“جب ٹیکنالوجی نے ضمیر کی دستک سنی”
“جب ٹیکنالوجی نے ضمیر کی دستک سنی”
دنیا کی بڑی بڑی کارپوریشنز عام طور پر منافع دیکھتی ہیں، ضمیر نہیں۔ مگر کبھی کبھار تاریخ ایسے موڑ پر آ جاتی ہے جہاں سرمایہ دارانہ نظام کو بھی اپنے دامن پر لگی گرد صاف کرنی پڑتی ہے۔ حالیہ دنوں میں یہ خبر سامنے آئی کہ مائیکروسافٹ نے اسرائیلی فوج کے ایک مخصوص یونٹ کو اپنی کلاؤڈ خدمات فراہم کرنے سے انکار کر دیا ہے۔ یہ فیصلہ نہ صرف ٹیکنالوجی کی دنیا میں ایک دھماکہ ہے بلکہ عالمی سیاست میں بھی ایک نئے سوال کی گونج پیدا کرتا ہے۔
بات یہ ہے کہ اسرائیلی فوج کے ہاتھوں غزہ میں جو کچھ ہو رہا ہے، اس پر دنیا کے بیشتر ادارے خاموش تماشائی بنے ہوئے ہیں۔ مگر مائیکروسافٹ کا یہ قدم ایک علامتی اعلان ہے کہ اب کارپوریٹ دنیا بھی سب کچھ نظرانداز نہیں کر سکتی۔ یہ وہی مائیکروسافٹ ہے جو دنیا کے ہر کونے میں اپنی خدمات بیچتا ہے، اور جس کے کلاؤڈ پر اربوں ڈیٹا سانس لیتے ہیں۔ لیکن جب یہ اعلان آیا کہ “ہم اپنی خدمات وہاں نہیں دیں گے جہاں یہ ٹیکنالوجی جنگی جرائم کا حصہ بنے”، تو دنیا چونک اٹھی۔
سوچنے کی بات ہے کہ اگر ایک ٹیکنالوجی کمپنی یہ جرات کر سکتی ہے تو باقی کیوں نہیں؟ گوگل، ایمازون، اور دیگر کمپنیاں جو خاموشی سے اربوں کماتی ہیں، کیا ان پر لازم نہیں کہ وہ بھی دیکھیں کہ ان کی پراڈکٹس کس کس مقصد کے لیے استعمال ہو رہی ہیں؟ کیا یہ بہتر نہیں ہوگا کہ جب بھی کسی فوجی یا سیاسی مشینری کو ٹیکنالوجی دی جائے تو اس کی ایک اخلاقی جانچ بھی کی جائے؟
مگر یہاں ایک دوسرا پہلو بھی ہے۔ بعض ناقدین کہتے ہیں کہ مائیکروسافٹ نے یہ فیصلہ صرف دباؤ کے تحت کیا ہے۔ مغربی دنیا میں عوامی رائے بڑی تیزی سے اسرائیل مخالف ہو رہی ہے۔ غزہ کے ملبے تلے بچوں کی چیخیں اور معصوم چہروں کی تصاویر جب سوشل میڈیا پر وائرل ہوئیں تو عام لوگ اپنی آواز بلند کرنے لگے۔ یونیورسٹیز میں احتجاج ہوا، کمپنیوں کے دفاتر کے باہر بینرز لگے۔ تو کیا مائیکروسافٹ نے یہ قدم محض اپنی “کارپوریٹ امیج” بچانے کے لیے اٹھایا ہے؟ یا واقعی ضمیر کی کوئی روشنی اندر جاگ اٹھی ہے؟
یہ سوال اپنی جگہ، مگر حقیقت یہ ہے کہ یہ فیصلہ آنے والے دنوں میں ایک مثال ضرور قائم کرے گا۔ اگر آج مائیکروسافٹ نے یہ کیا ہے تو کل کو ممکن ہے کہ ایمازون اپنی ڈیٹا سروسز پر قدغن لگائے، یا گوگل اپنی آرٹیفیشل انٹیلیجنس کے استعمال پر نظر رکھے۔ اور یہ وہ لمحہ ہوگا جب دنیا دیکھے گی کہ ٹیکنالوجی صرف “پیسہ بنانے کا ہتھیار” نہیں بلکہ “انسانی قدروں کا نگران” بھی بن سکتی ہے۔
اب ذرا سوچئے، اگر مائیکروسافٹ یہ کہے کہ “ہم کسی ایسی حکومت یا فوج کو خدمات نہیں دیں گے جو انسانی حقوق پامال کرتی ہے” تو دنیا کا نقشہ ہی بدل جائے گا۔ آدھی دنیا کے حکمران لائن میں کھڑے ہوں گے کہ “براہِ کرم ہمیں بھی کلاؤڈ پر رہنے دیں، ہم انسانیت کے دشمن نہیں ہیں!” یہ شاید ایک خواب لگتا ہو، مگر حقیقت یہ ہے کہ خواب ہی دنیا کے رخ بدلتے ہیں۔
اس فیصلے نے اسرائیل کے لیے ایک نئی مشکل کھڑی کر دی ہے۔ کیونکہ جنگ کے اس دور میں جہاں بارود اور ٹینک سب کچھ نہیں کر پاتے، وہاں ڈیٹا اور ٹیکنالوجی اصل ہتھیار بن جاتے ہیں۔ اور اگر یہ ہتھیار چھن جائیں تو سب سے بڑی فوج بھی اندھی ہو جاتی ہے۔ مائیکروسافٹ نے یہ ہتھیار جزوی طور پر واپس لے کر ایک علامتی مگر طاقتور پیغام دے دیا ہے۔
آخر میں بات پھر وہی کہ دنیا کو یہ سمجھنا ہوگا کہ جنگ صرف میدانِ جنگ میں نہیں لڑی جاتی۔ یہ سوشل میڈیا پر بھی لڑی جاتی ہے، کلاؤڈ سسٹمز پر بھی، اور ہمارے ضمیروں میں بھی۔ مائیکروسافٹ کا یہ فیصلہ اس جنگ کا ایک چھوٹا سا مگر معنی خیز مورچہ ہے۔ اگر دوسرے ادارے بھی اس مورچے میں شامل ہو جائیں تو شاید ایک دن غزہ کے بچے بھی سکون کی نیند سو سکیں۔
@@@@@@@@@@@@@@
