پروفیسر ڈاکٹر محمد قاسم نے یونیورسٹی آف سوات کے وائس چانسلر کا عہدہ سنبھال لیا۔
پروفیسر ڈاکٹر محمد قاسم اعلی تعلیم، تحقیق اور تعلیمی انتظام و انصرام کے شعبوں میں وسیع تجربہ رکھتے ہیں۔
سوات(نمائندہ خصوصی)گلوبل ٹائمز میڈیا یورپ کے مطابق یونیورسٹی آف سوات کے لیے یہ امر باعثِ مسرت ہے کہ ممتاز ماہرِ تعلیم، محقق اور منتظم پروفیسر ڈاکٹر محمد قاسم نے یونیورسٹی آف سوات کے وائس چانسلر کی حیثیت سے اپنے عہدے کا باقاعدہ چارج سنبھال لیا ہے۔پروفیسر ڈاکٹر محمد قاسم اعلیٰ تعلیم، تحقیق اور تعلیمی انتظام و انصرام کے شعبوں میں وسیع تجربہ رکھتے ہیں۔ انہوں نے یونیورسٹی آف لیڈز، برطانیہ سے پی ایچ ڈی جبکہ ہوکائیڈو یونیورسٹی، جاپان سے پوسٹ ڈاکٹریٹ تحقیق مکمل کی۔ آپ ماحولیاتی و تحفظاتی علوم کے ممتاز پروفیسر ہیں اور موسمیاتی تبدیلی، قدرتی وسائل کے انتظام، زمین کے استعمال میں تبدیلی، آبی وسائل، سیلابی ہائیڈرولوجی اور ہمالیائی ماحولیاتی نظام کے شعبوں میں نمایاں علمی خدمات انجام دے چکے ہیں۔اپنے عہدے کا چارج سنبھالنے کے بعد پروفیسر ڈاکٹر محمد قاسم نے کہا کہ یونیورسٹی آف سوات میں معیاری تعلیم، تحقیق، اختراع اور علمی ترقی کے فروغ کے لیے اپنی تمام تر صلاحیتیں بروئے کار لائیں گے۔ انہوں نے اس عزم کا اظہار کیا کہ یونیورسٹی میں تدریسی اور تحقیقی معیار کو مزید بہتر بنایا جائے گا، جدید تقاضوں سے ہم آہنگ تعلیمی ماحول کو فروغ دیا جائے گا اور قومی و بین الاقوامی اداروں کے ساتھ علمی و تحقیقی روابط کو مزید مستحکم کیا جائے گا۔انہوں نے کہا کہ یونیورسٹی آف سوات خطے کی ایک اہم جامعہ ہے اور اس کی ترقی، تحقیق کے فروغ اور طلبہ کی پیشہ ورانہ و فکری تربیت کے لیے تمام دستیاب وسائل کو مؤثر انداز میں استعمال کیا جائے گا۔ انہوں نے اس بات پر بھی زور دیا کہ نوجوان نسل کو معیاری تعلیم اور تحقیقی مواقع فراہم کرکے انہیں قومی ترقی میں مؤثر کردار ادا کرنے کے قابل بنایا جائے گا۔پروفیسر ڈاکٹر محمد قاسم نے اس عزم کا اعادہ کیا کہ وہ اساتذہ، افسران، ملازمین، طلبہ، سابق طلبہ اور دیگر متعلقہ فریقین کے ساتھ قریبی تعاون کے ذریعے یونیورسٹی آف سوات کو تعلیمی اور تحقیقی میدان میں مزید ممتاز مقام دلانے کے لیے بھرپور کوششیں کریں گے۔یونیورسٹی آف سوات کے اساتذہ، افسران، ملازمین، طلبہ اور سابق طلبہ نے پروفیسر ڈاکٹر محمد قاسم کو وائس چانسلر کا عہدہ سنبھالنے پر مبارکباد پیش کرتے ہوئے ان کے لیے نیک تمناؤں کا اظہار کیا ہے۔
