سکھر: پاکستان میڈیکل ایسوسی ایشن کے نئے عہدیداران کی تقریبِ حلف برداری یکم مئی کو ہوگی
سکھر بیورو چیف سید نصیر حسین زیدی دعا ان لاین نیوز
کھر: پاکستان میڈیکل ایسوسی ایشن (پی ایم اے) سکھر کے نئے عہدیداران برائے سال 2026-27 کی پُروقار تقریبِ حلف برداری یکم مئی بروز جمعہ شام کو سکھر جیمخانہ میں منعقد ہوگی، جس میں شہر بھر سے ڈاکٹرز، طبی ماہرین، سماجی شخصیات اور مختلف شعبہ ہائے زندگی سے تعلق رکھنے والے افراد کی بڑی تعداد کی شرکت متوقع ہے.
تقریب کے مہمانِ خصوصی ڈاکٹر عبدالغفور شورو (سیکریٹری جنرل، پاکستان میڈیکل ایسوسی ایشن سینٹرل) ہوں گے، جبکہ دیگر معزز مہمانوں میں ڈاکٹر دیالی گل (صدر پی ایم اے سندھ) اور ڈاکٹر نظام حسین ببر سمیت سینئر معالجین اور ہیلتھ سیکٹر سے وابستہ اہم شخصیات شامل ہوں گی. تقریب میں نئے عہدیداران اپنے عہدوں کا حلف اٹھائیں گے اور آئندہ سال کے لیے اپنی ترجیحات اور لائحہ عمل بھی پیش کریں گے.
پاکستان میڈیکل ایسوسی ایشن (پی ایم اے) سکھر کے صدر پروفیسر ڈاکٹر ذوالفقار علی سومرو اور جنرل سیکریٹری ڈاکٹر بشیر احمد چانڈیو نے کہا ہے کہ یہ حلف برداری کی تقریب پی ایم اے سکھر کی تاریخ میں ایک اہم اور خوش آئند سنگِ میل ثابت ہوگی. انہوں نے اس عزم کا اظہار کیا کہ تنظیم کو مزید مضبوط، منظم اور فعال بنایا جائے گا تاکہ ڈاکٹروں کو ایک مؤثر پلیٹ فارم فراہم کیا جا سکے.
انہوں نے مزید کہا کہ پی ایم اے سکھر اپنی نئی ٹیم کے ساتھ ایک مضبوط، فعال اور باوقار پلیٹ فارم کی تشکیل کے لیے کوشاں ہے، جہاں ڈاکٹروں کی آواز نہ صرف سنی جائے گی بلکہ ان کے مسائل کو ترجیحی بنیادوں پر حل بھی کیا جائے گا. تنظیم ڈاکٹروں کے پیشہ ورانہ حقوق کے تحفظ، ہسپتالوں میں سہولیات کی بہتری، نوجوان ڈاکٹروں کی تربیت و رہنمائی اور عوامی صحت کے فروغ کے لیے بھرپور کردار ادا کر رہی ہے.
ذرائع کے مطابق تقریب میں صحت کے شعبے کو درپیش چیلنجز، ڈاکٹرز کی سیکیورٹی، سرکاری و نجی ہسپتالوں میں سہولیات کی بہتری اور عوام کو معیاری طبی سہولیات کی فراہمی جیسے اہم موضوعات پر بھی گفتگو کی جائے گی. اس موقع پر مختلف تجاویز اور قراردادیں بھی پیش کیے جانے کا امکان ہے.
پی ایم اے رہنماؤں کا کہنا تھا کہ تنظیم کو ایک مثالی ادارہ بنانے کے لیے اجتماعی کوششیں جاری ہیں، اور آئندہ دور میں ڈاکٹرز اور عوام کے درمیان اعتماد کو مزید مضبوط کیا جائے گا. انہوں نے کہا کہ پی ایم اے نہ صرف ڈاکٹروں کے حقوق کی نگہبان ہے بلکہ عوامی خدمت کے جذبے کے تحت صحت کے شعبے میں مثبت تبدیلی لانے کے لیے بھی سرگرم عمل ہے.
مزید برآں، تقریب میں نمایاں خدمات انجام دینے والے ڈاکٹرز کو اعزازی شیلڈز اور اسناد بھی دی جائیں گی، جبکہ نئے عہدیداران اپنی ذمہ داریاں سنبھالنے کے بعد صحت کے شعبے میں اصلاحات کے لیے عملی اقدامات کا اعلان کریں گے.
پی ایم اے سکھر نے اس عزم کا اعادہ کیا ہے کہ وہ ایک ایسی مضبوط اور بااعتماد تنظیم کے طور پر ابھرے گی جو نہ صرف ڈاکٹر برادری کی ترجمانی کرے بلکہ عوامی فلاح و بہبود میں بھی نمایاں کردار ادا کرے، اور صحت کے نظام کو جدید تقاضوں سے ہم آہنگ بنانے میں کلیدی کردار ادا کرے گی.
