November 17, 2026

محکمہ آثار قدیمہ کے پی اور محکمہ جیل خانہ جات کے باہمی اشتراک سے پشاور میوزیم میں سووینئر شاپ کی افتتاحی تقریب منعقد۔

IMG-20260417-WA0229

محکمہ آثار قدیمہ کے پی اور محکمہ جیل خانہ جات کے باہمی اشتراک سے پشاور میوزیم میں سووینئر شاپ کی افتتاحی تقریب منعقد۔

یہ سووینئر شاپ نہ صرف ایک ثقافتی اقدام ہے بلکہ اسکا بنیادی مقصد اصلاح کے تصور کو فروغ دینا ہے۔

پشاور(نمائندہ خصوصی)گلوبل ٹائمز میڈیا یورپ کے مطابق محکمہ آثارِ قدیمہ و عجائب گھر خیبر پختونخوا اور محکمہ جیل خانہ جات خیبر پختونخوا کے باہمی اشتراک سے پشاور میوزیم میں سووینئر شاپ کی افتتاحی تقریب منعقد ہوئی۔تقریب کے مہمانِ خصوصی جناب سعادت حسن (سیکرٹری ثقافت، سیاحت، آثارِ قدیمہ و عجائب گھر خیبر پختونخوا) تھے، جبکہ اس موقع پر ریحان گل خٹک (انسپکٹر جنرل جیل خانہ جات خیبر پختونخوا) اور ڈاکٹر عبدالصمد (ڈائریکٹر جنرل آثارِ قدیمہ و عجائب گھر خیبر پختونخوا)، فیصل آمین گنڈاپور MNA بھی موجود تھے۔یہ سووینئر شاپ نہ صرف ایک ثقافتی اقدام ہے بلکہ اس کا بنیادی مقصد اصلاح (Correction) کے تصور کو فروغ دینا بھی ہے، جہاں قیدیوں کو مثبت سرگرمیوں میں شامل کر کے انہیں معاشرے کا کارآمد فرد بنانے کی کوشش کی جا رہی ہے۔ اس سووینئر شاپ میں قیدیوں کے ہاتھوں سے تیار کردہ اشیاء، پینٹنگز اور دیگر مصنوعات رکھی گئی ہیں، جن کی فروخت سے حاصل ہونے والے منافع کا 30 فیصد حصہ قیدیوں کو بطور معاوضہ فراہم کیا جائے گا، جو ان کی حوصلہ افزائی اور بحالی میں اہم کردار ادا کرے گا۔یہ منصوبہ دو اہم سرکاری محکموں، یعنی محکمہ آثارِ قدیمہ و عجائب گھر اور محکمہ جیل خانہ جات کے درمیان ایک مثالی اشتراک کی عکاسی کرتا ہے، جس کا مقصد ثقافتی ورثے کے فروغ کے ساتھ ساتھ اصلاحی نظام کو مضبوط بنانا ہے۔پشاور میوزیم، جو گندھارا تہذیب کے اہم ترین مراکز میں شمار ہوتا ہے، میں اس سووینئر شاپ کا قیام اس منصوبے کو ایک تاریخی اور ثقافتی اہمیت بھی فراہم کرتا ہے۔ اس اقدام کے ذریعے نہ صرف گندھارا تہذیب کے تاریخی پس منظر کو اجاگر کیا جا رہا ہے بلکہ زائرین کو ایک منفرد اور بامعنی تجربہ بھی فراہم کیا جا رہا ہے۔تقریب کے دوران مہمانوں نے اس اقدام کو ثقافت کے فروغ، بین المحکمہ جاتی تعاون اور قیدیوں کی اصلاح و بحالی کے لیے ایک اہم سنگِ میل قرار دیا۔تقریب خوش اسلوبی سے اختتام پذیر ہوئی اور شرکاء نے اس مشترکہ کاوش کو سراہا۔