November 17, 2026

سکھر آئی بی اے یونیورسٹی میں پاک فوج کے حق میں یکجہتی ریلی کا انعقاد

IMG-20260302-WA0142

سکھر آئی بی اے یونیورسٹی میں پاک فوج کے حق میں یکجہتی ریلی کا انعقاد

سکھر(بیورورپورٹ)سکھر آئی بی اے یونیورسٹی کی جانب سے حالیہ ملکی حملے کے تناظر میں پاکستان کی مسلح افواج سے اظہارِ یکجہتی اور غیر متزلزل حمایت کے لیے ایک ریلی کا انعقاد کیا گیا۔ اس ریلی میں جامعہ برادری نے قومی سلامتی، خودمختاری اور امن کے لیے اپنے عزم کا بھرپور اظہار کیا۔ریلی کا آغاز زیرو پوائنٹ سے ہوا اور اختتام اکیڈمک بلاک 3 پر ہوا۔ ریلی کی قیادت وائس چانسلر پروفیسر ڈاکٹر آصف احمد شیخ نے کی، جبکہ ان کے ہمراہ پرو وائس چانسلرز، ڈینز، چیئرپرسنز/ایچ او ڈیز، ڈائریکٹرز، سیکشنل ہیڈز، اساتذہ کرام، افسران، ملازمین اور طلبہ کی بڑی تعداد شریک ہوئی۔ شرکاء نے شدید گرمی اور ماہِ رمضان میں روزے کی حالت کے باوجود شرکت کر کے اپنی حب الوطنی اور قومی وابستگی کا عملی مظاہرہ کیا۔شرکاء سے خطاب کرتے ہوئے وائس چانسلر پروفیسر ڈاکٹر آصف احمد شیخ نے کہا کہ سکھر آئی بی اے یونیورسٹی کے پلیٹ فارم سے پوری تعلیمی برادری پاکستان کی مسلح افواج کے ساتھ مکمل یکجہتی کا اظہار کرتی ہے۔ انہوں نے ملکی سلامتی کے تحفظ اور تاریکی کی آڑ میں کی گئی جارحیت کا فوری اور مؤثر جواب دینے پر افواجِ پاکستان کی پیشہ ورانہ صلاحیتوں اور جرات کو خراجِ تحسین پیش کیا۔ انہوں نے اس عزم کا اعادہ کیا کہ پاکستان ہمیں اپنی جانوں سے بھی زیادہ عزیز ہے اور ہر فرد اپنے پیشہ ورانہ فرائض کی ادائیگی کے ذریعے وطن کی خدمت کرتا ہے۔وائس چانسلر نے اس بات پر زور دیا کہ جہاں افواجِ پاکستان ملکی سرحدوں اور خودمختاری کے دفاع میں ہمہ وقت مستعد ہیں، وہیں سکھر آئی بی اے یونیورسٹی معیاری تعلیم کی فراہمی اور مستقبل کے قائدین کی تربیت کی اپنی بنیادی ذمہ داری کو پوری سنجیدگی سے نبھا رہی ہے۔ انہوں نے کہا کہ تاریخ گواہ ہے کہ جب بھی دشمن قوتوں نے پاکستان کو کمزور کرنے کی کوشش کی، افواجِ پاکستان نے قوم کی مکمل حمایت سے منہ توڑ جواب دیا۔انہوں نے معصوم شہریوں کو نشانہ بنانے والے حملوں کی شدید مذمت کی اور اس بات پر زور دیا کہ حق اور سچائی ہمیشہ غالب آتی ہے۔ خطے کی موجودہ صورتحال پر تشویش کا اظہار کرتے ہوئے انہوں نے بالخصوص ماہِ رمضان میں امن، تحمل اور باہمی احترام کی ضرورت کو اجاگر کیا۔اس موقع پر جامعہ نے Ayatollah Seyyed Ali Khamenei (1939–2026ء)، سپریم لیڈر Islamic Republic of Iran کی مبینہ شہادت پر بھی گہرے دکھ اور افسوس کا اظہار کیا اور حکومتِ ایران اور برادر عوام سے دلی تعزیت کا اظہار کیا۔آخر میں وائس چانسلر نے طلبہ، اساتذہ، افسران اور ملازمین کی جانب سے اس عزم کا اعادہ کیا کہ ادارہ قومی سالمیت اور خودمختاری کے تحفظ کے لیے قوم کے شانہ بشانہ کھڑا ہے۔ ریلی کا اختتام “پاکستان زندہ باد” کے نعروں اور ملک کی سلامتی، استحکام اور خوشحالی کے لیے خصوصی دعا کے ساتھ ہوا۔