فاٹا یونیورسٹی میں وائس چانسلر کی زیرِ صدارت شعبہ جاتی سربراہان اور سیکشنل ہیڈز کا اہم اجلاس۔
منعقدہ اجلاس میں فاٹا یونیورسٹی کے مختلف تعلیمی اور انتظامی امور کا تفصیلی جائزہ لیا گیا۔
پشاور(نمائندہ خصوصی)گلوبل ٹائمز میڈیا یورپ کے مطابق فاٹا یونیورسٹی میں وائس چانسلر پروفیسر ڈاکٹر محسن نواز کی زیرِ صدارت تمام شعبہ جاتی سربراہان (HoDs) اور سیکشنل ہیڈز کا ایک اہم اجلاس منعقد ہوا، جس میں جامعہ کے مختلف تعلیمی اور انتظامی امور کا تفصیلی جائزہ لیا گیا۔اجلاس میں اسپرنگ 2026 کے ٹرمینل امتحانات کے انعقاد کے لیے کیے جانے والے انتظامات کا جائزہ لیا گیا۔ وائس چانسلر نے امتحانی عمل کو شفاف، منظم اور میرٹ پر مبنی بنانے کی ہدایت کرتے ہوئے متعلقہ حکام کو تمام ضروری انتظامات بروقت مکمل کرنے کی تاکید کی۔اجلاس میں مالی سال 2026-27 کے بجٹ کی تیاری سے متعلق پیش رفت پر بھی غور کیا گیا۔ مختلف شعبہ جات کی مالی ضروریات، ترقیاتی ترجیحات اور وسائل کے مؤثر استعمال سے متعلق تجاویز کا جائزہ لیا گیا تاکہ جامعہ کی تعلیمی و انتظامی ضروریات کو مدنظر رکھتے ہوئے ایک جامع اور متوازن بجٹ مرتب کیا جا سکے۔مزید برآں، فال 2026 سے نئے تعلیمی پروگرامز کے آغاز کے حوالے سے جاری تیاریوں کا تفصیلی جائزہ لیا گیا۔ وائس چانسلر نے متعلقہ شعبوں کو ہدایت کی کہ نئے پروگرامز کے اجراء کے لیے درکار تمام تعلیمی، انتظامی اور ریگولیٹری تقاضے مقررہ وقت کے اندر مکمل کیے جائیں تاکہ طلبہ کو جدید اور مارکیٹ کی ضروریات سے ہم آہنگ تعلیمی مواقع فراہم کیے جا سکیں۔اس موقع پر پروفیسر ڈاکٹر محسن نواز نے کہا کہ فاٹا یونیورسٹی معیاری تعلیم، تحقیق اور ادارہ جاتی ترقی کے فروغ کے لیے مسلسل کوشاں ہے۔ انہوں نے شعبہ جاتی سربراہان اور سیکشنل ہیڈز پر زور دیا کہ وہ باہمی تعاون، پیشہ ورانہ ذمہ داری اور مؤثر منصوبہ بندی کے ذریعے جامعہ کے اہداف کے حصول میں فعال کردار ادا کریں۔اجلاس کے اختتام پر مختلف شعبہ جات کی کارکردگی، درپیش چیلنجز اور مستقبل کی ترجیحات پر بھی تبادلۂ خیال کیا گیا، جبکہ وائس چانسلر نے ادارہ جاتی بہتری اور تعلیمی معیار کو مزید مستحکم بنانے کے لیے ضروری ہدایات جاری کیں۔
