وی سی گومل یونیورسٹی ڈاکٹر ظفر اقبال کی کمشنر ڈیرہ ڈویژن دائود خان سے ملاقات۔
ڈاکٹر ظفر اقبال نے انہیں یونیورسٹی میں جاری تعلیمی، انتظامی اقدامات کے بارے میں تفصیلی بریفنگ دی۔
ڈیرہ اسماعیل خان(نمائندہ خصوصی)گلوبل ٹائمز میڈیا یورپ کے مطابق گومل یونیورسٹی کے وائس چانسلر پروفیسر ڈاکٹر ظفر اقبال نے کمشنر ڈیرہ ڈویژن دائود خان سے ان کے دفتر میں ملاقات کی اور انہیں یونیورسٹی میں جاری تعلیمی، انتظامی اور دیگر اصلاحاتی اقدامات کے بارے میں تفصیلی بریفنگ دی۔ ملاقات کے دوران وائس چانسلر نے گومل یونیورسٹی میں جاری ترقیاتی منصوبوں اور مستقبل کے مجوزہ اقدامات سے بھی آگاہ کیا۔ اس موقع پر اعلی تعلیم کے فروغ، ادارہ جاتی ترقی، طلبہ کی فلاح و بہبود اور تعلیمی معیار کی بہتری سے متعلق مختلف امور پر تبادلہ خیال کیا گیا۔ کمشنر ڈیرہ ڈویژن دائود خان نے گومل یونیورسٹی کی جانب سے تعلیمی بہتری اور ترقی کے لیے کی جانے والی کاوشوں کو سراہتے ہوئے خطے میں معیاری تعلیم کے فروغ کے لیے ہر ممکن تعاون کی یقین دہانی کرائی۔ملاقات کے اختتام پر وائس چانسلر پروفیسر ڈاکٹر ظفر اقبال نے اپنی کتاب ”اسلاموفوبیا ”کمشنر ڈیرہ ڈویژن دائود خان کو پیش کی۔ کتاب میں مغربی معاشروں میں اسلاموفوبیا کے بڑھتے ہوئے رجحان، مسلمانوں کے بارے میں پائے جانے والے منفی تصورات، ان کے اسباب، مختلف مظاہر اور ان کے ممکنہ حل پر تفصیلی بحث کی گئی ہے۔ مصنف نے اس مسئلے سے نمٹنے کے لیے مسلم دنیا کے کردار اور ذمہ داریوں پر بھی روشنی ڈالی ہے۔ کمشنر ڈیرہ ڈویژن دائود خان نے کتاب میں اٹھائے گئے موضوعات کو اہم قرار دیتے ہوئے اس کا مطالعہ کرنے میں دلچسپی کا اظہار کیا اور جلد گومل یونیورسٹی کا دورہ کرنے کی یقین دہانی بھی کرائی۔
