سِکھ طالب علم اور قرآن کا سبق ****************************** ✍️ ح۔عبیدالرحمن یزدانی چیئرمین ایس آر پبلک سکول ®
🌹🌹🌹🌹🌹🌹🌹🌹🌹🌹🌹
سِکھ طالب علم اور قرآن کا سبق
******************************
✍️ ح۔عبیدالرحمن یزدانی
چیئرمین ایس آر پبلک سکول ®
__________________________________
لاہور بورڈ کے حالیہ نتائج میں ایک غیر معمولی خبر نے سب کو چونکا دیا۔ آنکار سنگھ نامی ایک سِکھ طالب علم نے میٹرک (نہم) کے امتحان میں غیر معمولی کامیابی حاصل کرتے ہوئے اسلامیات میں 98/100 اور ترجمۃ القرآن میں 49/50 نمبر لے کر سب کو حیران کر دیا۔یہ کامیابی محض ایک طالب علم کے امتحانی نمبرات نہیں، بلکہ ہمارے سماج کے لیے ایک بڑا پیغام ہے۔ ایک غیر مسلم طالب علم نے قرآن کے ترجمے اور اسلامیات جیسے مضامین میں وہ مہارت دکھائی جس میں اکثر مسلمان طلبہ محض پاس ہونے پر اکتفا کرتے ہیں۔ یہ حقیقت ہمارے تعلیمی رویوں اور دینی مضامین کے ساتھ ہمارے تعلق پر ایک گہرا سوالیہ نشان ہے۔آنکار سنگھ نے یہ ثابت کیا کہ علم کی کوئی مذہبی یا نسلی حد نہیں۔ علم کا دروازہ ہر اس شخص پر کھلا ہے جو خلوص اور محنت سے اسے حاصل کرنے کی جستجو کرے۔ ایک سِکھ طالب علم کا قرآن کے ترجمے میں 98 فیصد کارکردگی دکھانا اس بات کی علامت ہے کہ احترام اور محنت کے ساتھ پڑھا گیا علم ہمیشہ کامیابی دیتا ہے۔
ہمارے لیے یہ لمحہ فکر ہے۔ کیا ہم نے اپنے بچوں کو قرآن و اسلامیات کے ساتھ وہ لگن اور محبت دی ہے جو ایک غیر مسلم طالب علم نے دکھا دی؟ بدقسمتی سے ہمارے ہاں اکثر مسلمان طلبہ دینی مضامین کو “آسان مضمون” یا “ضروری بوجھ” سمجھ کر پڑھتے ہیں۔ نتیجہ یہ کہ وہ اس علم کی اصل روح سے محروم رہتے ہیں۔
آنکار سنگھ کی یہ کامیابی ہمیں یاد دلاتی ہے کہ علم کا چراغ کسی کے مذہب سے مشروط نہیں، بلکہ محنت، دیانت اور لگن سے روشن ہوتا ہے۔ اگر ہم اپنے بچوں میں بھی یہی جذبہ بیدار کریں تو یقینا ہماری نئی نسل علم کے ہر میدان میں نمایاں ہو سکتی ہے۔
یہ خبر ایک سبق ہے، ایک آئینہ ہے اور ایک دعوت فکر بھی۔ شاید اب وقت آ گیا ہے کہ ہم اپنے بچوں کو یہ سمجھائیں کہ دینی و دنیاوی علم میں کوئی تقسیم نہیں۔ دونوں علم انسان کو روشنی دیتے ہیں، دونوں علم انسان کو بلندی پر لے جاتے ہیں۔