ضلع خوشاب میں خواتین کی سیاسی فعالیت اور تنظیم سازی خصوصی تحریر: راجہ نورالٰہی عاطف
ضلع خوشاب میں خواتین کی سیاسی فعالیت اور تنظیم سازی
خصوصی تحریر: راجہ نورالٰہی عاطف
خوشاب کی سیاسی فضا میں پاکستان مسلم لیگ (ن) خواتین ونگ کی تنظیم سازی کے حوالے سے ایک اہم پیش رفت سامنے آئی ہے۔ پاکستان مسلم لیگ (ن) ہاؤس جوہرآباد میں خواتین ونگ کی مرکزی، صوبائی اور ڈویژنل قیادت کی خصوصی نشست اس امر کی غماز ہے کہ آنے والے بلدیاتی انتخابات کے تناظر میں خواتین کی سیاسی شمولیت کو مزید مؤثر اور منظم بنانے پر خصوصی توجہ دی جا رہی ہے۔
اس اہم نشست میں پاکستان مسلم لیگ (ن) خواتین ونگ پاکستان کی صدر و رکن قومی اسمبلی نزہت صادق، پاکستان مسلم لیگ (ن) خواتین ونگ پنجاب کی صدر و رکن قومی اسمبلی نوشین افتخار اور سرگودھا ڈویژن کی صدر و رکن قومی اسمبلی تمکین اختر نیازی نے خصوصی شرکت کی۔ اس موقع پر پاکستان مسلم لیگ (ن) ضلع خوشاب کے صدر اور سابق سینیٹر ڈاکٹر غوث محمد خان نیازی بھی موجود تھے۔
نشست کے دوران خواتین ونگ کی عہدیداران سے تفصیلی ملاقات اور خطاب کرتے ہوئے خواتین قیادت نے اس بات پر زور دیا کہ سیاسی جماعت کی مضبوطی کے لیے تنظیمی ڈھانچے کا فعال اور مربوط ہونا ناگزیر ہے۔ انہوں نے خواتین ونگ کی عہدیداران پر زور دیا کہ باہمی اختلافات کو پسِ پشت ڈال کر اتحاد، اتفاق اور باہمی تعاون کے ساتھ پارٹی کو نچلی سطح تک منظم کیا جائے۔
یہ امر خوش آئند ہے کہ مسلم لیگ (ن) کی قیادت نے خواتین کی سیاسی صلاحیتوں اور خدمات کو تسلیم کرتے ہوئے انہیں آنے والے بلدیاتی انتخابات میں فعال کردار ادا کرنے کی ترغیب دی ہے۔ پنجاب کی وزیر اعلیٰ مریم نواز شریف کی جانب سے بھی مختلف شعبہ ہائے زندگی میں خواتین کی بھرپور شرکت اور محنت کو سراہا جاتا ہے اور یہی سوچ سیاسی میدان میں خواتین کے مؤثر کردار کی متقاضی ہے۔
خواتین کسی بھی معاشرے کا نصف سے زیادہ حصہ تشکیل دیتی ہیں اور ان کی سیاسی، سماجی اور انتظامی معاملات میں شمولیت جمہوری عمل کو مزید مضبوط بناتی ہے۔ خصوصاً بلدیاتی نظام میں خواتین کی شرکت انتہائی اہمیت رکھتی ہے، کیونکہ خواتین مقامی سطح پر عوامی مسائل، بنیادی سہولیات، تعلیم، صحت، صفائی، خواتین اور بچوں کے مسائل سمیت متعدد معاملات کو بہتر طور پر اجاگر کرنے اور ان کے حل کے لیے مؤثر کردار ادا کر سکتی ہیں۔
نشست میں خواتین ونگ کی تنظیم سازی کو مزید فعال بنانے کے لیے ایک ماہ کے اندر یونین کونسل کی سطح تک تنظیم سازی مکمل کرنے کی ہدایت بھی اہم پیش رفت ہے۔ اگر یہ عمل منظم حکمت عملی، میرٹ اور باصلاحیت کارکنوں کی شمولیت کے ساتھ مکمل کیا جائے تو اس کے نتیجے میں مسلم لیگ (ن) کا خواتین ونگ نچلی سطح پر ایک مضبوط اور متحرک سیاسی قوت کے طور پر سامنے آ سکتا ہے۔
خواتین ونگ کی مضبوط تنظیم سازی صرف عہدیداران کے تقرر کا نام نہیں بلکہ یہ ایک مسلسل سیاسی عمل ہے، جس میں کارکنوں سے رابطہ، عوامی مسائل کی نشاندہی، سیاسی شعور کی بیداری اور پارٹی منشور کو عوام تک پہنچانا بنیادی اہمیت رکھتا ہے۔ اس مقصد کے لیے ضروری ہے کہ خواتین کارکنوں کو مناسب سیاسی تربیت، رہنمائی اور آگے بڑھنے کے مساوی مواقع فراہم کیے جائیں۔
خوشاب جیسے ضلع میں خواتین کی سیاسی فعالیت کے وسیع امکانات موجود ہیں۔ اگر مسلم لیگ (ن) خواتین ونگ مقامی سطح پر خواتین کارکنوں کو متحرک کرکے انہیں عوامی رابطہ مہم کا حصہ بناتی ہے تو نہ صرف پارٹی کی تنظیمی قوت میں اضافہ ہوگا بلکہ خواتین کے مسائل کو بھی مؤثر انداز میں سیاسی پلیٹ فارم پر اجاگر کیا جا سکے گا۔
مجموعی طور پر پاکستان مسلم لیگ (ن) ہاؤس جوہرآباد میں منعقدہ یہ خصوصی نشست محض ایک تنظیمی اجلاس نہیں بلکہ خواتین کو سیاسی عمل میں مزید فعال بنانے کی جانب ایک اہم قدم قرار دی جا سکتی ہے۔ سیاسی مبصرین کے مطابق اگر قیادت اور کارکنان باہمی اعتماد، اتحاد اور مشترکہ حکمت عملی کے ساتھ آگے بڑھیں تو مسلم لیگ (ن) خواتین ونگ ضلع خوشاب میں ایک مضبوط، منظم اور متحرک سیاسی کردار ادا کرنے کی بھرپور صلاحیت رکھتی ہے۔
