*عمرکوٹ رپورٹ: بیوروچیف ڈاکٹر ایم لال واگھانی*
*مسلم ہینڈز پاکستان کی جانب سے سامارو میں فرسٹ ایڈ ٹریننگ کا انعقاد*
عمرکوٹ* — مسلم ہینڈز پاکستان کے ایریا آفس سامارو، ضلع عمرکوٹ میں NFE فیسلیٹیٹرز اور مسلم ہینڈز عمرکوٹ کی ٹیم کے لیے ایک روزہ فرسٹ ایڈ ٹریننگ سیشن کا انعقاد کیا گیا۔
تفصیلات کے مطابق ٹریننگ کا مقصد عملے کو ہنگامی حالات میں فوری اور مؤثر طبی امداد فراہم کرنے کے قابل بنانا تھا۔
سیشن کے دوران عملی مظاہروں، گروپ ایکٹیویٹیز اور انٹرایکٹو سیشنز کے ذریعے شرکاء کو فرسٹ ایڈ کے بنیادی اصولوں سے آگاہ کیا گیا۔ ٹرینرز نے شرکاء کو مختلف قسم کی چوٹوں کی ابتدائی دیکھ بھال، زخموں پر پٹی باندھنے، بے ہوشی، سانس کی بندش اور دیگر ہنگامی صورتحال میں فوری ردِعمل کے طریقے سکھائے۔
ٹریننگ میں مشکل حالات میں بروقت اقدامات کی اہمیت پر بھی خصوصی زور دیا گیا۔ عملی مشقوں کے ذریعے تمام اسٹاف اور فیسلیٹیٹرز کو فرسٹ ایڈ کے طریقہ کار کو بہتر طور پر سمجھنے اور حقیقی صورتحال میں اعتماد کے ساتھ استعمال کرنے کی تربیت دی گئی۔
مسلم ہینڈز انتظامیہ کا کہنا ہے کہ اس طرح کی تربیت کا مقصد فیلڈ میں کام کرنے والی ٹیموں کو کسی بھی ناخوشگوار واقعے کی صورت میں بروقت مدد فراہم کرنے کے لیے تیار کرنا ہے تاکہ قیمتی جانوں کو بچایا جا سکے۔
ٹریننگ کے اختتام پر شرکاء نے اسے انتہائی مفید قرار دیتے ہوئے مستقبل میں بھی اس طرح کے سیشنز کے انعقاد کا مطالبہ کیا۔
