November 17, 2026

ادیبوں اور لکھاریوں کا قومی ترقی میں کردار خصوصی تحریر : راجہ نورالہیٰ عاطف

IMG-20250905-WA0281

ادیبوں اور لکھاریوں کا قومی ترقی میں کردار

خصوصی تحریر : راجہ نورالہیٰ عاطف

قوموں کی ترقی کا راز صرف معاشی اور سائنسی میدان کی کامیابیوں میں نہیں، بلکہ فکری اور تہذیبی بیداری میں بھی پوشیدہ ہے۔ درحقیقت یہی بیداری اہلِ قلم اور لکھاری پیدا کرتے ہیں۔ وہ معاشرے کو خواب بھی دکھاتے ہیں اور ان خوابوں کو حقیقت کا روپ دینے کی سمت بھی متعین کرتے ہیں۔
پاکستان کی تحریک محض سیاسی جدوجہد نہیں تھی بلکہ ایک فکری اور ادبی تحریک بھی تھی۔ علامہ محمد اقبال کے اشعار نے مسلمانوں کو خودی اور آزادی کا شعور دیا، مولانا ظفر علی خان نے اپنی صحافت کے ذریعے عوام میں انقلابی جوش جگایا اور دیگر اہلِ قلم نے اپنی تحریروں سے ایک خواب کو حقیقت میں ڈھالنے میں کردار ادا کیا۔
ادیب ہمیشہ معاشرے کے نبض شناس ہوتے ہیں۔ سعادت حسن منٹو نے تلخ حقیقتوں کو اجاگر کیا، فیض احمد فیض نے ناانصافی اور ظلم کے خلاف آواز بلند کی، جبکہ اشفاق احمد اور بانو قدسیہ نے محبت، برداشت اور اخوت کا درس دیا۔ ان کی تحریریں قوم کی فکری اور اخلاقی تربیت کا ذریعہ بنیں۔
ڈیجیٹل میڈیا اور سوشل پلیٹ فارمز کے دور میں ادیبوں اور لکھاریوں کا کردار مزید اہم ہو گیا ہے۔ آج کے لکھاری نہ صرف روایتی کتابوں یا اخبارات کے ذریعے بلکہ سوشل میڈیا کے ذریعے بھی لاکھوں قارئین تک اپنی بات پہنچا سکتے ہیں۔ موجودہ دور کے مسائل پر لکھنا دراصل قوم کو آئینہ دکھانا اور اصلاح کی طرف مائل کرنا ہے۔
قوم کا مستقبل نوجوانوں کے ہاتھوں میں ہے۔ نوجوان اگر ماضی کے عظیم لکھاریوں اور موجودہ دور کے اہلِ قلم کی تحریروں کو پڑھیں تو ان میں شعور، خود اعتمادی اور حب الوطنی پیدا ہو گی۔ یہی تربیت انہیں بہتر شہری اور پاکستان کا حقیقی سرمایہ بنائے گی۔
شاعر مشرق ڈاکٹر علامہ محمد اقبال نے نوجوانوں کو یوں پکارا تھا:

“نہیں ہے ناامید اقبال اپنی کشتِ ویراں سے،
ذرا نم ہو تو یہ مٹی بڑی زرخیز ہے ساقی”

آج کے حالات میں ادیبوں اور لکھاریوں کو محض الفاظ تک محدود نہیں رہنا چاہیے بلکہ عملی میدان میں بھی رہنمائی فراہم کرنی چاہیے۔ چند تجاویز درج ذیل ہیں:ادیبوں کو اپنے کالمز، مضامین اور تحریروں میں تعلیم کی اہمیت اجاگر کرنی چاہیے تاکہ معاشرے میں شعور اور آگہی بڑھے۔
فرقہ واریت، لسانیت اور تعصب کے خاتمے کے لیے ادب کو ایک مؤثر ہتھیار کے طور پر استعمال کیا جانا چاہیے۔بدلتے موسم اور ماحولیاتی چیلنجز پر لکھ کر عوام اور ارباب بست وکشاد کو ذمہ داری کا احساس دلانا ضروری ہے۔ نئی نسل کو مثبت سوچ، برداشت اور محنت کا سبق دینا ادیبوں کی بنیادی ذمہ داری ہے۔ موجودہ دور میں اہلِ قلم کو چاہیے کہ وہ اپنی تحریروں کو صرف اخبارات تک محدود نہ رکھیں بلکہ ڈیجیٹل پلیٹ فارمز کے ذریعے زیادہ سے زیادہ قارئین کرام تک پہنچائیں۔
ارباب اختیار کو چاہیے کہ وہ اہلِ قلم کو علمی و فکری مجالس کے عمل میں شامل کریں تاکہ ادیبوں اور لکھاریوں کی بصیرت سے ملک کو فائدہ پہنچے۔
المختصر ادیب اور لکھاری قوم کی آنکھ اور دل کی آواز ہیں۔ تحریکِ پاکستان سے لے کر آج تک انہوں نے ہمیشہ اپنی ذمہ داری ادا کی ہے۔ لیکن موجودہ حالات میں ان کا کردار پہلے سے کہیں زیادہ اہم ہے۔ اگر وہ اپنی تحریروں کو اصلاحِ معاشرہ، قومی یکجہتی اور نوجوان نسل کی رہنمائی کے لیے بروئے کار لائیں تو پاکستان ترقی اور خوشحالی کی نئی منزلیں طے کر سکتا ہے۔ بقول شخصے:۔

“قلم کی حرمت رکھنا، یہی چراغِ راہ ہے،
اسی کی لو سے روشن ہے ہر سفر کی راہگزر”