پاکستان پیپلز پارٹی بلوچستان کے سینئر صوبائی نائب صدر اور ترجمان آصف علی زرداری برائے بلوچستان میر علی حسن زہری کا یومِ پاکستان (23 مارچ) کے موقع پر خصوصی بیان
پاکستان پیپلز پارٹی بلوچستان کے سینئر صوبائی نائب صدر اور ترجمان آصف علی زرداری برائے بلوچستان میر علی حسن زہری کا یومِ پاکستان (23 مارچ) کے موقع پر خصوصی بیان
یومِ پاکستان 23 مارچ ہماری قومی تاریخ کا وہ عظیم دن ہے جو ہمیں ایک علیحدہ، خودمختار اور باوقار مملکت کے حصول کی جدوجہد کی یاد دلاتا ہے۔ 1940 میں پیش کی جانے والی قراردادِ لاہور نے برصغیر کے مسلمانوں کے لیے ایک نئی سمت متعین کی اور یہی وہ بنیاد تھی جس پر بعد ازاں پاکستان کی عمارت استوار ہوئی۔ یہ دن ہمیں اپنے اسلاف کی بصیرت، قربانیوں اور غیر متزلزل عزم کی یاد دلاتا ہے۔
میر علی حسن زہری نے اپنے بیان میں کہا کہ 23 مارچ محض ایک تاریخی دن نہیں بلکہ ایک نظریہ، ایک عہد اور ایک جدوجہد کا نام ہے۔ یہ وہ دن ہے جب برصغیر کے مسلمانوں نے اپنے روشن مستقبل کے لیے ایک واضح اور دوٹوک فیصلہ کیا، اور دنیا کو یہ پیغام دیا کہ وہ ایک آزاد اور خودمختار ریاست کے قیام کے لیے ہر قربانی دینے کو تیار ہیں۔
انہوں نے کہا کہ پاکستان پیپلز پارٹی نے ہمیشہ عوامی حقوق، جمہوریت اور وفاق کی مضبوطی کے لیے تاریخی کردار ادا کیا ہے۔
شہید ذوالفقار علی بھٹو نے اس ملک کو متفقہ آئین دیا اور عوام کو آواز دی، جبکہ شہید محترمہ بینظیر بھٹو نے آمریت کے خلاف جدوجہد کرتے ہوئے جمہوریت کی شمع کو روشن رکھا۔ آج ہم انہی عظیم رہنماؤں کے نقشِ قدم پر چلتے ہوئے ملک کی ترقی اور عوام کی خوشحالی کے لیے اپنی جدوجہد جاری رکھے ہوئے ہیں۔
میر علی حسن زہری نے کہا کہ یومِ پاکستان ہمیں اس بات کا درس دیتا ہے کہ ہم ذاتی مفادات سے بالاتر ہو کر قومی مفاد کو ترجیح دیں، اور ایک مضبوط، متحد اور مستحکم پاکستان کی تعمیر کے لیے مل کر کام کریں۔ موجودہ حالات میں ہمیں باہمی اتحاد، برداشت اور بھائی چارے کو فروغ دینا ہوگا تاکہ دشمن عناصر کے ناپاک عزائم کو ناکام بنایا جا سکے۔
انہوں نے بلوچستان کے عوام کو مخاطب کرتے ہوئے کہا کہ یہ صوبہ پاکستان کی ترقی میں ریڑھ کی ہڈی کی حیثیت رکھتا ہے۔ بلوچستان کے وسائل، اس کے عوام اور اس کی سرزمین ملک کی خوشحالی کا ضامن ہیں، لہٰذا ضروری ہے کہ یہاں کے عوام کو ان کا حق دیا جائے اور ترقیاتی عمل کو مزید تیز کیا جائے۔ پاکستان پیپلز پارٹی ہمیشہ بلوچستان کے عوام کے حقوق کی علمبردار رہی ہے اور آئندہ بھی یہ جدوجہد جاری رکھے گی۔
انہوں نے مزید کہا کہ آج کے دن ہمیں یہ عہد کرنا ہوگا کہ ہم اپنے ملک کو درپیش چیلنجز کا مقابلہ متحد ہو کر کریں گے، اور پاکستان کو ایک مضبوط، خود کفیل اور ترقی یافتہ ریاست بنانے کے لیے اپنی تمام تر توانائیاں صرف کریں گے۔ ہمیں اپنے نوجوانوں کو آگے لانا ہوگا اور انہیں تعلیم، روزگار اور ترقی کے مواقع فراہم کرنے ہوں گے تاکہ وہ ملک کا روشن مستقبل بن سکیں۔
آخر میں میر علی حسن زہری نے کہا کہ ہمیں اپنے شہداء اور اکابرین کی قربانیوں کو کبھی فراموش نہیں کرنا چاہیے۔ یہی قربانیاں ہمارے لیے مشعلِ راہ ہیں۔ آئیں ہم سب مل کر اس عزم کا اعادہ کریں کہ ہم پاکستان کی سلامتی، استحکام اور ترقی کے لیے کسی بھی قربانی سے دریغ نہیں کریں گے، اور ایک عظیم، خوشحال اور باوقار پاکستان کی تعمیر میں اپنا بھرپور کردار ادا کریں گے۔