سکن/جلد کے امراض میں مبتلا مریضوں کے لیے خوش آئند اقدام
سکن/جلد کے امراض میں مبتلا مریضوں کے لیے خوش آئند اقدام
ایم ایم سی میں امراض جلد کی ماہر ڈاکٹر نے آئی بی پی سہولیات جوائن کرلی۔
مردان(نمائندہ نورین ناز)گلوبل ٹائمز میڈیا یورپ کے مطابق مردان اور ملحقہ اضلاع کے جلد کے امراض میں مبتلا افراد کے لئے ایک اہم اقدام کرتے ہوئے مردان میڈیکل کمپلیکس (ایم ایم سی) کی انتظامیہ نے کنسلٹنٹ ڈرمیٹولوجسٹ اور جلد کے امراض کی ماہر ڈاکٹر شفا بی بی کے انسٹی ٹیوشنل بیسڈ پرائیویٹ پریکٹس (آئی بی پی) کلینک قائم کردیا گیا۔اس اقدام کے ساتھ جہاں خصوصی طبی خدمات کے دائرہ کار میں مزید وسعت آ گئی ہے وہاں جلد کے امراض سے متاثرہ افراد کو بہترین اور معیاری طبی سہولیات میسر آئیں گی۔نئے کلینک کے باضابطہ افتتاح کے سلسلے میں اسپتال میں ایک تقریب منعقد ہوئی جس میں کیک کاٹا گیا۔ میڈیکل ڈائریکٹر پروفیسر ڈاکٹر محمد سعید تقریب کے مہمانِ خصوصی تھے، جبکہ ان کے ہمراہ آئی بی پی مینیجر ڈاکٹر کاشف اور اسپتال کی انتظامیہ و طبی عملے کے دیگر ارکان بھی موجود تھے۔اس موقع پر گفتگو کرتے ہوئے میڈیکل ڈائریکٹر پروفیسر ڈاکٹر محمد سعید نے اس پیشرفت کا خیرمقدم کیا اور اسے جلد کی پیچیدگیوں اور امراض میں مبتلا مریضوں کے لیے ایک اہم ریلیف قرار دیا۔ انہوں نے کہا کہ اس اقدام سے مقامی مریضوں کو سرکاری شعبے کے فریم ورک کے اندر ہی خصوصی ڈرمیٹولوجی کی خدمات اور ڈاکٹر شفا کی پیشہ ورانہ مہارت سے براہِ راست مستفید ہونے کا موقع ملے گا۔ڈاکٹر شفا بی بی، جو کہ ایم ایم سی کے شعبہ امراضِ جلد میں بھی خدمات انجام دے رہی ہیں، پیر سے جمعرات تک آئی بی پی کلینک میں مریضوں کے معائنے کے لیے دستیاب ہوں گی۔ ان کے کلینک کے اوقات کار شام 4:00 بجے سے رات 8:00 بجے تک مقرر کیے گئے ہیں۔
