چین نئی عالمی سپر پاور بننے کی دوڑ میں آگے، امریکہ نے جنگ چھیڑ دی: ڈاکٹر سکندر مغل
سکھر(بیورورپورٹسید نصیر حسین زیدی دعا ان لاین نیوز)معروف مصنف، دانشور اور تجزیہ کار ڈاکٹر سکندر مغل نے کہا ہے کہ چین موجودہ دور میں اپنی برتری کو واضح کرنے کی دوڑ میں پیش نظر آ رہا ہے، جبکہ دنیا کی سپر پاور حیثیت کھونے کے خوف سے امریکہ نے نئی جنگ چھیڑ دی ہے۔ ان خیالات کا اظہار انہوں نے ”جاگرتا فورم سکھر“ کے زیر اہتمام ”آرٹس کونسل سکھر“ میں ”جیو پولیٹکس اور عالمی نظاموں میں آنے والی تبدیلیاں“ کے موضوع پر منعقدہ لیکچر کے دوران کیا۔ڈاکٹر سکندر مغل نے بتایا کہ دنیا جاگیرداری، سرمایہ داری اور بادشاہتوں سے لے کر سلطنتوں کے بننے اور ٹوٹنے کے مختلف ادوار سے گزری ہے، جس میں دو عالمی جنگیں بھی شامل ہیں۔ ان جنگوں کے بعد کئی ریاستیں اور ممالک وجود میں آئے جبکہ بہت سے ممالک ٹکڑوں میں بٹ گئے۔ یہ سارا عمل عالمی سپر پاور کی حیثیت کو برقرار رکھنے کے طریقے رہے ہیں۔انہوں نے مزید کہا کہ روس میں سوشلزم کے بعد اسٹالن اور دیگر سوشلسٹ حکمرانوں کی خونریز پالیسیوں نے روسی ریاست کو شدید نقصان پہنچایا اور روس جیسی طاقتور ریاست بھی ٹوٹ کر بکھر گئی۔ڈاکٹر مغل کے مطابق چین کی جانب سے ڈالر کی عالمی برتری کے خاتمے کے لیے آگے آنے سے اندازہ ہوتا ہے کہ آنے والے وقت میں چین اپنی مکمل برتری قریب المستقبل میں قائم کر لے گا۔ دوسری عالمی جنگ کے بعد برصغیر کا پاکستان اور ہندوستان کی صورت میں سامنے آنا اس بات کی دلیل ہے کہ برطانیہ نے اپنی عالمگیریت اور پاور کو بچانے کی خاطر یہاں کے ٹکڑے کیے تھے۔انہوں نے کہا کہ اسی طرح مشرق وسطیٰ کے ممالک میں دنیا کی سپر پاور امریکہ کو فوجی اڈے دینے کے بعد انہیں واپس لینے کے لیے موجودہ دور کے حالات واضح ہیں۔ حال ہی میں ایران جنگ میں کامیابی کے بعد مشرق وسطیٰ کے کچھ ممالک کے ٹوٹنے یا دوسروں میں ضم ہونے کے امکانات موجود ہیں، جن میں لبنان، سعودی عرب اور خود پاکستان میں بھی تبدیلیوں کے امکانات ماہرین ظاہر کر رہے ہیں۔ڈاکٹر سکندر مغل نے کہا کہ پاکستان اس خطے کا اہم ملک ہے، حالیہ جنگوں کے لحاظ سے بھی۔ پاکستان کی ریاست کے حکمران چین سے دوستی رکھتے ہیں اور امریکہ کے ساتھ بھی ان کے تعلقات اتنے اچھے ہیں کہ چین کے نئی عالمی سپر پاور بننے کے بعد فوائد حاصل کیے جا سکیں۔ انہوں نے کہا کہ چین اس وقت دنیا کے معاشی نظام میں کافی آگے نکل چکا ہے اور مستقبل میں بھی مزید ترقی کرے گا۔ وہ اس بات کا بھی خواہاں ہے کہ کوئی بھی ملک سپر پاور بننے کے بعد اپنے مفادات کے مطابق معاشی نظام کو پوری دنیا پر حاکم بنانا چاہتا ہے، جس طرح برطانیہ ماضی میں متحدہ ہندوستان اور دنیا کے دیگر ممالک پر حاوی رہا۔لیکچر کے دوران ڈاکٹر مغل نے کہا کہ آئی ایم ایف کے ذریعے قرض دے کر امریکہ پاکستان کو اپنی طرف جھکائے ہوئے ہے۔ امریکہ نے بڑی رقم کے ہتھیاروں کے آرڈر بھی لے لیے ہیں، جس میں وہ رقم ادا کرنے والے ممالک کو اسلحہ فراہم کرے گا۔تقریب کے آغاز میں لیکچرار ڈاکٹر سکندر مغل اور دیگر مہمانوں نے ذوالفقار راہوجی کو سندھی اجرک کے تحفے پیش کیے۔ پروگرام کی نظامت ”جاگرتا فورم سکھر“ کے سیکرٹری سچل بھٹی نے کی۔ اس موقع پر لیکچرار نے سامعین کے مختلف سوالات کے جوابات بھی دیئے۔ آخر میں جاگرتا فورم کے چیئرمین ڈاکٹر غلام رسول گھمری نے اسٹیج پر آکر لیکچرار اور تمام آنے والے مہمانوں، اراکین، دانشوروں، صحافیوں اور ادیبوں کا شکریہ ادا کیا۔
