November 17, 2026

“ڈرون… آسمان پر نیا خوف”

IMG-20251003-WA0256

“ڈرون… آسمان پر نیا خوف”

دنیا کی تاریخ میں جنگیں ہمیشہ بارود، توپ اور ٹینک سے جیتی اور ہاری جاتی رہی ہیں۔ لیکن اکیسویں صدی نے جنگ کے ہتھیار بدل دیے ہیں۔ اب دشمن کسی سرحد پر فوجیں نہیں اتارتا، نہ ہی جہازوں کے بیڑے بھیجتا ہے، بلکہ آسمان پر اڑتے ہوئے چھوٹے سے “ڈرون” کے ذریعے خوف اور دہشت پھیلا دیتا ہے۔ ڈنمارک میں حالیہ دنوں ڈرون کے “ممکنہ حملے” کی خبریں سامنے آئی ہیں جنہوں نے پورے یورپ میں ہلچل مچا دی ہے۔

ایک طرف یہ کہا جا رہا ہے کہ ڈنمارک کے مختلف ہوائی اڈوں پر ڈرونز کو مشکوک انداز میں دیکھا گیا۔ دوسری طرف حکام اسے “ہائبرڈ حملے” کا خدشہ قرار دے رہے ہیں۔ ہائبرڈ حملہ یعنی ایسا وار جو بظاہر فوجی نہ ہو مگر ریاست کی اعصاب شکن کمزوریوں کو ہدف بنائے۔ اس تناظر میں ڈرون محض کیمرا یا کھلونا نہیں رہا، بلکہ ایک ایسا ہتھیار بن گیا ہے جو بڑے بڑے سکیورٹی سسٹمز کو چکرا دیتا ہے۔

سوچنے کی بات یہ ہے کہ ڈنمارک کوئی جنگ زدہ ملک نہیں۔ یہ وہ خطہ ہے جہاں امن، خوشحالی اور بہبود کی مثالیں دی جاتی ہیں۔ لیکن جب ایسے پرامن ملک کے آسمان پر ڈرون کی پرچھائیاں پڑنے لگیں تو سوال یہ پیدا ہوتا ہے کہ محفوظ کون ہے؟ کیا آج کی دنیا میں کوئی ملک واقعی اپنی فضاؤں کو محفوظ کہہ سکتا ہے؟

ڈرون ٹیکنالوجی نے جہاں سہولت دی ہے، وہیں ایک نئی تباہی کے دروازے بھی کھول دیے ہیں۔ آج یہی ڈرونز کھیتوں میں کھاد ڈالنے اور فصلوں کی نگرانی کے لیے استعمال ہو رہے ہیں۔ یہی ڈرونز شادی کی فلم بندی کرتے ہیں، اور یہی ڈرونز پیزا ڈلیور کرتے ہیں۔ لیکن لمحہ بھر میں یہی مشین دہشت کا نشان بھی بن سکتی ہے۔ افغانستان، یمن اور فلسطین میں ڈرون حملوں کی داستانیں ابھی مٹی بھی نہیں ہوئیں کہ اب یورپ میں بھی اس کا خوف جاگنے لگا ہے۔

یہ بھی حقیقت ہے کہ ڈرون حملہ ہمیشہ بم گرنے تک محدود نہیں ہوتا۔ کبھی یہ سائبر حملے کی شکل میں سامنے آتا ہے، کبھی یہ محض نگرانی کے لیے استعمال ہوتا ہے تاکہ دشمن کے اعصاب پر قبضہ کیا جا سکے۔ ڈنمارک میں موجود خدشات اسی سمت اشارہ کر رہے ہیں۔ یعنی یہاں اصل حملہ شاید بارود سے نہ ہو بلکہ “اعتماد” پر ہو۔ اگر ایک ملک کو یہ احساس ہو جائے کہ اس کے آسمان محفوظ نہیں، تو اس کی معیشت، سیاحت اور عوامی اعتماد سب کچھ متزلزل ہو جاتا ہے۔

اب سوال یہ ہے کہ دنیا کہاں جا رہی ہے؟ کل تک ایٹم بم سب سے بڑا خوف تھے۔ پھر میزائلوں کا زمانہ آیا۔ آج چھوٹے چھوٹے ڈرونز کسی ایٹمی ہتھیار سے زیادہ خوفناک دکھائی دیتے ہیں کیونکہ یہ کہیں سے بھی آ سکتے ہیں اور کسی بھی لمحے وار کر سکتے ہیں۔

یورپ کے ماہرین دفاعی طور پر نئے نئے فارمولے سوچ رہے ہیں: “اینٹی ڈرون گنز”، “الیکٹرانک جیمرز”، “لیزر سسٹمز”۔ مگر دلچسپ بات یہ ہے کہ جس ڈرون کو کوئی دہاڑی دار کیمرہ مین پانچ سو ڈالر میں خرید سکتا ہے، اس کو روکنے کے لیے اربوں ڈالر کے منصوبے بنائے جا رہے ہیں۔ یہ ہے جدید دنیا کا المیہ کہ چھوٹا سا کھلونا بھی بڑی بڑی ریاستوں کے لیے ڈراؤنا خواب بن گیا ہے۔

ڈنمارک کے خدشات ہمیں یہ بتاتے ہیں کہ جنگ اب صرف محاذوں پر نہیں لڑی جا رہی، بلکہ فضاؤں، ڈیٹا، اور اعصاب پر بھی لڑی جا رہی ہے۔ دنیا کو اب یہ سمجھنا ہوگا کہ “امن” صرف فوجی طاقت سے نہیں آتا بلکہ ٹیکنالوجی کے ضمیر اور اس کے استعمال سے آتا ہے۔ ورنہ ممکن ہے کل کوئی بچہ کھیلنے والا ڈرون اڑائے اور پورا شہر یہ سمجھے کہ حملہ ہو گیا ہے۔

آخر میں سوال یہ ہے: کیا انسان نے واقعی ترقی کی ہے یا صرف اپنے خوف کو زیادہ مہنگا اور پیچیدہ بنا لیا ہے؟ ڈنمارک کی فضاؤں پر منڈلاتا یہ ڈرون اس سوال کا تازہ ثبوت ہے۔

@@@@@@@@@@@@@@@