروقار،بردبار ، ملنسار اور ہنس مکھ شخصیت کے مالک ہیں.
ایڈووکیٹ ملک حمید اللہ جسرا کا شمار ضلع خوشاب کے اُن نامور سماجی و عوامی خدمتگاروں میں ہوتا ہے جنہوں نے اپنی عملی زندگی میں ہمیشہ اصول، انصاف اور دیانت داری کو اپنا شعار بنایا۔ بطور وکیل، اُنہوں نے نہ صرف کمزور اور پسے ہوئے طبقے کے حقوق کے تحفظ میں نمایاں کردار ادا کیا بلکہ ہر مظلوم کی آواز بن کر عدلیہ کے دروازے تک پہنچایا۔ اُن کا ماننا ہے کہ انصاف صرف عدالت کے کمرے تک محدود نہیں ہونا چاہیے، بلکہ معاشرے کے ہر فرد تک پہنچنا چاہیے۔
راقم الحروف (راجہ نورالہی عاطف) کو دیگر ذرائع ابلاغ کے نمائندگان کے ہمراہ متعدد بار تھل کے سرمایہء افتخار ایڈووکیٹ ملک حمید اللہ جسرا کے ساتھ مختلف حوالوں سے میڈیا ٹاک کا موقع ملا ۔ انہیں ہمیشہ اپنی وکلاء برادری اور سماجی فلاح و بہبود کےلیے پرعزم پایا۔ انسان دوستی اور خدمتِ خلق ملک حمید اللہ جسرا کی شخصیت کا نمایاں وصف ہے۔ وہ ہر خوشی اور غم کے موقع پر اپنے علاقے کے لوگوں کے ساتھ کھڑے نظر آتے ہیں۔ ضرورت مندوں کی مدد کرنا، غریب طلبہ کے لیے تعلیمی اخراجات برداشت کرنا اور بیماروں کے علاج میں معاونت کرنا اُن کے معمولاتِ زندگی کا حصہ ہے۔ ان کے ان فلاحی اقدامات نے انہیں ایک ایسی ہردلعزیز شخصیت بنا دیا ہے جس پر عوام کو فخر ہے۔ ملک حمید اللہ جسرا نہ صرف اپنے آبائ علاقہ پیلووینس بلکہ ضلع خوشاب میں نہایت عزت و احترام کی نظر سے دیکھے جاتے ہیں۔ دوست پروری ان کی شخصیت کے اوصاف حمیدہ میں سے ان کا ایک خصوصی وصف ہے وہ اپنے دوستوں کو دل و جان سے عزیز رکھتے ہیں۔
ایڈووکیٹ ملک حمید اللہ جسرا کی گفتار میں شائستگی اور کردار میں وقار جھلکتا ہے۔ وہ ہمیشہ نوجوانوں کو مثبت سوچ، محنت اور ایمانداری کا درس دیتے ہیں۔ اُن کا ماننا ہے کہ ایک باشعور اور تعلیم یافتہ نوجوان ہی معاشرے کی ترقی کی حقیقی ضمانت ہے۔ اسی مقصد کے تحت وہ اپنے علاقے میں سماجی آگہی مہمات اور تعلیمی بیداری کے پروگراموں کی سرپرستی کرتے رہتے ہیں۔
ان کی سادہ طبیعت، منکسر المزاجی اور خدمت کا جذبہ انہیں اپنے حلقے میں ایک ممتاز مقام عطا کرتا ہے۔ سیاسی یا سماجی وابستگی سے بالاتر ہو کر وہ ہر طبقے کے لوگوں سے یکساں محبت اور عزت کا سلوک کرتے ہیں۔ یہی وجہ ہے کہ لوگ انہیں نہ صرف ایک کامیاب وکیل بلکہ ایک مخلص دوست، رہنما اور محسن کے طور پر پہچانتے ہیں۔ تحصیل بارایسوسی ایشن نورپورتھل کے عہدیدار کی حیثیت سے انہوں نے اپنے دور میں وکلاء صاحبان کےلیے گرانقدر خدمات سر انجام دیں۔ آخر پر یہ کہا جا سکتا ہے کہ ایڈووکیٹ ملک حمید اللہ جسرا جیسے افراد معاشرے کا سرمایہ ہوتے ہیں۔ ان کی زندگی اس بات کی عملی مثال ہے کہ اگر نیت نیک ہو اور ارادے مضبوط، تو فردِ واحد بھی معاشرتی بہتری کا چراغ روشن کر سکتا ہے۔