بیو رو چیف مرزا خورشید بیگ میلسوی مرحوم کی یاد میں* ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ( ایک پروقار اور شاندار نعتیہ مشاعرہ)
بیو رو چیف مرزا خورشید بیگ میلسوی مرحوم کی یاد میں*
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
( ایک پروقار اور شاندار نعتیہ مشاعرہ)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رپورٹ: ڈاکٹر مظہر حسین مظہر
جنرل سیکرٹری میلسی رائٹرز فورم پاکستان
۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔
میلسی رائٹرز فورم پاکستان اور بزمِ سخن کے اشتراک سے سیرت ایوارڈ یافتہ نام ور شاعر مرزا خورشید بیگ میلسوی کی یاد میں ایک شاندار اور پروقار نعتیہ محفل مشاعرہ گورنمنٹ ہائی سکول میلسی میں منعقد ہوئی۔ یہ محفل نہ صرف عقیدت و محبتِ رسول ﷺ کا حسین مظہر تھی بلکہ میلسی کی علمی و شعری روایت کا خوبصورت تسلسل بھی ثابت ہوئی۔ تقریب کی صدارت معروف شاعر و ادبی شخصیت جناب عدیم عباس قریشی نے فرمائی، جبکہ مہمانانِ خصوصی میں جناب ندیم بھابھہ، جناب شیرافگن جوہر، جناب سید طاہر، جناب ابراہیم حسان اور جناب تحسین یزدانی( پرنسپل گورنمنٹ ہائی سکول میلسی)شامل تھے۔
محفل کا آغاز روح پرور تلاوتِ کلامِ پاک سے ہوا جس کی سعادت اعجاز غدیری نے حاصل کی، جب کہ حامد رضا نے گلہائے نعتِ رسولِ مقبول ﷺ والہانہ عقیدت واحترام سے پیش کیے
تقریب کی نظامت جناب علی حسین جاوید نے نہایت خوش اسلوبی اور سلیقے سے انجام دی، انہوں نے اپنی شستہ گفتگو اور مرزا خورشید بیگ میلسوی کے فکر و فن پر تنقیدی تبصروں سے محفل کو رواں رکھا۔
مشاعرے میں درج ذیل شعرائے کرام نے بارگاہ نبوت مآب میں نعت نذرانے پیش کیے :
عباس عدیم قریشی، ندیم خان بھابھہ، مرید عباس خاور، تحسین یزدانی، شیر افگن جوہر، ابراہیم حسان، سید طاہر، شہزاد جعفری، اعجاز احمد، فرہاد رومی، ڈاکٹر مظہرحسین مظہر، علی حسین جاوید، خرم جمیل، خوشی محمد ساجد، یاسر عباس فراز، نعیم عباس ساجد، اعجاز رضا غدیری، محسن عباس، معظم پاشا، اے بی شہزاد، دلاور عباس راز، اعجاز دانش اور دیگر۔
تمام شعراء کرام نے حضور سرورِ کائنات ﷺ کی بارگاہ میں عقیدت و محبت کے پھول نچھاور کیے۔ ان کے ہر شعر و مصرع میں اخلاص، عقیدت اور فن کا حسین امتزاج نمایاں تھا۔
دورانِ محفل مرزا خورشید بیگ میلسوی کی خدماتِ ادب و نعت گوئی پر ندیم خان بھابھہ، مرید عباس خاور ، تحسین یزدانی ، ڈاکٹر شفیق الرحمن اور ڈاکٹر مظہر حسین مظہر نے خراجِ تحسین پیش کرتے ہوئے کہا کہ مرزا خورشید بیگ میلسوی کی نعتیہ خدمات لائق صد ستائش ہونے کے ساتھ لائق تقلید بھی ہیں۔ ان کے دونوں مجموعہ ہائے نعت جمال نظر اور محراب نعت پر قومی سیرت ایوارڈ کا اجراء ان کی فنی پختگی کا بین ثبوت ہے۔ مرزا خورشید بیگ میلسوی نے اپنی نعتیہ شاعری میں سادگی، خلوص اور عقیدت کو اس طرح سمویا کہ اُن کا کلام میلسی ہی نہیں بلکہ پورے جنوبی پنجاب میں نعتیہ ادب کا معتبر حوالہ بن گیا۔ اُن کی یاد میں یہ محفل دراصل اُن کی علمی و روحانی وراثت کا تسلسل ہے
اختتام پر اُن کی روح کے ایصالِ ثواب کے لیے دعا کی گئی۔
محفل کا ماحول روحانی کیف و سرور سے لبریز رہا۔ حاضرینِ محفل نے اسے میلسی کی ادبی تاریخ کا ایک یادگار باب قرار دیا یہ مشاعرہ پانچ گھنٹے تک مسلسل جاری رہا۔ تقریب کے انتظام و انصرام میں اراکین فورم ڈاکٹر شفیق الرحمن الہ آبادی، شاہد حفیظ، کامران خالد، شرف دین آکاش اور مظہر قادر پیش پیش رہے۔
۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔ ۔۔۔۔۔ ۔۔۔۔